Ekintzailetasuna

Podometroak gazteentzat

2012-02-01T09:14:00.000-08:00

Springwise ideia berrien aldizkari bikainak gaurkoan dakarren ideietako bat, podometroa gazteentzat gailuarena da. Podometroak pertsona baten urratsak neurtzen ditu, eta horrela distantzia, abiadura eta ibileraren kadentzia jakin daiteke. Bere funtzionamendua barnean daraman sentsore batek ezartzen du, urratsen kulunka neurtzeko eta erregistratzeko gai delako. Urrats bakoitzaren batez besteko tartea pertsonalizatuz ondorioztatzen dute gutxi gora beherako distantziak, abiadurak, kadentziak eta ibiltzean erretako kaloriak. Neurketen zehaztasunak, urrats egonkorrak mantentzearen ahalmenaren araberakoak dira, beraien batez besteko luzerak ezartzean. Merkatuan podometro modelo ugari daude, bereziki distantzia luzeko atletentzat eta mendiko ibiltarientzat diseinatuak. Baina gaurko ideia gizentasunerako joera duten gazteentzat zuzendua dago, urratsak zenbatu ahal izanagatik auto-motibatzeko.
.

.
Estatistikek diotenez gazte gizenen ehunekoa goraka doa, eta bestalde emaitza hobeak lortzen dituzte ikasketetan gazte aktiboak. Ziurrenik epe ertainean gurean ere ikusiko ditugu era honetako gailuak.
.

Sormena, moda eta enpresariak

2012-01-27T08:25:00.000-08:00

Urtarrilean ospatu da Oviedon “XXI. mendeko kultura” ekitaldia, aurtengoan modari eta arteari zuzendua. Bertan hizlari parte hartu zutenen artean, asko estimatzen ditugun bi ekintzaile zeuden, Enrique Loewe eta Purificación García. Estatuan goi standing-eko modako markarik garrantzitsuenetakoa den Loeweko presidenteak zioenez, modaren arazo nagusienetako bat enpresari falta da, industria hori era lehiakorrean garatzeko gai izango direnak. Sortzaileak eta diseinatzaileak “pertsona orkesrta” izaten direla argudiatu zuen, negozioaren atal guztiak beraien menpe edukitzea nahi dutenak, sormen arlotik komertzialeraino. Horren ondorioz porrotak egoten dira, moda negozio bezala ez hartzeagatik. Antzera mintzatu zen Purificación García,
modaren arlo sortzailea eta enpresariala uztartzea zaila dela zioenean. Bere ustez, orokorrean sortzaileak apaltasun gutxi izaten dute, eta egoa berriz oso jasoa.

Modaren kasua ekintzaile askori gertatzen zaie. Negozio osoa kontrolatzen nahi dutenak izaten dira, hasierako urteetan zehazki beraiek esandakoa betetzeko, horrela proiektuaren arrakasta bermatzeko. Baina indarrak horrela dibertsifikatzea, delegatu eta azpikontratatu barik, akatsa izan daiteke. Zentzuzkoagoa da hasieratik zuzendari trebe bat jartzea, talde profesional bat izango duena negozioaren arlo bakoitzean, ekintzaileak berak soilik menperatzen dituen gaietan arreta jarriz. Eta Tom Peters managementeko guru ospetsuak dioenari jarraituz, eskuarki arrakasta txiripaz ematen, baizik eta taldeko kideek bikaintasunerako bi ezaugarri betetzen dituztenean: Talentua izatea eta Lan asko egitea.
.

Teknologi aliantzak

2012-01-25T22:51:00.000-08:00

Egun hauetan MPS pulbimetalurgia alorreko oinarri teknologikoko start-up bat bisitatu dut. Duela lau urte sortu zen ikerketa teknologi zentro ospetsu batetik. Orain dela bi urte arte, negozio berria bi ekintzailek zuzentzen zuten, bata gerentea eta bestea zuzendari teknikoa zirela. Eta akziodunen artean, aipatutako zentroa gehi arrisku kapitaleko bi erakunde zeuden, bata publikoa eta pribatua bestea. Baina sarri gertatzen den legez, prototipotik industrializaziorako jauzia neketsua izan zen, kostu asko sortuz. Horren ondorioz, ekintzaileek bazkide finantzarioekin zituzten harremanak urruntzen joan ziren. Eta duela bi urte gerenteak enpresa berria utzi egin zuen, beste profesional bikain batek ordezkatuz. Eta akziodunen artean multinazional txiki bat sartu zen, bere know-how teknologiko zein enpresarialaren ekarpena eginaz.

Henry Etzkowitz-en helize hirukoitzaren garapen ekonomikoa, inguruneko hiru eragileen sinergiatan oinarritzen da: Administrazioa, eragileak eta enpresak. Jadanik dagoenaz ahalik eta gehien baliatzean dago giltzarria, beste batzuk eraginkorragoak diren arazoak konpontzen hasi barik. Nola jokatzen du MPSk?
1) Administrazioa: administrazioak sustatutako industrialdea baten kokatuta dago, eta ahal duen neurrian, I+G+bko laguntzei eta arrisku kapitalaren sozietate publikoaren finantzazioari onurak ateratzen dizkie,
2) Eragile teknologikoak: aipatutako jatorrizko zentroak, akziodun izaten jarraitzeaz gain, bere know-how zientifiko zein teknologikoaren ekarpena egiten jarraitzen du, eta
3) Enpresak: balio katearen hornitzaileekin eta bezeroekin elkarlanean ari dira. Baina ez zuten sektore bereko teknologi aliantzarik egin hasieratik, ez eta join-venturerik. Ondorioz, start-uparen garapenaren finkatzea eta mozkinetan sartzea atzeratua izan da.
.

Negozio Plan bat ondo aurkezteko

2012-01-20T08:43:00.001-08:00

Ekintzaile batek Negozio Plana aurkezten duenean, ideia bat saltzen ari da, negozio berri baten proiektua. Eta bera pertsonalki inplikatu behar da salmenta horretan, aurkezpenari garrantzia handiena emanaz. Adibide bat jartzearren, Hollywoodeko pelikulen ezaugarrietako bat zera da, ekoizten adina diru inbertitzen dutela sustatzen. NParen aurkezpenetan, bi aukera eman daitezke, laburra eta lasaia:
A) 55 segundotan, hots, “Elevator pitch” edo igogailuaren formatuan. Ekintzailea gai izan behar da 55 segundotan entzulearengan interesa pizteko.
B) 10 minututan. Ekintzaileak power pointa erabiltzeko aukera izango du.

Badira Mónica Pérez de las Heras bezalako adituak, aurkezpen eraginkorrak nola egin maisuki azaltzen dutenak. Baina horrez gain, NParen lau arlo nagusiak azpimarratzea komeni da:
1- Finantza arloa: Oso taula soilak aurkeztu. Derrigorrezko lau taulak garrantzi paretsuarekin aurkeztu. Ustiapen kontuan Marjina Gordinaren eta Emaitzaren Salmentekiko %ak azpimarratu. Kapitalaren premia erakutsi, eta bera itzultzeko aurreikuspena.
2- Marketing arloa: Negozio berriak sortzen duen balio erantsia agertu. Merkatuan jadanik dagoenarekin ezberdintasunak agertu. Lortu daitekeen merkatu eremu bat dagoela azaldu. Negozio berriaren aukera erakutsi.
3- Ekoizpen arloa: Produktuaren eta ekoizpenaren berrikuntzak agertu. Inbertsioak laburki azaldu, makineria zein ekoizpen prozesuak. Balio katea aurkeztu, eta hornitzaileekin izango diren harremanak. Kalitatearen puntu nagusiak aipatu, eta erabiliko diren tresnak.
4- Pertsonal arloa: Ekintzailearen eta taldekide nagusien CVak agertu. Kudeaketa eredua azaldu eta garatu. Ordainketa politika laburki erakutsi. Lidergoaren eremuak eta talde lanen sorrerak azaldu.
.

Giza ekintzaile heroikoak

2012-01-18T23:21:00.000-08:00

Harvard Business School amerikarrak argitaratzen duen Working Knowledge aldizkari bikaineko gaurko alean, artikulu interesgarri bat dator “Beyond Heroic Entrepreneurs” (Ekintzaile heroikorengandik haratago). Julie Battilana eta Lee Mateo burutzen ari diren ikerketaren aurretiazko ondorio batzuk, honako jazoerak erakusten dizkigute:
- Giza ekintzaile askok inguruneko hobekuntzetara bideratzen dituzte beraien ahaleginak, aldaketa globalera baino, eta
- Gero eta gehiagok egitasmo sozialetarako finantzazioa, bide komertzialetan bilatzen dute, karitatezko dohaintzei begira geratu beharrean.

Gertaera hau mundu osoan ematen da. Zeren eta, nazio aberats eta txiroen artean ez dago nazio horren adinean, edo baliabide naturaletan, edo adimen intelektualean, edo leinuan zein azalaren kolorean. Adibidez, Japoniaren lurraldearen %80a menditsua da, nekazaritzarako eta abeltzaintzarako desegokia. Eta Suitzaren kasuan, kakaorik ez du ereiten, eta munduko txokolaterik onena du; urteko lau hilabetetan soilik lantzen du lurra animaliak hazteko, baina esne-produkturik onenak ekoizten ditu. Non da, beraz, desberdintasuna? Herriaren kontzientzia mailan, bere izpirituan, bere heziketa eta kulturan. Guzti horiek, inguruko komunitateko kontzientzia kolektiboan eratzen dira. Eta ondo antolatuta, mikro-estatutan bilakatzen dira, gehienak bizitzako oinarriak hauek landuz:
1. Etika, funtsezko printzipio bezala,
2. Zuzentasuna,
3. Erantzukizuna,
4. Errespetua lege zein araudiekin,
5. Errespetua beste herritarren eskubideekin,
6. Lanerako grina,
7. Inbertitzeko ahalegina,
8. Hobetzeko gogoa, eta
9. Puntualtasuna.
.

Bizkortzaileak eta business angels-ak

2012-01-13T06:40:00.000-08:00

Ekintzaileak aldizkari bikainaren urtarrileko alean, “Business Booster. Aceleradora de “e-pymes” (Business Booster. e-Eteen bizkortzailea) artikulu interesgarria argitaratzen da. Valentziako Business Booster enpresari buruzkoa da. Internetera edo mugikorretara zuzendutako negozio ideiak sustatzen ditu, eta ekintzaileen ideiek arrakasta lor ditzaten saiatzen da. Bere eginkizunetako bat inbertsioen eramailea izatea da, business angels- aurreko faseak kokatuz. Inbertitzaileak joaten diren ekitaldiak antolatzeaz gain, hazi kapital funtsa dute. Enrike Penichet sortzaileak dioen bezala “Ideia bat hartu ondoren, inbertitzaileengana baldintza onetan ailegatu dadin bizkortzen dugu”.

Negozio Plan bat eratzeko orduan, ekintzaileak Finantza plan bat ere egitea komenigarria da. Bertan, oreka bilatu beharko du baliabide propioen, epe luzeko besteren baliabideen,eta epe motzeko besteren baliabideen artean:
* Baliabide propioen finantzazioa: kapitala, auto-finantzazioa, etab.
* Besteren baliabideak: bankuak, kutxak, hazi kapitala, business angels, etab.
Eta kanpoko finantzazio desberdinen ehunekoak orekatu egin behar dira. Guztiak izango dute negozioa errentagarria izateko interes handia, baia horrez gain, business angelsak administrazio kontseiluan parte hartuko dute, aholkularien funtzioak betez. Mercadonaren azken Memoriaren aurkezpenean, Juan Roig sortzaile eta Presidenteak administrazio kontseiluan partaide independenterik ez zuela adierazi zuen “Nire aitak zioenez, soilik dirua arriskuan jartzen duenak ematen du aholku onak”.
.

