163 bide bikaintasunerako

Amaitzen ari den 2010 honetako liburu onenetako bat, oso estiman dugun managementeko gurua den Tom Peters-en "The Little BIG Things. 163 Ways to Pursue EXCELLENCE" (Gauza txiki handiak. 163 bide bikaintasuna bilatzeko) liburu berria da. Peters-en azken liburuen ildoa jarraitzen du, eta edozein lekutan hasita irakur daiteke, bideak bata bestearen independenteak dira eta. Baina multzoka bilduta daude, eta tituluak bere filosofia adierazten dute: txikia, bikaintasuna, krisia, aukera, erresistentzia, norbera, besteak, lotura, jarrera, emaitzak, lana, ekimena, lidergoa, hitzak, networking, janaria, bai, ez, bezeroak, ekintza, aldaketa, grina, presentzia, talentua, jendea, generoa, berrikuntza, entzutea, jakin-mina, ikasi, denbora, diseinua, xehetasunak, enpresa, ber-imajinatu, oh!, orain, talka, arrakasta, eta handia.

1982an “In Search of Excellence" (Bikaintasunaren bila) best-sellera idatzi zuenetik, bere diskurtsoa iritzi horren inguruan berresten da: zerbaitetan onena izan. Dioenez, bikaina ez izatekotan, zer orduan? Bikaina orain ez izatekotan, noiz orduan?... Liburu inspiratzailea, irakurtzeko erraza, eta adibidez betea, enpresa arlotik at ere erabilgarriak direnak.
.

Desioak

Gabonetako aurtengo zorionak Calcutako Ama Teresaren erantzun sorta da, Celine Dion-en “The power of love” musika ederrarekin. Zorionak guztioi:

Egunik ederrena? - Gaur
Gauzarik errazena? - Oker egotea
Oztoporik handiena? - Beldurra
Gaitz guztien jatorria? - Egoismoa
Akatsik handiena? - Gerra
Entretenimendurik ederrena? - Lana
Porrotik txarrena? - Etsipena
Irakasle onenak? - Umeak
Lehen premia? - Komunikatzea
Sentimendurik txarrena? - Gorrotoa
Pertsonarik arriskutsuena? - Gezurtia
Biderik azkarrena? - Ibilbide jakina
Satisfakziorik handiena? - Ongi bukatutako lana
Erremediorik onena? - Baikortasuna
Gauza guztien artean ederrena? - Amodioa
Pertsonarik beharrezkoenak? - Gurasoak
Gauzarik premiazkoena? - Etxea
Oparirik onena? - Barkamena
Gehien blokeatzen duen sentimendua? - Goibeltasuna
Zoriontsuen egiten zaituena? - Besteentzat baliagarria izatea
Munduko indarrik bortitzena? - Fedea
Misteriorik handiena? - Heriotza
Sentsaziorik atseginena? - Barneko bakea

“Behin soilik igaroko naiz bizitzatik.
Ondorioz, egin dezakedan edozein gauza on, edo pertsonaren bati egin ahal diodan maitagarritasunen bat, orain egin behar dut, hemendik berriro ez naizelako igaroko”.
Calcutako Teresa
.

Juan Carlos Cubeiro

Poztasun handia izan da Espainiako coach esanguratsuena den Juan Carlos Cubeiroren blogean, “MONDRAGOEko 32 enpresa giltzarriak” gure liburuaren aipamen luze eta positiboa irakurtzea. Cubeirok estatuko enpresa onenen zuzendari onenekin egiten du lan, horien artean IBEX 35eko ia denekin, eta ziurrenik gaur egungo enpresen egoera erreala ondoen ezagutzen dutenen artean dago. Bere postak ikasteko iturri paregabeak dira, eta ematen dituen erreferentzia ugariak, etengabeko hobekuntzarako eredu berriak.

Cubeiroren betiko jarrera positiboaren, hain premiazkoa ekintzaileengan eta enpresetako proiektuak aurrera eramaten dituztenen artean, kontraste bezala abenduko “Muy interesante” aldizkariko aleak dakarren “Sormenaren alde iluna” artikulua da. Bertan aipatuak dira, alde batetik USAko Columbiako Negozio Eskolako psikologa soziala den Modupe Akinola, triste egoteak sormen gehiagoko pertsona bihurtzen gaituela dioena. Eta bestetik, ildo beretik idazten duen Joseph P. Forgas, Australiako University of New South Waleseko psikologoa. Urte askotako ikerkuntzen ondoren, konbentzituta dago egoera pesimistan egoteak dakarren onura harrigarriak. Pertsona negatibo bat xehetasun txikietan baikorra baino hobeto biltzen dela azpimarratzen du… Sormen taldeak osatzerakoan kontutan hartu beharreko azterketak dira.
.