Prototipoak amaitzen jakin

2012-01-11T09:13:00.000-08:00

Egun hauetan, GARAIA Berrikuntza Gunean Antonio Guerra ekintzailearen startup-ak dituen prototipo berriak ikusten izan naiz. Ezagutzen ditudan sortzaileen artean emankorrenetakoa da Antonio, eta 40 patentetik gora ditu erregistratuta. Horietako lehena 1992koa da, Paris bezalako hirietan erabiltzen diren kaleko altzariei buruzkoa. Beste sari batzuen artean, 1994an estatuko diseinatzaile onenaren garaikurra jaso zuen, Orbea enpresarentzat egindako bizikleta moderno bategatik; 1997an BIC-Berrilanek emandako diseinatzaile onenarena, etab. Cardgirus bizikleta estatiko birtualarena da bere patenterik estimatuenetakoa, eta Greg Lemond zein Bill Gates bezalako pertsona ospetsuek erabiltzen dute, eta baita Australiako talde olinpikoak. Gaur egun esku artean dituen proiektuen artean, honako prototipoak ditu:
A) Hiriko bizikleta berri eta iraultzaile batena, Noomad izenekoa,
B) iPad-etan erabilgarria izango den simulagailu baten softwarea, ingurune debekatuak saihestuko dituen aire-bideentzako, eta
C) “Lau lerroan” joko original eta tridimentsionalarena, iPhone edo iPad bezalako gailu mugikorretan eta sare sozialetan jokatzeko modukoa. Bere izena lo-xio da, eta jadanik 22 nazioetan gehien jaitsitako 100 jokoen artean dago.

Sortzaile nekaezina, bere ustez:
- Duen motibaziorik nagusiena ideiak errealitate gauzatzea da,
- Sormenak soilik prototipoa ondo egiten denean balio du,
- Jende asko dago prototipo bat amaitzen ez dakiena; gutxi batzuk lortzen dute hori,
- Desberdina da ingeniaritza egitea, edo arituko den prototipo bat hasieratik garatzea,
- Profesional adituekin harreman ona mantentzea garrantzitsua da, aprobetxatzea nahi dutenengandik saihestuz,
- Baikorra sentitzen da, eta “guda” txikietan ez du sartu nahi,
- Badira ekintzaile izan litezkeenak, negozio bat sortzeko jauzia ematen ez dutenak, koldarkeriagatik edo inguruneagatik,
- Oinarri teknologikoa duten enpresa berrientzat, erraztasun finantzario handiagoak egon beharko lirateke.
.

Bezeroen iritzia

2012-01-06T16:10:00.001-08:00

Ondorengo bideoa, iparrameriketako Silicon Valley ospetsuaren bihotzetako bat den Stanford Unibertsitateko bildumakoa da. Bertan, Jessica Mah ekintzaileak produktu berrien garapenean, bezeroaren feedbackaren garrantziaz hitz egiten du.
.

.
Jessicak dioenez eraikinetik atera egin behar da, eta produktu berria bezeroek nola erabiltzen duten ikusi. Bezeroekin egindako bilera pertsonalak berrelikadura handiagoa ematen dute, online burututako testak baino.
.

Helburuak ezarri

2012-01-04T10:09:00.000-08:00

Mind Tools Newsletter aldizkari bikainaren 2012.eko lehen alean, artikulu egoki bat dator urteari hasiera emateko: “Eight Common Goal Setting Mistakes. Achieving Your Dreams the Right Way” (Helburuak ezartzerakoan egiten diren zortzi akats ohikoak. Ametsak era egokian lortuz). Artikulu interesgarri hau Migel Angel Buonaroti errenazimenduko artista italiarraren esaera batekin hasten da: “Gutariko gehienon arrisku nagusia, ez da izango ezarriko dugun helburua altuegia izango dela eta ez garela ailegatuko, baizik eta baxuegia izango dela, eta talka egingo dugula berarekin.”

Artikuluan giltzarri bezala hartzen da, helburu barik bizitzea ibilbidea planifikatu gabeko itsasontzi baten nabigatzea bezala dela: ziurrenik nahi ez dugun tokiren batera ailegatuko da. Beraz, premiazkoa dugu geure helburuak ezartzea, garatuak izan daitezen eta horrela geure ametsak bete. Baina komenigarria da, baita, akats ohikoenak bidean ekiditea. Bestela, adoregabetu egingo gara, edo zalantzan jarriko dugu geure trebetasunak, finean uko egiteraino. Berri ona beste hau da, helburuak lortzea posible dela, zortzi akats ohikoenak ezagutzen baldin baditugu. Akatsok hauek dira:
- Errealistak ez diren helburuak ezartzea,
- Arlo gutxiegitan ardaztea,
- Amaitzeko behar den denbora gutxiestea,
- Akatsez ez jabetzea,
- “Beste pertsona batzuen” helburuetan aritzea,
- Aurrerabide maila ez berraztertzea,
- Helburu negatiboak eratzea, eta
- Helburu larregi ezartzea.
.

Nazio ekintzailea: Israel

2011-12-23T05:15:00.001-08:00

Adiskide ona eta profesional hobea den Ivan Marcos-ek oporraldi hauetarako honako liburu hau uzi dit “Start-up Nation. The story of Israel’s Economic Miracle” (Nazio ekintzailea - Nazio Start-up. Israelgo mirari ekonomikoaren historia). 2011.go irailean argitaratuta dago, eta Israelgo jarduera ekintzailearen historia eta gaurko egoeraren laburpen bikaina jasotzen du. 7’1 milioi biztanle izanik, NASDAQ-en Europa osoak baino enpresa gehiago ditu. Bestalde, 2008an bi bilioi dolar erakarri zituen arrisku kapital eran inbertsioetarako, Google, Cisco, Microsoft, Intel, eBay, etab bezalako enpresengandik. Pertsonalki Israelen bilakaera 1985etik jarraitzen dut, FAGORen zuzenean parte hartu nuenean oinarri teknologikoko “Laser Melis” Start-up sortu genuenean, CEI Saiolan inkubagailuaren bitartez. Potentzia ertaina eta altuko laserrak ekoizten zituen Israelgo enpresa batekin bazkide ginen, bakoitzak %50eko akzioekin, eta pieza konplexuen mekanizaziorako erabiltzen ziren. Liburuak antzerako enpresen adibide ugari azaltzen ditu, beti ere zientzian, teknologian eta berrikuntzan oinarrituta daudenak.

Nekeza da lerro batzuetan arrakastaren giltzarriak laburbiltzea, baina batzuk jasoko ditugu:
- Narratiba sionista gauzak sortzean oinarritzen da,
- Kulsterrak izatea (Michel Porterren eredukoak), unibertsitate, enpresa handiak eta start-upen artean. Eta elikatzen diren inguruko ekosistemen maila: hornitzaileak, ingeniaritzak, arrisku kapitalen erakundeak, etab.
- Militarren eta beraien eliteko unitate teknologikoen I+G+b, soberakinak eremu zibilera itzultzen baitira,
- Derrigorrezko soldadutzan jasotzen duten lidergo, talde lanaren eta helburu komunen trebetasunen zentzua,
- Nazio arabiar “etsaiez” inguratuta egoteak ematen dien gainditze izpiritua,
- Israelgo politiko eta enpresari historikoen lidergo eredu pertsonala,
- Etorkin kualifikatuen bolada ezberdinak. Baliabiderik gabe ailegatzen ziren, baina heziketa bikainarekin,
- Porrotaren errekonozimendua start-upen sistemaren parte bezala hartzea, arrakasta lortu ez duten ekintzaileak estigmatizatu barik,
- Anbizio onuragarri eta handia, enpresa globalak sortzeko pentsamoldeaz,
- Bakarkako zein nazio moduko biziraupen nahia,
- Beraien adimen eta lanerako ahalmen garaia, oinarrizko zientziatan eta aplikatuetan. Mundu osoan bizi diren 12 milioi juduen artean, 169 Nobel Sari jaso dituzte!
- Elkartasun sozialaren sentimendua, eta nazio baten eraikuntzan parte hartzearena, norberaren proiektu pertsonalaren gainetik.

Aurtengo postekin amaitzeko, guztioi GABON ZORIONTSUAK ETA AUKEREZ BETETAKO 2012a opa dizuet.
.

Liburu berriaren esaldiak

2011-12-21T22:48:00.000-08:00

2012. urtean, azken hilabeteotan amaitzen nabilen “Negozio Plana praktikan” liburua argitaratua izatea espero dut. Kapituluen sarreretan honako esaldiak jasotzen dira:

- “Bizitzan helbururik ez baduzu, beste norbaiten helburuak beteko dituzu”
Xesco Espar, Bartzelonako eskubaloi taldeko teknikari ohia.

- “Jakintsua isilik dago, berritsuak ez daki”
Lao Tse, Kristo aurreko V. mendeko filosofo txinatarra.

- “Estrategiarik ez duen enpresak, edozer gauza egiten saiatuko da”
Michael Porter, Managementeko gurua.

- “Garaipena aurreikusi ahal izateko bost puntu daude:
1. Noiz eta nola borrokatu dakienak irabaziko du.
2. Indar handiagoak zein txikiagoak erabiltzen dakienak irabaziko du.
3. Helburu berdinak lotzen dituzten gizonak dituenak irabaziko du.
4. Ondo prestatuta eta zelatan dagoenak irabaziko dio ondo prestatuta ez dagoen arerioari.
5. Jeneral prestuak dituenak irabaziko du."
Sun Tzu, 500 urte Kristo aurretik bizi izan zen jeneral txinatarra, eta enpresa-estrategen inspiratzailea.

- “Lidergo eraginkorra ez da hitzaldiak ematea edo maitatua izatea; lidergoa emaitzak adierazten dute, ez atributoak”
Peter Drucker, Managementeko gurua.

- “Gezurra da guk egindakoa inork ezin duela egin”
Guy Kawasaki, Ekintzailetasuneko gurua.

- “Talde sortzaileen benetako askatasuna, ideiekin saiakuntzak egiteko askatasunean dago. Eszeptiko batzuk berrikuntza garestia dela diote behin eta berriz. Epe luzera, berrikuntza merkea da. Garestia kaskarkeria da”
Tom Kelley, IDEOko Zuzendari Nagusia.

Arrakasta eta porrota saritu, nagikeria zigortu”
Tom Peters, Managementeko gurua.

- “Lan jarraian soilik sinesten dut. Arrakasta azkarra bakarrik gutxi batzuen esku dago, askok berehalako jauzia bilatu arren”
Carlos Barrabés, Ekintzaile arrakastatsua.

- “Ahal dute, ahal dutela uste dutelako”
Virgilio, Kristo aurreko I. mendeko poeta erromatarra.

- “Lidergoa, igeri egitea bezala, ezin da ikasi soilik gaiari buruz irakurriz”
Henry Mintzberg, Managementeko gurua.

- “Artista ez da pertsona berezi bat. Pertsona bakoitza da artista mota berezi bat”
Michael Michalko, Enpresen sormenaren gurua.

- “Ezin dugu sormendun ekonomia sendo bat mantendu, gizarte hautsi eta inkoherente baten”
Richard Florida, Sormenaren gurua.

- "Benetako meritukraziaren kultura sustatu behar da, gaituenen esfortzua baloratzen ahalegintzen delako, eta ez oztopatzen"
Juan Roig, Ekintzailea eta Mercadonako sortzailea.
.

Ferran Adriá eta sormena

2011-12-16T02:38:00.000-08:00

Ferran Adriá sukaldari entzutetsuaren El Bulli jatetxea, munduko onena bezala hartua izan da urte askotan. Eta horrela aitortu diote aldizkari eta gidaliburu gastronomikoak aho batez. Honako bideo bikainean bere “Sormena ez kopiatzea da” ikuspegia azaltzen digu.

Ferran Adriá y el Bulli

Adriák zintzotasun osoz eta apaltasun handiz hitz egiten digu, berean ohikoa den bezala. Bere hastapenak adierazten digu, 9.000 lan askoko egunak urratsez urrats, estrategia, kasualitatea, zortea, bilaketa, eta edozein profesionalen anbizio egokia. Sen onaren eta talentuaren ikasgai bikaina.
.

Aurrekontuak Online telefonoz

2011-12-14T22:46:00.000-08:00

Springwise aldizkari bikainaren azken alean datorren negozio berrien ideietako bat “Body Shop Bids” da. Chicagon kokatutako linean eta mugikorrean dagoen plataforma izanik, auto-gidariei matxuren konponketen aurrekontuak eskatzea ahalbideratzen dizkie, tailerretara mugikorrarekin ateratako argazkiak bidaliz. Hasieran karrozerien konponketara soilik mugatzen zen. Mugikorrarekin argazki batzuk atera ondoren, tailer egokietara bidaltzen ziren, VIN zenbakiarekin eta kalteen deskribapen labur batekin. Baina ondoren, zerbitzua ibilgailuen konponketa guztietara hedatu da.

Auto-gidariek ordenagailua edo tableta bat erabiliz egin dezakete hau, eta mugikorren aplikazio bat eskura dago iPhone eta Android-entzat. 24 ordura, erabiltzaileek tailerren aurrekontuen kalkuluak jasoko dituzte posta elektronikoz. Era honetan aurrekontu egokiena aukeratu ahal izango dute. Batezbesteko aurrezpenak % 30era ailegatzen dira. Ekainetik dago abian, eta 160 tailerrek eskaintzen dute dohaineko zerbitzu hau. Dagoeneko, 1,5 milioi konponketa aurrekontu egin dituzte hasierako bost hilabeteetan. Etorkizunera begira, Los Angeles-era eta USAko beste hainbat hiriburuetara The Body Shop-en zerbitzua zabaltzeko asmotan dabiltza.
.