Sormenari buruzko artikuluak

Agian kudeaketaren inguruko bi aldizkari ospetsuenen azken aleetan, sormenari buruzko hiru artikulu argitaratzea kointzidentzia izango da. Nahiz eta gaiaren gaurkotasunagatik izango dela sumatu, ekonomia globalizatu honetan lehiakorrak izateko ezinbesteko tresna delako. Horrela, MIT Sloan Management Review aldizkari ospetsuak argitara eman du “How to Make Your Brain More Creative” (Burmuina nola egin sormenago). Sinatzailea Shelley Carson da, eta beste alderdi batzuen artean, sormena denok hobetu dezakegula dio, entrenamendua eta praktikaren bidez.

Harvard Deusto Business Review aldizkari bikainaren zazpi artikuluetatik, bi sormenari buruzkoak dira. Lehenean, Jörg Reckhenrich, Martin Kupp eta Jamie Anderson-ek “Sormena ulertzen: zuzendaria artista bezala” artikulu interesgarria idazten dute. Kontzeptu berri bat sartzen dute: “try-storming”. Eta honakoa adierazten du: brainstorming-eko ideiak praktikara azkar eta merke eramateko garrantzia, beti ere epe motzean. Boeing-etik hartutako kontzeptua da. Beste artikulua, hezigarria baita, Guido Stein eta Miguel Lopez-Remirorena da, eta gaia: “Sormena nola sustatu? Ikasgaiak artearen eremutik". Sormenean ikusten dituzten zazpi giltzarriak garatzen saiatzen dira: helburuaren zentzua, sentsibilitatea, tentsioa, ironia, jokoa, zortea eta itxaropena.
.

Laguntza- enplegatuak

Gaur argitaratu dute Harvard Business School ospetsuko Working Knowledge aldizkarian Ranjay Gulatiren “Managing the Support Staff Identity Crisis” (Laguntza-enplegatuen identitate krisiaren kudeaketa) artikulu interesgarria. Bertan egoki azaltzen du tamaina batetik gorako enpresetan, salmentetan edo ekoizpenean zuzenean sartuta ez dauden pertsonak, sarri “kostu” edo “egitura gastu” bezala izaten direla hartuak, hots, ezabatu daitekeena. Multzo honetan administrazioko pertsonala egoten da, eta informatikakoak, pertsonalekoak, marketing-ekoak, etab. Eta hori gertatzen da kuantifikatu ez delako egiten; ez delako jakiten ustiapen kontura zer nolako ekarpena egiten duten. Ondorioetako bat honakoa da, arlo horietako pertsonak identitate krisia jasaten dutela, ez dakitelako zein den beraien benetako ekarpena enpresara. Gaurkotasun handiko gaia da, staff pertsonal hori barik, enpresak ezin duelako funtzionatu, eta bere menpe dagoelako know-how metatuaren zati handi bat.

Autoreak nabarmentzen duenez, negozioen kudeatzaileek enplegatuen artean beraien burua soilik laguntza-pertsona bezala ez edukitzea sustatu behar dute, baizik eta ideia berrien eta enpresaren garapenaren katalizatzaile. Hain zuzen, abian den Euskaliteko KnowInn programako saioetan garatzen ari den proiektu pilotuetako bat, enpresako pertsonal “ez-zuzen” guztien ideia berrien ekarpenari buruz da. Hots, zuzenean kudeaketan edo ekoizpenean sartuta ez daudenena. Orain arte inoiz egin gabe zuten halakorik, eta itxaropen onak daude.
.

Nazioarteko itunak

Gaur goizean irratiko albiste garrantzitsuenetako bat, Autonomia Erkidegoko Ete-n (Enpresa txiki eta ertainak) nazioartekotasun urria izan da. Atzerriko filial ekoizleei eta delegazio komertzialei buruz, zein esportazio zuzenaz, ari zen. Eta esatariak, adierazle horiek enpleguaren sormenarekin edo mantentzearekin lotzen zituen zuzenki. Zentzuzkoa da pentsatzea Bruselak Greziari eta Irlandari laguntza zuzena ematen dabilenean, eta dirudienez Espainia eta Portugali ere ematekotan ari denean, estatu horien barne merkatuak oso apalduta egotea. Ondorioz, kanpora begiratzea hobe da, garapen iraunkorra duten merkatuetara. Baina Eteak eurak bakarrik joateko dituzten zailtasunak kontutan hartuz, bai muga ekonomikoengatik zein katalogoengatik, aukera onena eta ia bakarra itunak egitea da.

Logika honekin jarraitu dugu gaurkoan Ete metalmekaniko baten itunak egiteko aukeraz, Alemania, Britainia Handia, Holanda, Austria, etab. estatuetan, gutxi nazioartetuta dagoen beste Eteren batekin. Lehen proiektua jadanik aurreratuta dago, eta ideia katalogoak zein baliabideak konpartitzea da, itun hirukoitz baten bitartez, bertoko ingeniaritza bat ere sartuz. Kontutan hartu da baita, atzerriko Eteak ekoizpenaren zati handi bat Txinan egiten duela. Negozio zifra gehitzeaz gain, aukera paregabea izango da benchmarking tekniko eta komertziala egiteko.
.