Steve Jobs-en hiru puntuak

2011-12-09T09:16:00.000-08:00

Ondorengo Steve Jobs ekintzaile ospetsuaren 14 minutuko hitzaldia, Stanford Universityko diploma banaketako ekitaldikoa da, historiako 10 onenen artean sailkatua dagoena.

Bere bizitzako hiru puntu giltzarrietan eskaintzen duen iraunkortasun irakaspena, jarraitzeko moduko eredua da. Oztopo pertsonal zein profesionalak gainditzen ikastea, eta une oro hobetzeko eta negozio berriak sortzeko anbizio sanoa mantentzea, horixe da bideoak aditzera ematen duena. antzematen dena. Azkenean, minbiziaren hirugarren puntuak gainditu egin zuen, baina ez borrokatu gabe, eta ekintzaile guztientzat eredua izan den jarrera pertsonal baikorra utzi gabe.
.

Gantt-en diagrama

2011-12-07T04:52:00.001-08:00

MindTools management-eko aldizkari bikainaren azken alean, “Gantt Charts. Planning and scheduling more complex projects” (Gantten Diagramak. Proiektu konplexuagoak planifikatzen eta aztertzen) artikulu interesgarria jasotzen da. Bertan diote Gantt-en diagramak tresna baliagarriak direla, honako ezaugarriengatik:
- Betetzeko dauden zereginak planifikatzen laguntzen dutelako,
- Programaziorako oinarria direlako, zeregin bakoitza noiz bete behar den zehaztuz,
- Proiektua osatzeko premiazkoak diren baliabideen esleipenak planifikatzen laguntzen dute, eta
- Data jakin baterako bete behar den proiektu baten ibilbide kritikoa erabakitzen laguntzen dute.

Hain zuzen, Negozio Planaren bete beharreko lehen puntuetako bat aipatutako diagrama da, egutegia atxikiz Indizeko arlo bakoitzari:
1- Laburpen exekutiboa,
2- Osotasuna eta ideia,
3- Taula ekonomikoak,
4- Marketing plana,
5- Ekoizpen plana eta prototipoaren eraketa,
6- Pertsonen plana, eta
7- Negozioaren jaulkipena.
Negozio Plana guztiz osatuta egoteak, hilabete batzuetatik urte t’erdirako lana eskatzen du, produktuaren arabera eta Plana egiten duen ekintzaile taldearen arabera. Horregatik, bere garapenean zehar egokitua izan beharko da, komeni den bezainbestetan, diagramaren planifikazioa jarraituz.
.

Rusticae-ren ekintzaileak

2011-12-02T01:13:00.000-08:00

Ekintzailetasuna taldean eramatearen adibiderik onenetakoa, Rusticae-ren sortzaileena da, Carlota Mateos eta Isabel Llorens. Kasuaren ezohizkotasuna, negozioaren arrakastaz gain, elkar-lana mantentzen dutela da.

Sarritan gertatzen da negozio berriak bi, hiru edo lau pertsonen taldetan sortzea. Hasieran adiskidetasunean eta kideen osagarritasunean oinarritzen da guztia. Baina denborarekin, desadostasunak sortzen dira, negozioaren ikuspegi estrategikoan edo gai ekonomikoetan. Eta hasierako elkarteko partaideak banandu egiten dira. Carlota eta Isabelek elkarlana mantentzen jarraitzen dute, eta horren errekonozimendua merezi dute.
.

Enplegua sortzeko proposamenak

2011-11-30T04:59:00.001-08:00

Martin Varsavsky da ekintzaile teknologikoen artean nire estimatuenetako bat. Eta metodikoki bere bloga jarraitzen dut, input berriak jasotzeko. Bai negozioen arloan, zein IKTetan - informazio eta telekomunikazio teknologietan, edo bere giza kezketan. Bereziki langabeziari zuzenduak direnean. Martinek ospe handia du, eta oso praktikoa da. Ehuneko ehunean errealista. Horregatik elkartu zen azken hauteskundeetako hautagaiekin, enplegua sortzeko neurriak proposatuz. Eta berriro bildu da hauteskundeak irabazi zuen alderdiaren ekonomiako aditu batekin, Cesar Montoro-rekin hain zuzen. Gaurko post bikainean jasotzen du horren berri.,

Duela egun batzuk, estatuan giza zientzietan aditu ospetsuenetakoa den Viçenc Navarroren hitzaldi bat entzuteko aukera izan nuen. Politika publikoetan aditua da, eta enplegua sortzeko hainbat proposamen egiten ditu. Beti ere datu alderagarriak erabiliz, hemengo egoera eta europar bataz bestekoa erabiliz. Edo enplegu mailan nazio onenak direnekin alderatuz, bereziki Suediarekin, ondo ezagutzen baitu han bizi izandakoa delako. Esaten eta idazten duen guztia zenbakietan oinarrituta dago, bere liburuetan argi geratzen denez. Halaber, bere web orria eta bloga bikainak dira, eta gure ustez merezi du jarraitzea. Enplegua sortzeko Varsavskyk eta Navarrok proposatzen dituzten neurriak oso bestelakoak dira, kasu batzuetan kontrajarriak, eta horretxegatik dira are interesgarriagok.
.

Jeff Bezos, Amazon-eko sortzailea

2011-11-25T05:50:00.000-08:00

Gaurkoan etiketa multzo berri bati emango diogu hasiera, gure ustez zerbait esateko duten ekintzaile aipagarrien bideoak erakutsiz. Honako bideoan Jeff Bezos ageri da, Amazon-en sortzailea dena, eta interneten osperik handienetakoa duen gurua. Hamar minutu inguru irauten du bideoak, eta bi zatitan banatzen da. lehenengoan, bere gaztetako pasarte bat kontatzen du, hitzaldiari gertutasuna eta pertsonalismoa emateko. Eta bigarren zati bat Princeton Universiteko graduatu berriei, hots, iparamerikar unibertsitate onenetako bateko ikasle ohiei zuzendua.

Jeff Bezos-en mezuak alde batetik naturak eman dizkigun dohainei buruz dihardu, horien artean adimena aipatuz. Eta beste alde batetik, geure kabuz lortuko ditugunak jardutearen bidez, adeitasuna bezalakoak. Hausnarketa bikaina da, bizitzaren amaieran bukatzen duena, atzera begiratuko dugunean geure baitan, profesionalki zein pertsonalki hartutako erabakien egokitasuna ikusiko dugunean. Oso egokia ekintzaile batentzat.
.

Enpresaren balorazioa eta Goodwill

2011-11-23T05:54:00.001-08:00

Bost urtetarako Negozio Plana egiteko orduan, eskuarki ekintzaileek Balantzean kontabilitateko liburuen balorazioa soilik hartzen dute kontuan, hasiera baten zalantzak izaten dituztelako beste formula sofistikatuagoak erabiltzeko. Hauen artean daude adibidez PER- Price Earning Ratio (Prezioen eta Mozkinen Ratioa) balioa, enpresa berria burtsan kotizatzen direnekin alderatu nahi bada. Enpresaren merkatuko balioa eta bere mozkinen arteko erlazioa neurtzen du. Antzerako formula da PCFR - Price Cash-Flow Ratio balioa, PER-aren kontzeptu paretsua, baina cash-flow-ri lotua. Mozkinak baino emaitzen joera adierazgarriagoa denean erabiltzen da.

Baina nahiz eta kontabilitateko liburuen balioa soilik erabili, Merkataritza Funtsa edo GoodWill gehitzea garrantzitsua da. Aktibo immateriala adierazteko erabiltzen da, eta horrela kontutan hartzen du bezeroen kantitate zein kalitatea, giza kapitala, zuzendariena, produktuen kokapena merkatuan, etab. Funtsean, markaren balioa. Bereziki komenigarria suertatzen da aktiboko ibilgetuak oso txikiak direnean, aholkularitza eta zerbitzu enpresetan kasu, nahiz eta izen komertzial ona izan. Kontutan hartu behar da enpresa ospetsuenetan ere, Mercedes edo General Motors-en kasuetan adibidez, aktiboko balio nagusia izaten dela, ibilgetua, altxortegia edo izakinen gainetik.
.

Oinetakoak GPSarekin

2011-11-18T09:07:00.001-08:00

Springwise negozio berrien aldizkari bikainaren azken alean, ideia batzuk benetan erabilgarriak eta egingarriak daude. Bat aukeratzerakoan, arrakasta handia izango duelakoan gaudenetako hau da: oinetakoei GPSa txertatzea, Alzheimerra duten pertsonen mugimenduak monitorizatzeko, horrela beraien familiei lagunduz kokatuta edukitzeko ateratzen direnean. Duela bizpahiru hilabete KKDI konpainia japoniarrak antzerako gailu bat diseinatu zuen, eta oraingoan, helburu paretsuarekin, GTX Corp enpresa amerikarrak oinetako bat diseinatu Alzheimerren gaixoentzat espezifikoki, orpoan txertatutako GPS kokapen gailu batekin. Hasierako ideia umeen oinetakoei ipintzea zen, baina kontutan hartuta USAn 5 milioi pertsona daudela Alzheimerra dutenak, merkatu horretara bideratu dira.

Etorkizun handiko esparrua da, eta ez soilik umeen edo nagusien merkatuetan. Beste hainbat erabilera interesgarri ere aurki daitezke, hala nola:
- Mendiko oinetakoak. Jendea sarri galtzen da mendian, erlainoa sartu delako edo bidegurutzetan nahastu egiten delako.Era berean, istripuetan errazago aurkituko lirateke kokalekuak.
- Eskiatzeko botak. Lehen aipatutako arrazoi berdinengatik.
- Kirolarien zapatilak, zikloturistenak, footing edo luzapen handietan aritzen diren lasterkarienak, maratoilariak, etab.
- Arrantza zaleak, ehiztariak, perretxikotan aritzen direnak, xendazaletasuna dutenak, etab.
- Itsasoko kiroletan dabiltzanak, etab.
.

Varsavskyren 25 neurri enplegua sortzeko

2011-11-16T02:23:00.000-08:00

Fon bezalako enpresen sortzailea den Martin Varsavsky ekintzaile teknologikoari jarraitzeko ohitura hartua daukat. Lantzean behin bere mintzaldi teknologikoak, informatika zein komunikazioak eta gadgetak, alde batera uzten ditu, eta enplegua sortzeko proposamen ausartak egiten ditu. Eskuarki oso ideia egokiak izaten ditu, eta aste honetako post baten 25 aztertzen ditu. Laburbilduz, honakoak dira:
1- 2012an enplegatzen diren pertsonengatik enpresek ez ditzatela giza kargarik ordaindu.
2- Langabezia %12tik jaitsi arte, kaleratzearen kalte-ordaina gobernuak berma bezala.
3- Enpresa berrientzat kreditua eskuragarri izatea.
4- Farmazia bat zabaltzea erraztea.
5- Notario bilakatzea erraza izatea.
6- Startup-entzat enplegu erregimen berria sortzea.
7- Gida-baimena lortzea errazagoa izatea.
8- Itsasontzi eta hegazkinen matrikulazioko %12ko zerga kentzea.
9- Enpresaren eta enplegatuen artean erretiro adina negoziatzen uztea.
10- Maizterren eta ugazaben artean errentaren baldintzak negoziatzen uztea.
11- 50 milatik gorako soldata duten pertsonei immigrazio paperak 30 egunetan ematea.
12- Sektore pribatuan lana gora doanean, sektore publikoan gutxitu.
13- Gastu militarra zorrotz jaitsi.
14- Zentro medikura e egiten edozein bisita 6 euro kobratu.
15- Jabetzaren zergak %20n handitu.
16- 2000cc edo gehiago dituzten automobil guztiei zergak jaso.
17- Tabakoaren eta edari alkoholdunen zergak jaso.
18- Denden zabaltzeko ordutegiak aske utzi.
19- 1000m2ko etxeak eraikitzen utzi.
20- 90 egun azpitik egiten diren udako lanentzat sailkapen berezi bat egin.
21- Britainia Handiko bertakoak izan arren helbideratuta ez daudenen erregimen fiskala kopiatu.
22- Enpresen eta pertsonen iruzur fiskala maila guztietan kontrolatu.
23- Droga arinen salmenta legalizatu eta zergak kobratu.
24- Hipotekei buruzko legeak aldatu.
25- Energiari buruzko zerga progresibo bat ezarri.
.

Lehenengo urtetik esportatu

2011-11-11T06:30:00.001-08:00

Nire gertuko ingurune industrialean, 2010 benetan urte bikaina izan zen enpresa batzuentzat, Fagor Ederlan, Orkli, etab, errekorrak gaindituz salmenta zein irabazietan. Bereziki automobilgintza eta osagai industrialen sektoreetan. Beraien “A” bezeroak atzerrian daude, Alemania, Txina ea Brasil bezalako estatu sendoetan. Aurtengo 2011 hau oraindik hobeagoa izaten ari da hainbat enpresetan, eta iaz lortutakoa txiki utziko dute. Giltzarria esportazioak izaten jarraitzen du, bai zuzena zein bitarteko filialen bidez egindakoa.

Azken aldi honetan aztertzen ari garen ekintzaile berrien Negozio Planak ezaugarri jakin batzuk dituzte, eta horietako bata da Salmenta Tauletan ia inoiz ez dela lehenengo urtetik esportatzea aurreikusten. Badirudi hobe dela hasiera baten merkatu nazionalean sendotasuna lortzea eta salmenta-oinarria gertuko bezeroekin erdietsi ondoren, atzerrira joan hirugarren edo laugarren urtean. Peter Panen Sindromearen lehen zantzua da, txikiak izatea hasieran, merkatu anbizioan bederen. Ziurrenik akatsa da, produktu inpertsonal ugari dagoelako, jatorria azaltzea axola ez dena, horrek eskaintzen duen aukerarekin. Horrela egin zuen Pau García Milá ekintzaile gazteak: “Ona izan behar duzu. Hemen desberdina izan behar zara, baina munduan aritzeko ona izan behar zara. IBMk idatzi zigunean, non geunden jakin gabe egin zuen. Garrantzitsuena kodearen kalitatea zen.”
.

Bakarkako sormena

2011-11-09T09:27:00.000-08:00

Enpresen berrikuntza maila hobetzeko era bat, hots 5 urtetan katalogoa %30tik %50ra eraberritzen duten enpresena, enplegatuei beraien ekarpen sortzailea handitzean datza. Hori egiteko motibatzeko baliabideak asko dira, baina ez gara hemen beraien banakapena edo eraginkortasuna aztertzen hasiko. Soilik Programazio Neurolinguistikaren baliagarritasunaz jardungo dugu, banakako sormen tresna bezala, enplegatu guztiei lagundu ahal dielako beraien lan jardueran. Benetan da interesgarria profesional adituen blogak jarraitzea, hala nola Mónica Pérez de las Heras-ena, eta enpresa batzuen metodoak aztertzea, adibidez Toyota, Pixar, Gore, 3M, etab, benchmarking iraunkorra eginaz..

Programazio Neurolinguistikak, edo esperientzia subjektiboaren zientziak, jende askok erabiltzen duen sormen estrategia aztertzen du. Beraz, tresna hau oso erabilgarria da pertsonen sormena non garatzen den gehiago antzemateko. Pertsona bakoitzak bere eremu propioa izan dezakeenaren arren, testuinguru ohikoenak eta unibertsalenak honakoak lirateke:
- Zirkulazioaren auto-ilarak,
- Bidaiak
- Bakardade uneak dituzten kirolak
- Ohiko egoerak,
- Asteburuak
- Ametsetatik sortu
- Ez-ohiko irakurketak.
Kasu guztietan, burmuinera ailegatzen diren ideiak idatzi egin behar dira, hasiera baten oso bidegabean eman arren. Eta ondoren, denborarekin, eremu profesionalen baten kokatzerik dagoen aztertu.
.

Hauteskundeak eta ekintzailetasuna

2011-11-04T10:06:00.001-07:00

Gaur hasi da Espainiako hauteskunde kanpaina, alderdi nagusien inguruan ardaztuta, sozialista eta popularra. Badirudi gai nagusia ekonomia izango dela, bost milioi langabetu dauden estatuan bestelakorik espero ezin daitekeelako. Eta lanpostuak sortzeko ikusi ditugun proposamen komunen artean, ekintzailetasuna sustatzean bat datoz. Ados gaude, baina ez dugu uzte langabeziaren arazoa konpontzeko irtenbidea denik. Izan ere, Hemengoa baino langabezi tasa txikiagoa duten herrialde guztietan barne-ekintzailetasuna edo ekintzailetasun korporatiboa sustatzen baitute. Beraz, dauden enpresetan ekintza bereziak egiten dituzte, enpresa berriak sortzen laguntzeaz gain, bereziki mikro-eteak hasieran.

Global Entrepreneurship Monitor (GEM) ikerkuntza akademikoko irabazi asmorik gabeko partzuergo bat da, eta bere helburuen artean dago publikoari goi mailako informazio ematea da, mundu mailako enpresena. 1999an hasi zituen bere azterketa alderatuak 19 nazioetan, eta gaur egun 59tara ailegatzen da, handiena izanik arlo honetan. USAko Babson University eta UKko London Business School-en lidergoarekin aritzen da. Nazioen arteko ekintzailetasun indize ezberdinak alderatzen baldin badira, Espainia baino indize txikiagoak eta handiagoak dituztenen artean honakoak aurki ditzakegu:
- Txikiagoak: Belgika, Japonia, Alemania, Suedia, Finlandia, Danimarka, Frantzia, Holanda, Irlanda, Mexiko, Errusia, Eslovakia, Hungaria, UK eta Kanada.
- Handiagoak: Norvegia, Grezia, Kroazia, Txekia, USA, Australia, Txile, Argentina, India, Brasil, Txina, Jamaika, Kolonbia, eta latinoamerikar beste estatu batzuk.
.

Laneko motibaziorik ahaltsuena

2011-11-02T10:10:00.000-07:00

Harvard Business School-eko Working Knowledge aldizkari bikainaren azken alean artikulu interesgarri bat argitaratzen da: The Most Powerful Workplace Motivator (Lan-lekuko motibatzailerik ahaltsuena), Ian L. Larkin-ek idatzia. Ekintzaile zein zuzendari askok diotenez, enplegatuek erabaki zentzuzkoak hartzen dituzte beraien legezko interesak defendatzeko. Baina Larkinen arabera, benetan pertsona bati motibatzen diona bereziki bere paretsuekin alderatzea da, eta horien errekonozimendua jasotzea. Horrela, kontzeptu giltzarriak honakoak dira:
* Lanpostuko motibaziorik garrantzitsuena, gure laneko jarduera besteen jarduerekin alderatzeko joera naturala da.
* Saltzaileek aparteko dirua jasotzeko aukerari muzin egingo diote, horrekin beraien lankideen onespen positiboa jasotzen baldin badute.
* Sare sozialen garai honetan, enplegatuak gero eta gehiago partekatzen dute soldaten informazioa. Ordainketa planak egiterakoan, ekintzaileek kontutan hartu beharko dute errealitate hori.

Antzerako ildoa zerabilen David Freemantle adituak "Pizgarri faktorea” bere liburuan, honako puntuak aipatuz:
- 17 pizgarri multzo daude, eta lehena ideal bat jarraitzea da.
- Barnetik datorren energia da motibazioa, gehi norberaren norabidea, eta nahi den emaitzara zuzenduko da.
- Motibazio guztiak auto.motibazioak dira. Ez dago beste motarik.
- Edozein motibazio denboran mugatua da. Motibazioa eta desmotibazioa espektro beraren bi ertzak dira.
- Motibazioa espezifikoa da, eta ez orokorra.
- Jendea motibatu ala desmotibatu egin daiteke era batera (oztopoak sortzen badira)
- Motibazioa ez da zoriontasunaren baliokide, edo borondate onarena.
- Motibazioa akuilatu egin behar da, ez dator utzikeriatik.
- Logikak, arrazoiak eta arrazonamenduak ez dute motibazioa pizten.
- Pizgarria ez da dirua, baizik eta diruak eskaini dezakeena.
.

Benchmarking Baylor-i

2011-10-28T06:37:00.000-07:00

Baylor University-ko John F. Baugh Zentroa da ekintzailetasuneko zentro erreferenteetako bat. Antzerako zentroek dioten bezala, aitzindariak eta mundu mailako erreferente omen dira. Horregatik, sarri egiten diegu benchmarking arlo jakin batzuetan, oso onak direla iruditzen zaigulako. Arlo horietako batzuk Negozio Plana edo Business Plan-ekin zerikusia dute, eta hona ekarriko ditugu atal batzuk:

A) Negozio Planaren Indize edo Formatua
1- Edukien taula
2- Laburpen exekutiboa
3- Negozioaren Zeregina eta Ikuspegia
4- Negozioaren deskribapena
5- Merkatuaren azterketa
6- Produktuen eta zerbitzuen deskribapena
7- Antolakuntza eta kudeaketa
8- Marketing-a eta salmenten estrategia
9- Finantzak: Balantzea eta Ustiapen Kontua
10- Gehigarriak

B) Ebaluatzeko irizpideak
• Negozio Planaren eraginkortasuna: %20
• Arazoak eta irtenbideak: %10
• Negozioaren originaltasuna: %10
• Negozioaren bideragarritasuna: %10
• Merkatuaren erakargarritasuna: %10
• Negozio-eredua: %20
• Aurreikuspen finantzarioak: %10
• Lan idatziaren kalitatea: %10

C) Aurkezpenaren ebaluaketa
- Aurkezpenaren eraginkortasuna: %10
- Komunikazioaren kalitatea: %20
- Taldearen parte-hartzea: %10
- Sektorearen ezaguera: %20
- Erakargarritasuna inbertitzaileentzat: %20
- Galderei emandako erantzunak: %10
- Power point-aren kalitatea: %10
.

Giza ekintzaileak

2011-10-26T06:17:00.001-07:00

Egun hauetan hainbat ekitaldi egiten ari dira On Jose Maria Arizmendiarrieta-ren omenez bere heriotzaren 35. urtemuga dela eta. Ekintzaile irudikorra, soila, eta 83.00 pertsona finantza, industria eta banaketa arloetan enplegatzen duen MONDRAGON Korporazioaren ideologo zein sustatzailea. On Jose Mariak beti aldarrikatu zuen justizia soziala, eta horretarako defendatu zuen aberastasuna sortzea eta ondoren era duinean banatzea enplegatuen artean. Enpresa sozialetan ahalik eta etekin gehien lortzea zilegi dela esaten zuen, kapitalen enpresetan egiten den bezalaxe, ekintza soziala etekinen banaketan ematen baita. Ez zuen ulertzen ekintzailetasun soziala soilik irabazi asmorik gabeko enpresetan. Nahiago zuen irabaziak lortzea, ondoren enplegua sortzeko.

MONDRAGONeko enpresa jarduera gaur egun ondoko hamar printzipioetan oinarritzen da:
1- Hezkuntza,
2- Lanaren subiranotasuna,
3- Atxikimendu askea,
4- Antolaketa demokratikoa,
5- Kapitalaren izaera instrumentala,
6- Parte-hartzea kudeaketan,
7- Elkartasuna soldatetan,
8- Elkar lankidetza,
9- Eraldatze soziala, eta
10- Izaera unibertsala.
.

Arropa ekologikoa

2011-10-21T04:59:00.001-07:00

Ideia berrien Springwise aldizkari bikainaren azken alean argitaratzen duten ideietako bat Eco-friendly knitwear (Artilezko jertse ekologikoak), azala sendatzeko ezaugarriak dituena. Twosquaremeter modaren arloko enpresa alemaniarra hasi berri da esnearekin eta algekin ehunak ekoizten, eta diotenez azalari mesede egiten die. Moda ekologikoaren joera hazten jarraitzen du. Azken hilabete hauetan egunkari birziklatuekin egindako txankletak eta oienetako biodegradagarriak ikusi dira.

Arroparen Berrikuntza Enpresak sortutako marka da Twosquaremeter, bereziki garatutako hari biologikoarekin egindako kamiseta eta artilezko jakak egiten dituena. Hariak algen zuntzekin edo esnearen proteinen zuntzekin eginda daude, eta uste da horiek ezaugarri sendatzaileak eta elikagarriak dituztela azalarentzako. Esnearen bitartez artilezko ehunak ekoizteko, esne naturala gaingabetzen dute, ondoren drainatuz lortzen diren proteinak zuntz prozesatzeko. Twosquaremeter dioenez, zuntz horiek izerdia xurgatzen dute bere usaina neutralizatuz, era berean gorputzaren tenperatura erregulatzen dutela. Beste jantziak, azala gaztetzeko bitaminak eta mineralak dituzten kotoia eta itsasoko algak nahastuz egiten dituzte.
.