Ideiak nola sortzen diren

Sormen tailerretan, taldekako lau sormen tresna erabiltzen ditugu, eta bat bakarkakoa, Programazio Neuro-lingüistikoa. Taldeen bileretako helburu nagusia partaide guztien artean banakakoen ideiak hobetzea izaten da, bakoitzari era pertsonalean sortzen zaizkionak. Espainiako Programazio Neuro-lingüistikako Erakundearen definizioari jarraituz, tresna hau egunero bizitzan erabiltzen diren metodo eta teknikak dira, pertsona bakoitzak helburuak lortu ahal izateko edozein arlotan, bizitza kalitatea hobetuz.

Adibide klasiko batzuk honakoak dira:
- Albert Einstein fisikari ospetsuak, gaztaroan idatzi zituen bere teorien oinarria ezarriko zituzten argitalpenak, eta goizeroko garbitasuneko ohituran otutzen zitzaizkiola ideiarik onenak zioen, inoiz ez bere patenteen bulegoan edo bilera akademikoetan.
- William R. Hamilton matematikariak, bat-batean ulertu zuen zenbaki kuaternionikoen egitura, Dublingo ubide erreala gurutzatzen duen zubi batetik igarotzerakoan.
- Henri Poincare zientzilariak, funtzio futxsianen arazoaren irtenbidea beraiengan pentsatzen ez zegoela aurkitu zuen, txango batera joateko autobus batera igotzekotan zela.
- Frank Wilczek fisikariak, 2004an Nobel saria jaso zuenean honakoa adierazi zuen, ezkongai maiteminduta zegoenean izan zituela sormen unerik onenak bere askatasun asintotikoen teoriak formulatzeko.
.

72 Nobel saridun

Aste honetan aztertu dugun Negozio Plan baten, bosgarren urterako irabazien ehunekoa salmentekin alderatuz 44koa zen. Adierazlea deigarria egiten zen. Eta NP.ren arduradunek bideragarria zela esaten bazuten ere, kostu finkoak hobeto begiratzeko eskatu diet. Sarritan, ustiapen kontua errealista ez bada, agudo eraman dezake proiektua porrotera. Bera ondo egitea, salmenten koadro egoki batekin, arrakastaren giltzarrietako bat da. Eta MIT ospetsuaren MBA Executive berriari egin diogu benchmarking.

Katalogoan zein web orrian jartzen duten informazioan, honela diote: “With 72 Nobel laureates, MIT is the world’s center of innovation and leadership. MIT students are immersed in world-class research…” (72 Nobel saridunekin, berrikuntzan eta lidergoan MIT munduko errerferentea da. MITeko ikasleak mundu mailako ikerkuntzan murgilduta daude…) MBA Executiveko curriculumean, Business Plan Development (Negozio Planaren garapena) da lehenengotako puntu bat. Programako arlo guztiak dira garrantzitsuak, baina Negozio Plana leku berezian kokatuta dago.
.

Lurraldeen berrikuntzaren adierazleak

Kauffman fundazio amerikarrak, ekintzailetasunean mundu mailako erreferentea denak, argitaratu berri du 2010 Ranking of “New Economy States”. Highlights Leaders and Laggers in Innovation, According to Kauffman/ITIF Study (“Ekonomia Berriaren Estatuen” 2010eko ranking-a. Liderrak eta galtzaile nabarmenak KauffmanITIFen azterketaren arabera). Estatu bakoitza aztertzeko, ekonomia berria ongien jasotzen duten bost sailetan banatutako 26 adierazle hartzen ditu kontutan. Oso indize baliagarria da, hemendik benchmarking egiteko egokia.
A- EZAGUTZAREN ENPLEGUAK
1- Informazio Teknologiako lanpostuak
2- Kudeatzaile, profesional eta teknikoen lanpostuak
3- Hezkuntzako lanpostuak
4- Ezagutzako enplegatu inmigranteak
5- Ezagutzako enplegatuen migrazioa
6- Manufaktura-industriako balio erantsia
7- Soldata altuen zerbitzuak
B- GLOBALIZAZIOA
8- Manufaktura eta zerbitzuetara bideratutako esportazioak
9- Inbertsio atzerritar zuzena
C- DINAMISMO EKONOMIKOA
10- Lanpostuen mugimendua
11- Hazkuntza azkarreko enpresak
12- Eskaintza publikoak
13- Jarduera ekintzailea
14- Patenteak eta asmakizunak
D- EKONOMIA DIGITALA
15- Biztanleria On-line
16- E-Administrazioa
17- Nekazaritza On-line
18- Banda zabaleko telekomunikazioak
19- Informazio teknologiak osasunean
E- BERRIKUNTZARAKO AHALMENA
20- Teknologi altuetako lanpostuak
21- Zientifikoak eta ingeniariak
22- Patenteak
23- Industriaren inbertsioak I+Gean
24- Industriakoak ez diren inbertsioak I+Gean
25- Ekonomia berderantz doan mugimendua
26- Arrisku-kapitala
.