Emanaz irabazi. Arrakasta lortu adeitsua izanda

2011-10-19T02:36:00.001-07:00

Urriaren 18ko Mind Tools Newsletter bikainean, ekintzailearentzat eguneroko kudeaketarako baliogarria den artikulu praktiko bat dator. Edozein profesionalentzat ere baliagarria izan daiteke. Bere titulua: Wining by Giving. Succeeding Through Kindness (Emanaz irabazi. Arrakasta lortu adeitsua izanda), Wayne Dier-ek idatzia. Berak dioenez, gure denbora eta indarra beste batzuei emateak mesede egiten digu geuri ere, ez soilik ongi sentitzen garelako, baizik eta zoriontsuago egiten gaituelako, ekoizkorragoak, eta taldearekin zein enpresarekin konprometituago. Era berean, onura fisikoak ditu, estresa arintzeko adibidez. Eta baita depresioa bezalako gaitzak izateko aukerak gutxituz, edo bizitza luzeagoak izateko. Zentzu horretan, zerbait emateko zortzi bide erraz aipatzen ditu:
1- Besteei entzun, besterik gabe,
2- Laguntza espezifikoa eskaini,
3- Esker ona erakutsi,
4- Zaintzaile bihurtu,
5- Baliabideak partekatu,
6- Enplegatu berriei esku bat luzatu,
7- Onberatasun ekintzak ustekabean bete, eta
8- Helburu bat bilatu.

Dena den, eta garrantzitsua izan arren norberaren denbora eta indarra besteei ematea, garrantzi berdina dauka urrunegi ez joateak! Adibidez, bezero bati denbora piloa emateak nagusiari gaizki irudituko zaio, baldin eta denbora hori fakturatu ahal bada. Era berean, kideei laguntzen denbora larregi ematen bada, baliteke norberaren helburuak betetzeko denbora larregirik ez geratzea. Oreka egokia aurkitzea da garrantzitsuena besteei laguntzeko, norberaren betebeharrak eta lanak betetzen jarraituz.
.

Dedikazioan eredua izan

2011-10-14T09:34:00.001-07:00

Aste honetan hasi da Ekintzailetasuna Modulua Mondragon Unibertsitateko MBAn. Eta kanpoko txostengile bezala gure inguruko ekintzaile eredugarrienetako bat izan genuen: Jose Maria Ormaetxea. Familia apalekoa, 14 urterekin hasi zen lanean Arrasateko Unon Cerrajeran, eta 18rekin, 200 langile zituen fundizioko tailereko buru zen. On Jose Maria Arizmendiarrietaren inguruko gazte taldekoa zen, eta Fagor Elektrotresnak lehen kooperatibako bosteko sortzaileetako bat izan zen, eta bertako lehen Gerentea. Ondoren, Caja Laboral eta MONDRAGON Korporazioko sortzailea ere izan zen. Hainbat sari jaso ditu, enpresa zein giza arloetan, eta horien artean, 2000. urtean Gipuzkoako Industria eta Merkataritza Ganberak XX mendeko hamar enpresari onenen artean izendatu zuena.

Nolako ezaugarriak izan behar dituen ekintzaile eta zuzendari batek galderari erantzunaz, honako biak azpimarratu zituen:
- Dedikazioan eredua izan. Ondradua izan behar da, eta lan asko egin. Enplegatuak goizeko 8:00retan sartzen badira lanera, bera 7:30etan sartu behar da. Sartzerakoan lehena izan behar da, eta ateratzerakoan azkena, denbora ongi aprobetxatuz.
. Enpresako arlo guztietan arduratu, denen gutxieneko ezagutzarekin: finantzak, pertsonala, komertziala eta ekoizpena. Alderdi guztien bilakaeran jarri behar du arreta, eta guztiengatik arduratu. Ez soilik berari gehien gustatzen zaizkionetan, edo aditua sentitzen den horietan.
.

Lorpen txikiekin motibatu

2011-10-12T21:53:00.001-07:00

James Manktelowren Mind Tools aldizkari bikainaren azken alean, Harvard Business School-eko katedradunaren eta sormen arloan guru ezaguna den Teresa Amabileren artikulu interesgarri bat dator: "Progress Theory: Using Small Wins to Enhance Motivation” (Aurrerapenaren teoria: lorpen txikiaz baliatuz motibazioa hobetzeko). Steven Kramer-ekin batera 2011an argitaratu duen “The Progress Principle” (Aurrerapenaren printzipioa) liburuaren laburpena da. Idatzi ahal izateko, zazpi erakunde handietako 26 proiektu taldeetako 238 pertsonei beraien eguneroko motibazioari buruzko esperientziak era anonimoan jasotzeko eskatu zizkien. Guztira 12.000 sarrera jaso zituzten egunerokoan, eta horiek erabili zituzten pertsonen “laneko barne bizitza” aztertzeko - hots, pertzepzioak, emozioak eta motibazio mailak- eta horiek errendimenduan nola eragin zituzten jakiteko. Lorpen txikiak direla motibatzen dutenak, jabetu ziren.

Amabile eta Kramer-ek sei arlotan aurkitu zituzten zuzendari batek enplegatuei lagundu ahal izateko lorpen txikiak erdiesten:
1- Xede eta helburu garbiak ezarri,
2- Autonomia baimendu,
3- Baliabideak eman,
4- Nahiko denbora utzi,
5- Laguntasuna eta eskarmentua eskaini,
6- Pertsonei “porrot”etik ikasten lagundu
Tresna hauen erabilera sustatzeaz gain, komenigarria jendeari lorpenak ospatzen eta aitortzen, txikiak izan arren.
.

Rosalia eta Steve

2011-10-07T09:09:00.001-07:00

XXI. mendeko Emakume Enpresari eta Profesionalen Elkarteak atzo Rosalia Mera-ri “Urrezko Orratza” saria eman zion. Inditex taldearen ko-sortzailea da, nahiz eta sarritan talde hau bere senar-ohi Amancio Ortegari soilik egon lotuta. Baina merituak banatzea egokiagoa dirudi. Forbes aldizkariaren 2011ko martxoko aleak zioenez, Rosalia munduko emakume aberatsenetakoa da, 3.000 milioi euroko dirutza balioesten zaiola. Hala eta guztiz, eta bere bizitzan ohikoa den anonimatutik irtenaz, ez zuen zalantzarik izan 15M mugimenduko suminduekin publikoki solidarizatzeko. Nahiz eta duela egun batzuk Menendez Pelayo unibertsitateko honoris causa doktorea izendatua izan, sekula ez du aipatzen utzi 11 urterekin utzi zuela eskola, La Maja jantzigintza dendan jostun hasteko lanean. Han lanaldi luzean ematen zituen, bista ahuldu eta eskuak jausi arte, logurak menderatuta; baina orduan ikasi zuen jostunaren ofizioa. Gaur egungo Inditex taldearen oinarrietako bat.

Hil berria den Steve Jobs-ek ere ikasketak utzi egin zituen lanean hasteko. Maiz esaten zuen, bere Stanford-eko hitzaldi ospetsuan jasotzen den bezala. Egun hauetan jende askok idatzi du edo mintzatu da bere bizitzaz eta Appleren bilakaeraz. Pertsonari buruz, gustatu zaizkigun bi ekarriko ditugu gogora:
- Jesús Banegas, Ametic-eko presidenteak: “Bera bezalako enpresariek egiten dute munduak aurrera jarraitzea. Berrituz bizi izan zen, eta behin eta berriro birsortu zen proiektu berriak ekiteko”.
- Bill Gates, Microsoft-eko sortzailea: “Steve eta ni duela 30 urtetik hona ezagutzen ginen. Eta kideak, lehiakideak eta lagunak izan gara geure bizitzaren erdian. Steve ikaragarri botako dut faltan”
Apple-i buruz, hain estiman dugun Gary Hamel management-eko guruaren azterketarekin geratzen gara. Berriki amaitu duen “What matters now” (Orain axola dena) liburuan Apple ere aztertzen du. Bere laburpen bikainak “What makes Apple Apple” (Zerk egiten du Apple Apple) ez du galtzekorik, eta erabat gomendagarria da.
.

Ohiko Nobel sarietara itzulera

2011-10-05T08:48:00.001-07:00

Stockholmeko Erret Akademia suediarreko idazkari iraunkorra den Staffan Normark-ek gaur jakitera eman duenez, 2011ko Kimikako Nobel Saria Daniel Schechtman zientzialari israeldarrak irabazi duela. Kuasi-kristalak aurkitu zituen, atomoen mosaiko azpimarragarria. Atzo eta herenegun eman dira Fisika eta Fisiologia zein Medikuntzakoak. Aurten Zientzietako sariak jaso dituzten zazpi zientzialariak, antzerako profila dute: “Gizon mendebaldarra, europar edo iparramerikarra”. Iaz eman zen aldaketa berretsi da, emakume eta ekialdeko zientzialarien gorakada moztu zuena. Hain zuzen, sormenaren mesederako oso positiboa ikusten zen gorakada..

Izan ere, azken hiru urteetako sarituen profilak honakoak izan ziren:
- 2010ean, sei sarituetatik lau arestian aipatutako profilekoak ziren “Gizon mendebaldarra, europar edo iparramerikarra”, eta beste biak “Gizon japoniarra”ren profilekoak.
- 2009. urtean, bederatzi sarituetatik, lau “Gizon mendebaldarra, europar edo iparramerikarra”ren profilekoak ziren, hiru “Emakume mendebaldarra, europar edo iparramerikarra”ren profilekoak, gizon hindutar bat, eta beste gizon txinatar bat.
- 2008an berriz, bederatzi sarituetatik, lau “Gizon japoniarra”ren profilekoak ziren, hiru “Gizon mendebaldarra, europar edo iparramerikarra” profilekoak, bat “Emakume mendebaldarra, europar edo iparramerikarra”ren profileko, eta gizon bat txinatarra.
.

Negozio-ideien iturri bat

2011-09-30T06:58:00.001-07:00

Negozio-ideia berriei buruzko web orrien artean, Springwise da gehien hazten ari dena. Datu-base ikaragarri handia du, alfabetikoki oso garbi sailkatuta dauden 22 sektoreetan. Eta bakoitzean ehunka ideiekin. Horietatik asko gure gertuko ingurunean ezartzeko modukoak dira, agian ez agertzen diren bezala zehatz-mehatz, baina bai egokitu ondoren.

Aste honetako Sporinwise-ko alean patatekin egindako euritakoa dakar. Haziekin inpregnatuta dagoenez, erabat biodegradatzailea da, konpostagarria, eta landatu ahal izateko modukoa. Asmatzailearen esanetan, Spudeko Equilicuá euritakoa behi eta berriro erabili daiteke, biodegradatzailea soilik baldintza jakin batzuetan delako. Berrikuntza berdeak gero eta ugariagoak direla azaltzen duen beste adibide esanguratsu bat dugu honakoa.
.

Ekintzailearen apaltasuna

2011-09-28T02:21:00.001-07:00

Mindtools aldizkari elektronikoaren azken alean artikulu interesgarri hau argitaratzen dute: “Get Ahead - With Humility” (Aurrera jarraitu, apaltasunez). Bertan diotenez, negozioetan apaltasuna erabiltzea ezaugarri garrantzitsua da, baina ez dago beti garbi zuzendaritzan nola erabili. Ekintzaileak berak dominak pilatzea, negozioaren arrakastaren erantzule nagusia sentitzen delako, arrakasta lortzen denean, ekintzaile berrian ohikoa da. Eta beste ohiko ildo batzuekin konpara daiteke: jadanik beste post batzuetan aipatutako Peter Pan sindromea edo Lindberg efektua.

Asko dira apaltasunez aritzearen onurak, maila guztietan harremanak hobetzen dituelako, antsietatea gutxitzen, eta irekitasunari laguntzen dio. Paradoxikoki, geure auto-estimua gehitzen du. Eta artikuluaren egileek 5 ekintza zehatz proposatzen dituzte:
1- Norberaren ereduaz apaltasuna sustatu: arrakastaren meritua besteekin partekatzen den bakoitzean, enplegatuen izpiritua sendotzen da. Ez dira “Dominak pilatu” behar.
2- Une batzuetan urguilu pertsonala ezkutatzea zaila izaten da. Estrategiaren bat erabili behar da horretarako, eta horietako bat isiltzea izaten da, beste pertsonaren ospea ahalbideratuz.
3- Hona hemen hiru hitz, buruaren lasaitasunerako edozein erretiro garesti baino egokiagoak: “Zuk arrazoia duzu”
4- Aholku larregi ez ematea. Norberaren ikuspuntua inposatzea gustatzen da. Besteek benetan dute gure aholkuaren premia? Edo geuk daukagu emateko premia?
5- Besteei galdetzea “Nola ari naiz egiten?” Apaltasuna behar da horrelako galdera bat egiteko. Eta are apaltasun gehiago erantzunari jaramon egiteko.
.

Bidaiatu sortzailea izateko

2011-09-23T09:33:00.001-07:00

Sorkuntzako aditu guztiak bat datoz, sormena sustatzeko bidaiatu egin behar dela esaten. Sormen taldeetako partaideen artean asko bidaiatu edo bidaiatzen ari diren pertsonak egotea ezinbestekoa da. Oso zaila da beti “etxean” egonda, ideia berriak bururatzea. Irten egin behar da, ikusi, beste kultura batzuk ezagutu, beste joera batzuk, gauzak egiteko beste era batzuk. Beti ere ikasteko gogo eta interesarekin. Benchmarking egitea da, azken finean. Eta honetan, eskarmentu asko duen bat Ivan Marcos gure adiskidea da. Bere bizipenak helbide hauetan aurki daitezke:
http://www.ciudadanoenelmundo.com/
http://www.foodtrendtrotters.com/
http://www.trendtrotters.com/

Aste honetan “Buru argien itzulera, garapen txinatarraren giltzarria” artikuluaren lotura bidali dit. 2010.eko urte amaieran atzerrian 1,2 milioi txinatar zeudela ikasten diote, horietatik asko USAko laborategi onenetan. Blog honetako gai errepikaria da: ekialdeko talentua. Albisteak, “Aberriratutako ekintzaileak: Chinaren globalizazio prozesuan duten eragina” txosten baten pdf-ra lotura dakar. Bertan, atzerrian prestatu eta eskarmentua lortutako txinatarren zeregina nazioaren garapenean azaltzen da. Bai enpresa teknologikoak sortzen, zein zubi lana eginaz nazio bien artean, atzerriko kapitalaren sarrera ahalbideratuz. Eta baita, enpresa txinatarrak atzerrira irteteko orduan. Halaber, aberriratu askok zeregin garrantzitsua betetzen dute Txinan dauden multinazionaletan.
.

Mantkelow-ren sormen Aldizkaria

2011-09-21T09:16:00.001-07:00

Aste honetako “James Manktelow, MindTools.com” aldizkari bikainean, beraien paper zorroko hiru tresna aztertzen dituzte. Beti bezala, kalitate handiz informazio ugari ematen dute, grafikoekin, marrazkiekin eta prozedurekin, ulermena erraztu asmoz. Tresnok hauek dira:

- Mind Maps edo Buruzko mapak. Tony Buzan idazle eta aholkulariak ezagutarazi zituen. Ideien ohiko zerrendak egin ordez, bi dimentsiotako egitura erabiltzen dute, ideien elkarketa samurragoa izateko

- Reverse Brainstorming edo Alderantzizko ideien ekaitza. Galderak behekoz gora jartzean dago giltzarria. Adibidez, galdetu beharrean “Nola konpon edo aurreikusi dezaket arazo hau?” hobe litzateke honela galdetzea “Nola sor nezake arazo hau? “

- Reframing Matrix edo Berriz planteatzeko matrizea. Ikuspegi desberdinak erabiltzean oinarritzen da, piramide bat albo ezberdinetatik begiratzen bezalaxe. Lau ikuspegi edo perspektiba erabiltzen ditu: produktua, planifikazioa, ahalmena eta pertsonak. Horiekin egiten da matrizea, ondoren lehentasunak ezarriz.
.

Pau García-Milá

2011-09-16T06:02:00.001-07:00

Gure erreferenteetako bat den “Ekintzaileak” aldizkari bikainaren iraileko alean, Pau García-Milá 24 urteko ekintzaile arrakastatsuari egindako elkarrizketa bat dator. Eyeos-eko sortzaile eta zuzendari nagusia da. Artxibategian sarean kokatzen dago espezializatuta, cloud computing-ari buruz hitz egiten hasten zen garaian. Bere bezero-zorroan IBM eta Telefonica bezalako bezeroan daude, eta urtearen amaieran 50 enplegatura ailegatzera espero du.

Arrakasta lortzeko azaltzen dituen gogoeta edo gomendioen artean, gehien gustatu zaidanak honakoak dira:
1- Baikortasunaren enbaxadorea naiz.
2- Buru argia, ideiekin eta gauzatzeko gogoarekin edukitzea da dena.
3- Inguruneak ezetz esaten dizula. Kasurik ere ez.
4- Zure proiektu txikiak porrota izaten dutela? Ikasi, eta beste batzuk antolatu.
5- Enpresa bat kudeatzen ez dakizula? Bilatu norbait dakiena.
6- Buruzagi bat bilatu. Hobekien egiten dakizun gaian jarri behar duzu arreta guztia, eta ez dakizun gaietan beste pertsona batzuengana jo.
7- Dohainik den produktu baten, dirua irabazteko proiektuari oinarri bat eman behar zaio. Horrela, negozioa eskaintzen diren zerbitzuetan dago: euskarria, mantenua, programazioa eta aholkularitza. Bezeroen artean IBM, Telefonica, Orange Labs, eta abar daude. Beraien bezeroei EyeOs eskaintzen dizkieten enpresa handiak, edo barneko Intranet tresna bezala erabiltzen dutenak.
8- Handiengatik bereizi. Nik ez dut sekula esan inorekin lehiatzen ari naizenik. Guk geure proiektua egiten dugu, eta beraiek nahi dutena egingo dute.
9- Ona izan. Hemen desberdina izan behar zara, baina munduan aritzeko ona izan behar zara. IBMk idatzi zigunean, non geunden jakin gabe egin zuen. Garrantzitsuena kodearen kalitatea zen.
10- Egia esan. 2009ko otsailean diruz oso gaizki geunden. Zorrarekin geratzearen beldurra hain zen handia, gauetan ezin nuela lo egin. Eta sei egunetan konpondu zen, bezero guztiengana joan eta egia azaldu nien: ordaintzen ez bazuten, hilabete baten buruan ez zirela biziko. Ordaindu zuten, eta egun batzuetan hiru hilabeterako cash-a lortu genuen. Eta hor jarraitzen dugu, baina egia esateagatik izan zen. Horrek handi egiten zau.
.

Pertsonak dira garrantzitsuena

2011-09-14T23:07:00.000-07:00

James Manktelow-ren Newsletter bikainaren azken alean, hiru artikulu interesgarri datoz, Negozio Plan baten pertsonen arloan kontutan hartzekoak:
- Setting up a Cross-Functional Team. Working Effectively With Other Functions (Talde multi-funtzionalak ezarriz. Beste zeregin batzuetan eraginkortasunez lan eginaz),
- Leading Equals. Motivating People Effectively, Without Authority (Paretsuak lideratuz. Pertsonak eraginkortasunez motibatuz, autoritaterik gabe)
- Expert Power. Lead From the Front (Botere aditua. Aurrealdetik lideratu)

Ongi egituratutako Negozio Plan baten atalak honakoak dira:
1- Osotasuna eta ideia,
2- Koadro ekonomiko-finantzarioak,
3- Marketing plana,
4- Ekoizpen plana,
5- Pertsonen plana, eta
6- Negozioaren jaulkipena.
Eskuarki gertatzen da “Pertsonen plana”ren 5. atala laburrena izatea, besteen tamaina izan beharko zuenean, hots, bere garapenean orri zenbaki paretsua. Horrek zera adierazten du, inprobisatu egingo dela, meritukrazia eta antolamendu eraginkor baten elementuak kontutan hartu gabe.
.

Coaching-ari buruzko liburu berria

2011-09-09T11:41:00.001-07:00

Denboraldi honetako liburu salduenetako bat “Zergatik behar duzun coach bat. Coaching munduko egiak eta gezurrak” izan da, gure estiman dagoen Juan Carlos Cubeirok idatzia. Bere bloga ere inspiragarrienetakoa da. Bere azken liburuak lidergoari buruzko best-seller-ak izan dira, Guardiola, Mourinho eta selekzioa hartuz gaitzat. Oraingo honetan, liburua orokorragoa da, eta aurrekoen ildoa jarraituz, praktikoa, ideiak ematen dituena, eta hobekuntza pertsonal zein profesionalerako jarraibideak ematen dituena. Gure management-eko guru estimatuenetakoa den Tom Peters-en bikaintasunaren bila aritzeko.

Cubeiroren liburu berri hau, erraz irakurtzen diren honako hamar kapitulutan bananduta dago:
A atala: Nola aurreikusten duzu etorkizuna?
- Zertaz egina zaude?
- Zer izan nahi duzu?
- Ausardiaz nola zabiltza?
B atala: Zure iragana nola azaltzen duzu ?
4- Noraino zara baikorra?
5- Zein da zure mezua munduarentzat?
6- Zergatik merezi duzu konfiantza?
C atala: Nola lortzen duzu oraina?
7- Zerk ilusionatzen zau?
8- Nortzuk laguntzen dizute?
9- Zure zoriontasuna eraikitzeko zer egiten duzu?
Ondorioak
10- Pertsona osoa eta integrala.
.

Serendipity eta negozio berriak

2011-09-07T07:31:00.001-07:00

Gaur izan dugun sormen tailer baten, ohikoa izaten den bezala “Serendipity” hitza erabili dugu, negozioetarako argitasuna eta azkartasunaren sinonimotzat. Bere jatorria XVII mendeko Tramezzino idazle veneziarraren “Serendip erregearen hiru seme gazteen erromesaldia”. Liburuaren pasarteetako batek honela dio: “Gameluzain batek bere gamelua galdu zuen, eta beragatik galdetu zien hiru printzeei. Hauek ez zuten ikusi, baina hala ere ikusi zutela erantzun zioten. Lehen printzeak gamelua eskuin begitik itsua zela esan zion. Bigarrenak, hortz bat falta zuela. Eta hirugarrenak, herrena zela."

Nola zekiten gauza hauek gameluaz, inoiz ikusi ez bazuten? Lehen printzea honela mintzatu zen “Bidean, ezker aldeko belarra janda zegoen, txarra izan arren, eta bidearen eskuin aldean jan gabe zegoen belarra berria izan arren; beraz, eskuin begitik itsu egongo zela. Bigarrenak esan zuen jandako belarrean hutsuneak ageri zirela jan barik, eta ondorioz hortzerian hutsuneren bat izango zuela. Hirugarrenak, soilik hiru zangoren oinatz sakonak ikusi zituela, eta arrasto batek adierazten zuela laugarrena arinki arrastaka zeramala.” Ustekabea izan zen gameluzainak bere gamelua aurkitzea, baina historiak "serendipity"-ren argitasuna eta balioa azaltzen du.
.

Sormena sustatu

2011-09-02T07:43:00.000-07:00

Harvard Business School-eko Working Knowledge aldizkari bikainean artikulu interesgarri hau dator: “Getting to Eureka!: How Companies Can Promote Creativity” (Arrakasta lortzen. Enpresek nola sustatu dezaketen sormena). Teresa Amabile katedraduna eta beste autoreek diotenez, lehia globala areagotzen doan heinean, gero eta premiazkoagoa da enpresak era hobeagoak aurkitzea berritzeko. Bai lehiakorrak izaten jarraitzeko, edo kasu batzuetan, bizirautea nahi badute. Horretarako, bost kontzeptu giltzarri garatzen dute, enplegatuen sormena sustatzeko.

Kontzeptuok honakoak dira:
1- Lehiaketak, nahiz eta ez egon diruan oinarrituak, baliagarriak izan daitezke jende askok parte hartzeko, irtenbide berritzaileak aurkitzeko.
2- Helburu garbiak ezarriz, eta entretenimenduak ezabatuz, zuzendariek asko lagundu dezakete enplegatuen sormen bultzadak askatzeko.
3- Enplegatuak ingurune egokian kokatzea, errendimendua handitzeko motibagarria izaten da
4- Egoki sustatuz gero, erabiltzaileen komunitateak iturri garrantzitsuak izan daitezke produktuen hobekuntza eta berrikuntzarako.
5- Harreman sare multi-kulturalak dituzten enplegatuak, ideia ezberdinak jasotzeko aukera handiagoak dituzte.
.

Liburuak

2011-08-31T08:56:00.000-07:00

Laneko sormena eta aisialdiko sormena osagarriak izan daitezke. Bukatuak diren udako oporretako jarduera nagusietako bat, literatura izan da. Aspaldiko tradizioa jarraituz, literatur sormenari nahiko denbora eman diogu, eta etorkizunak esango du gure ahaleginak argitalpen berri batekin sarituak diren ala ez. Iaz bi liburu argitaratu genituen, bata profesionala erdaraz, MONDRAGON Korporazioan daramagun 34 urteekin erlazionatuta eta “MONDRAGOEKO 32 enpresa giltzarri” izenburukoa. Eta bestea literaturakoa euskaraz, aurreko urteetako opor ezberdinetan idatzitakoa, eta “Olaitturriren herri antzerkia” izenburukoa. Zortea izan genuen bietan. Horrela, lehenengoan Jose Mª Ormaetxearen laguntza paregabea izan genuen, eta bigarrena gaur egungo mezenas ezagunenetako bat den Juan Zelaiak finantzatu zigun. Gipuzkoako Merkataritza Ganberak XX. mendeko 10 enpresari onenak izendatu zituenean, biak zeuden zerrendan, eta gaur egun bizirik jarraitzen duten bakarrak dira. Ekintzaile paregabeen adibide benetakoak biak, eta esperientzia handiko maisu bikainak.

Irakurri dugun uda honetako post nabarmenetako bat honako izenburukoa izan da “Zergatik daramadan 3 smartphone”. Martin Varsavsky gure ekintzaile teknologiko miretsiak argitaratu zuen bere blogean iragan abuztuaren 10ean, eta komunikazioko gailuen erabileraz ari da. Esaten dituen baieztapen batzuekin ados egon ala ez, lana errazteko eta komunikatzeko balio duten gailuen erabilpenaren entziklopedia bat da
.

Baldintzen orria

2011-07-08T07:49:00.001-07:00

Martin Varsasvskyk, gure ekintzaile erreferenteetako batek, gaurko bere blogean ekintzaile guztientzako oso berri praktikoa izan daitekeena argitaratu du: Britainia Haundian inbertitzaileekin erabiltzeko Baldintzen orriaren eredua adostu dute. Ematen dituen loturetan sartuta orri biak jaitsi daitezke, orokorra eta espezifikoa. Nahiz eta arlo batzuetan xehetasun larregitan sakontzen dela iruditu, hobe izaten da zuhur jokatzea, arduragabekerian hastea baino. Kanpoko inbertitzaileek, arrisku-kapitaleko enpresak izan zein inbertitzaile pribatuak, negozio berriari hiru gauza ematen dizkiete:
- Seriotasuna hirugarrenen aurrean,
- Profesionaltasuna, kudeatzaile adituak sartzen direlako, eta
- Bermerik eskatzen ez duen finantzazioa.

Bestalde, orri horiek beste egoera batzuetarako ere baliogarriak izan daitezke, hala nola joint-ventureetarako, edo ekintzaileen arteko harremanak finkatzeko, ekintzaile bat baino gehiago dagoenean. Iragan igandeko ekonomia gehigarrietan zetorren era honetako albiste bat. Bioteknologiako enpresa batek berak sortutako beste enpresa bat auzitara eraman berri du. Bigarrena gehiago hazi da bere sortzailea baino, eta hasierako harreman tekniko eta komertzialak erabat txarrera jo dute. Enpresa serioak dira, Cristina Garmendia Berrikuntza Ministroak inauguratutakoak, eta administraziotik laguntza ugari jasotakoak. Antzerako zerbait gertatzen da sarri ekintzaileen artean. Dirua banatzeko dagoenean, istiluak sortzen dira, askotan gaindiezinak bihurtzen direnak, aldez aurretik Baldintza orririk eta eskritura publikorik ez badago.
.

Era globalean lan egin

2011-07-06T06:51:00.001-07:00

Egun hauetan bi proiektu benetan interesgarriak ebaluatzea egokitu zait, bai mamiaren aldetik zein kokapenagatik: bata errusiar hiriburua den Moskukoa, eta bestea Shangai txinatar lurralde aberatsekoa. Lehena, makina-erremintako sektoreko lehen mailako ferietara joateko prozesuaren trazabilitateari buruz zen, eta bigarrena inter-lankidetzari buruz, hemengo enpresa matrize eta atzerriko filialen artekoa.

Estatu mailan krisi ekonomikoa eta langabezi altua egon arren, gaur egun badira enpresak produktu eta merkatu globalak izanik, inoizko hazkunde handiena dutenak salmentetan eta mozkinetan. Eta hain zuzen, horiek dira enplegua sortzen ari diren bakarrak. Alemaniara esportatzen duten automobilgintza sektoreko osagai ekoizle gehienak, errekor historikoetan dabiltza. Makina-erremintaren sektoreko enpresek txinatar merkatura jarri zirenez geroztik, azken urteetako eskari-zorro handienak dituzte. Zenbaki horien funtsezko arrazoia BEG-Barne Ekoizkin Gordinean dago, herrialde horietakoa askoz handiagoa baita hemengoaren alderatuz.
.

Talentua erakarri eta atxiki

2011-07-01T09:04:00.000-07:00

Europa berrikuntzaren menpean dago, ekoizten eta esportatzen dituen produktuak ezin dutelako prezioetan lehiatu Asiako hego-ekialdean ekoiztutakoekin. Duela urte asko hasi zen Europar Batasuna berrikuntza sustatzen. Baina hori, unibertsitateetako, teknologi zentroetako eta enpresetako I+Gko departamentuetako talentu metatuen menpean dago. Eta hiru arlotako ekintzak hartzen ditu:
- Atzerritik talentua erakarri, hots, mailako “etorkinak”,
- Atzerrira doktoretza joan den bertako talentua erakarri, atzerrian bertako laborategien ekipamendu onagatik asko geratu baitira, eta
- Bertako talentua atxiki, ez daitezen izan USAra, Canadra etab doazen mailako “emigratzaileak”.

MIT estatubatuarretik 60tik gora Nobel Saridun eta milaka spin-off atera dira, eta horrek bilakatu du mundu mailan unibertsitate erreferenteetako bat izatea. Bere gaurko web orriko azalean, honako berriak datoz:
1- Gailu berri bat kataratak minutu gutxitan diagnostikatzeko, Ramesh Raskar indiarrak garatuta,
2- Porlanezko egituretako akatsak antzemateko sentsore berri bat, Simon Laflame kanadarrarena,
3- Ordenagailuen txipetarako e-beam litografia berria, Vitor Manfrinato brasildarra eta Lin Lee Cheong txinatarrarena,
4- Rubik-en kuboaren algoritmo matematiko berria, Erik Demaine kanadarrarena, eta
5- Gailu elektronikoentzako diren grafeno plakak ekoizteko metodo berria, Chih-Jen Shih txinatarrarena eta jatorri italiarra duen Michael Strano estatubatuarrarena.
.

Didac Lee

2011-06-29T08:54:00.001-07:00

Ekintzaileak” aldizkari bikainaren uztailaren aleko dossier nagusia, taiwandar jatorriko eta Gironan bizi den Didac Lee-ri dago eskainia, Inspirit enpresa taldea sortu bait du. Teknologia, zerbitzuak eta ecommerce arloetan diharduten 9 enpresa dira taldean, eta egun 245 enplegatu dituzte Girona, Bartzelona, Madril, Buenos Aires eta Silicon Valleyn sakabanatuta. Interesgarriak iruditu zaizkigun iruzkin batzuk jasoko ditugu hemen:
- Sekula ez naiz ezertan ekiten, amari garbi azaltzeko gai ez banaiz. Metodo honi PCM deitzen diot (Probatu Amarekin).
- Beti lehiakideen aurretik joan behar zarela ikasi dut, baina ez oso aurreratuago, porrot egitea nahi ez baduzu.
- Berritzailea izan arren, guztiaren giltzarria produktua saltzean dago.
- Nahiko nagia naiz, baina oso nagia izanda ere, atsegin duzun zerbait aurkitzen baduzu, ez dauka atzetik inork ibili beharrik lanean aritzeko.
- Ekialdeko atsotitz batek dioenez, patuak norbait porrotera bidali nahi badu, egiten duen lehen gauza bere egoa puztea da.
Garrantzitsuena ez dira ideiak, baizik eta beraien inplementazioa. Ohartzen bazara, gure estatuko interneteko proiekturik hoberenak, atzerrian arrakasta dutenen kopiak dira.
- Jendeak ea nola nagoen hemen hain lasai galdetzen dit, hainbeste enpresa edukita. Gakoa kudeaketarako bazkide egokiak aurkitzea da.
- Lehiakideak dauden tokian egon behar zara.
- Beste edozein arlotan, sektorean urte asko daramaten enpresekin lehiatu beharko nintzen, baina interneten desberdina da. Eskaintza erakargarri bat sortzea da.
.

Ideia berritzaileak aukeratu

2011-06-24T07:56:00.000-07:00

MIT Sloan Management Review aldizkari bikainean Markus Reitzig-en honako artikulua argitaratu dute: “Is Your Company Choosing the Best Innovation Ideas?” (Zure enpresa ideia berritzaile onenak aukeratzen ari da?). Bertan dioenez, erakunde batentzako egindako berrikuntza proposamen onak, zikloaren hasiera besterik ez da. Arlo zailena praktikara eraman ahal izateko, enplegatuen ideien hautaketa prozesu egoki bat jarri behar da abian.

Enpresetan ideia sortzaileak lortzeko metodologia eta baliabide ugari daudela konturatuko dira, berrikuntzaren eremuan hasi berriak diren zuzendariak. Liburu zein argitalpen asko daude, enplegatuek ohiko pentsaeretatik aldendu eta era sortzailean asmatzen laguntzen dutenak. Ikuspuntu hauen helburua ezohiko ideiak sortzea da, negozioaren emaitzak hobetzeko, edo aukera berriak aurkitzeko. Hala ere, erakunde handienen ohiko arazoa ez da izaten ideien urritasuna. Benetako erronka ideia onenak aurkitzean datza. Paper-zorroko onenak nola aukeratu.
.

Zuzendaritza taldeak

2011-06-22T07:00:00.000-07:00

Ekintzaileen erabaki garrantzitsuenetako bat negozio berrirako Zuzendaritza Taldea aukeratzea izaten da. Barne-ekintzaileen artean, proiektuaren taldea aukeratzea. Hain zuzen, aste honetan horri lotutako bi berri argitaratu dira, bere garrantzia azpimarratuz. Lehena McKinsey Quarterly argitalpen bikainaren azken alean agertu den “Boards: When best practice isn’t enough” (Zuzendaritza taldeak. Jardute onenak nahiko ez direnean) artikulua. Simon C. Y. Wong bere egileak dioenez, talde horien egiturak eta prozesuak hobetu egin badira ere, benetan eraginkorrak izateko lan mentalitate eta dinamika egokiak izan behar dituzte. Horrela, CEO-Zuzendari Nagusiak eta zuzendari taldeak jabe bezala pentsatzen ez badute eta autoritatea mantendu, erronka konstruktibo gutxi izango dira zuzendari eta enplegatuen artean, prozesuak onak izan arren.

Ildo honetatik idazten du Martin Varsavsky ekintzaile bikainak bere azken posta: “Stephen Elop Nokia suntsitzen ari da, eta Microsoft-en eskuetara bidaltzen”. Nokian lana egitea edo bertako akzioduna izatea gogorra izan behar dela dio, jakinik lanaren eta akzioen balioa salbatu egingo liratekeela Androi sistema hartuta. Era berean, zaila da Nokiaren desagerpena ia Windows soilik erabiltzeagatik datorrela jakiterakoan. Stephen Elop-ek Sistema operatibo hori aukeratzea erabaki zuenetik, Nokiak ez du bizirik iraungo, eta kakahuete batzuengatik Microsoftera saldua izan beharrean aurkituko da. Ziurrenik Nokia Microsofteko dibisio txiki eta errentagarritasun urrikoa bihurtuko da. Hots, ikuspegi estrategiko gabeko zuzendaritza talde batek, setakeriaz eraman dezake enpresa bat bere gainbeherara, inoiz horrela onartu ez arren.
.

80 patente

2011-06-17T08:51:00.001-07:00

Gaur egungo CV distiratsuenetako bat ekarriko dugu oraingoan blog honetara: John A. Rogers, ikertzailea, ekintzailea eta poeta. Aste honetan, bostehun mila dolarreko diru-hornidura duen Lemelson-MIT 2011 saria eman diote Illinois-eko Unibertsitateko katedraduna eta kimika fisikoan doktorea den John A. Rogers-i. Kontutan hartu duten alderdietako bi bere ikerketen ikuspuntu praktikoa eta bere izaera ekintzailea izan dira. Rogers-en interesa zientzian eta teknologian haurtzaroan hasi zen, aita fisikoa zelako eta ama poeta. Horrek, pentsamendu irudikorra sendotzea ahalbideratu zion.

Bere prestakuntzak eta ikerketak inter-diziplinaritatea erakusten dute. Bere lanek oinarrizko eta aplikatutako alderdiak jorratzen dituzte hainbat alorretan, hala nola nano-teknologian eta molekular eskalako ekoizpenean, gailu elektronikoen eta fotonikoen materialen modelizazioan, beti ere sistema bio-integraletan eta bio-iradokitzaileetan sakonduz. Bere asmaketen oinarria ideia sortzaileen erabileran dago, printzipioz erabilera praktikoa bilatuz. Mc10 eta Semprius-eko ko-sortzailea eta zuzendaria da, teknologian oinarritutako beste hainbat enpresetan bezala. Hirurehun artikulutik gora argitaratu ditu, eta 80 patenteren sortzailea da, enpresa handietan zein bere enpresetan erabiltzen direnak. Benetan ekintzaile eredugarria.
.

Ekintzaile gazteak

2011-06-15T02:37:00.001-07:00

Atzo egin zen Madrilen “YUZZ ekintzaile gazteen lehen topaketa”, ekintzailetasunaren eremuan estatuko erakunderik ospetsuenetako batek antolatuta, Banesto Fundazioak hain zuzen. Antonio Basagoitiren lehendakaritzapean, “Ideia bat, amets bat, erronka bat” lelopean egin zen azterketarako eta networking-erako balio duen ekitaldi garrantzitsuan, 300 gazte ekintzailek hartu zuten parte. 18 eta 30 urte arteko gazteen artean, teknologian oinarritutako enpresak sustatzea da helburua, eta aurtengo ekitaldian YUZZ estatuko 18 hiritara ailegatzen da. Helburua, etekin handiko gune horiek zabaltzen joatea da, 2011ko urte amaieran 25era iritsiz.

Ekitaldian zehar aurreko edizioko YUZZ gazte batzuk hartu zuten parte. Horien artea, jadanik enpresa eratu duten batzuk zeuden: -argiztatzera bideratutako LEDS enpresako Rebeca Sánchez Pastor, LED teknologia erabiliz energia aurreztera zuzentzen dena; Aureo-ren sortzaileak Marçal Panareda eta Cristian Monjo, ETE-Enpresa Txiki eta Ertainentzat web dinamikoak egiteko software garatzaileak; eta ekintzailetasunarekin zein sormena eta berrikuntzarekin lotutako ekitaldiak antolatzen dituen NetDay enpresa sortu zuen Alvaro San Martín. Halaber, Vicente del Bosque futbol entrenatzailea ere bertan izan zen, enpresa munduan eta eliteko kirolean arrakastarako dauden baloreak azpimarratuz: ahalegina, motibazioa, lidergo ahalmena eta talde lana.
.

Tenperatura erregulatu

2011-06-10T08:18:00.001-07:00

Negozio berriei buruzko Spingwise aldizkari bikainaren azken alean, hainbat ideia interesgarri daude, edozein lekutan ezartzeko modukoak. Beste batzuk ostera, sarrera atalasea dute teknologian, eta nekezagoak dira. Horietako bat harri termodinamikoena da, edarien tenperatura erregulatzeko balio dutenak: gure gusturako edaria beroegia dagoenean hoztu egingo dute, eta ondoren larregi hozten denean berotu. Joulie-ak deitu diete harritxoei.

Joulie bakoitzak herdoilezinezko altzairuzko oskol mehe eta hutsa du, tenperatura arintzen duen material berezi batez betea. Tamaina berdineko izotz-puska baten baino %50 astunagoa da soilik, eta hondoratu egiten denez, erabiltzailearen bistatik desagertzen da. Norberak ikusiko du zenbat Joulie bota likidora, eta hauek bertako beroa azkar bereganatuko dute, edateko tenperatura egokira ailegatu arte. Ondoren, lortutako energia hori apurka aske uzten joango dira, ahalik eta denbora gehienean tenperatura onena mantentzeko. Benetan ideia interesgarria da, kontutan hartzen bada egunero 2.250 milioi kafe kikara hartzen direla.
.

Diseinuarekin komunikatu

2011-06-08T06:53:00.001-07:00

Aste honetan Steve Jobs ekintzaile ospetsuak “Cloud computing” edo interneteko lainoa aurkeztu du, hots, Apple-ko iCloud-a. Zerbitzaria bazterrean utzita, artxibo guztiak laga ditzakegun armiarma-sarea da. Internet arloan gaia ezagun samarra denez, aurkezpenerako aitzakia lainoan musika eskegitzearen aukera izan da. Egiten ari naizen azken liburuan, “Negozio Planaren egitura” izenburukoa, adibide bezala ipiniko dut gai hau, diseinu industrialaren arloan. Gai batzuetan Steve Jobs artista paregabea da, diseinuaren eremuetan bereziki. Diseinatzeko erarik egokienetako bat Elkarturiko Ingeniaritza da, eta bere metodologiak honako urratsak ezartzen ditu:
* Merkatuaren premiak identifikatu,
* Aukera ezberdinen hautaketa,
* Diseinu industriala,
* Testatua, eta
* Diseinu mardula.

Diseinu industrialaren puntuan, “Produktuaren diseinua eta garapena” liburu bikainean Karl T. Ulrich eta Steven D. Eppinger-ek diotenez, bost helmuga erabakitzaile landu behar dira:
- Erabilgarritasuna. Pertsonen interfaseak produktuarekin ziurrak behar dute izan, erabiltzeko errazak, e intuitiboak. Ezaugarri bakoitzak erabiltzaileari bere funtzioa adierazteko itxura izan behar du.
- Irudia. Itxura, diseinua, proportzioa eta kolorea, produktuari irudi atsegingarria emateko erabiltzen dira.
- Mantenu errazekoa. Produktuaren diseinuan kontutan hartu behar da nola egiten den mantenua eta konponketa.
- Kostu apalak. Itxurak eta ezaugarriak garrantzi handia dute ekipamendu eta ekoizpen kostuetan, eta horregatik diseinu taldeak kontutan hartu beharko ditu.
- Komunikazioa. Enpresaren filosofia eta zeregina adieraziko dituzte diseinuek, produktuen begi-bistako ezaugarrien bidez.
Baina Applen produktu teknologikoen arrakastaren arrazoia ez da berritzaileenak direlako, edo merkatura irtetzen lehen produktuak direlako. Arrakastaren muinean diseinu erakargarriak daude, eta jada dauden teknologiak uztartzen jakitean.
.

20 aholku gehiago saltzeko

2011-06-03T03:40:00.000-07:00

'Ekintzaileak’ aldizkari bikainaren hil honetako alean, erdiko dossierra honakoa da: “Salmentak hobetzeko 20 aholku”. Oso gomendio interesgarriak direnez, hona ekarriko ditugu:

1- Dituzun bezeroei saldu. Betiko bezeroetan aurkitu behar da errentagarritasuna. Bezero berriak berankortasun arriskua igotzen dute.
2- Bezero berriak lortu. Itxaroten jakin behar da. Bezero berriek hilabeteak eman ditzakete erosteko erabakia hartu aurretik.
3- Gustatzen ez bazaizu, ez ordaindu.
4- Telefono bidez ere oraindik egiten dira salmentak.
5- Konpromiso gutxiko lehen salmenta bat.
6- Prezioa ROIren arabera ezarri - Return On Investment edo Inbertsioaren itzulkina.
7- Bezero izarrei konbentzitu.
8- Beste batzuk gomendatu.
9- Ez erostearren beldurrari aurre egin.
10- Aurrekontu eskasia bati kontra egin.
11- Bezeroari ez erakutsi gailentasunik.
12- Zergatik zurea erostea merezi duen aztertu.
13- Potentzial handiena duten bezeroak bisitatu.
14- Ez jarri arreta soilik produktuan.
15- Hitz positiboak erabili.
16- Une egokia da atzerrian saltzeko.
17- Salmenta-kanal berriak bilatu.
18- Prezioen politika garbia erabili.
19- Taldeari gehiago saltzen lagundu.
20- Desioetan jarri arreta, ez premietan.
.

Peter Pan sindromea

2011-06-01T06:25:00.000-07:00

Interes handiz jarraitzen dudan blogetako bat, ideia bikain asko ematen didalako, Juan Carlos Cubeiro miretsiarena da. Eurotalent-eko sortzailea da, eta estatu mailako coatx-ik ospetsuenetakoa. Atzoko postean “Peter Pan sindrome” ezaguna aipatzen zuen, eta enpresaren arloan horen ondorioetako bat ausardia eta garapena mugatzea izaten da. Ekintzailea lortutakoarekin konformatu egiten da, sektoreko handiekin lehiatzeko asmorik gabe, edo globala izateko anbiziorik gabe. Blog honetara jadanik ekarri genuen “Lindberg efektua”ren erabat aurkakoa da, hemen enpresaria garrantzitsuena sentitzen baita.

Negozio Planetan ohikoa da salmentak eta erosketak estatu mailan soilik aurreikustea lehen hiru urtetan, planteamendu kontserbadore bat erabiliz. Eta nahiz emaitza onak izan, ez da ausartzen atzerrira irtetzen, edo negozio globalizatzen. Gaur egingo mentalitatearekin konformista da, eta ekintzailea eroso dago ezagutzen duen ingurunean. Psikologo batzuk diotenez, ezaugarri hori pertsonalki ere ematen da, hots, hazteko beldurra. Baina negozioetan, edozein dela ere produktua edo zerbitzua, J.C. Cubeirok egoki dioenez, aurrera ez bazoaz, etzera egiten duzu.
.

Kanpalekua lorategian

2011-05-27T07:26:00.001-07:00

Negozio ideia berrien Springwise aldizkari bikaineko azken alean, gure artean gutxi hedatuta dagoen ideia bat argitaratzen dute: kanpistei norberaren lorategiko edo etxe ondoko zelaian txoko bat alokatzea. Duela hilabete batzuk Circa Parkea negozioaren ideia azaldu zuten, non garajeen jabeek alokairuan jartzen zituzten beraiek kanpoan zeuden egunetan. Oraingoan, antzerako kontzeptua ezartzen dute lorategietan, campinmygarden web orriaren bitartez. Une honetan, Britainia Haundiko Brightoneko kontzertura doazenei egiten die eskaintza.

Web gunea apirilean ipini zuen abian, eta bertan lorategien ugazabei izena emateko eskatzen die, bertan jartzeko izan dezaketen eskaintza, lorategiko zati bat kanpaleku bihurtuz. Argazkiak agertzeaz gain, deskribapen laburra dator, eta instalazioen deskribapen laburra, hala nola dutxak, korronte-hartuneak, wifi konektibitatea, barbakoak eta aparkalekuak. Halaber, inguruko dendak eta garraio publikoko geltokiak agertzen dira, eta libre dauden egunak zein pertsonaka kostatzen dena. Honelako kanpaleku baten bila dabiltzanak, kokapenaren arabera bila dezake, eta beste erabiltzaile batzuen iritziak ikus ditzake. Gure inguruan nahiko erraz ezarri daiteke negozio ideia hau, eta zalantzarik ez dugu laster ikusiko dugula zerbitzu berria gure artean.
.

Auto-estimua eta langabezia

2011-05-25T07:02:00.001-07:00

Langabezian dauden pertsona batzuekin sormen tailer bat egiten gabiltza. Taldea bikaina da, eta hasiera hasieratik esan nien estatuko eta munduko langabezia ez dela langabetuen erruz, baizik eta sistemaren beraren eraginkortasun ezagatik. Adibide bezala, gaur bertan OCDE-Kooperazio eta Garapen Ekonomikoaren Erakundearen idazkari nagusia den José Angel Gurríak Parisen esan duenez, gobernuek berrikuntza sustatu behar dutela langabeziaren arazo larriari irteera bat emateko: “Kezka dago epe luzeko langabeziak horretan dirauelako, eta arazo larria da”. Erakundearen 31 estatuetan, 50 milioi pertsonatik gora langabezian daude. “Munduko ekonomiarentzako oraingoa une larria da, eta krisia ez da amaituko gure ekonomiek nahiko lanpostu sortu arte. Garapen iturri berriak aurkitu behar dira, eta hor berrikuntzak zeresan handia du”

Sormen tailerrean, taldekako 4x4x4 eta Delphi sormen tresnekin egin dugu lan. Parte-hartzaile batzuk dituzten auto-enplegu proiektuetan, ideia berriak ematen saiatu gara. Ekarpenak jaso eta sailkatzeko garaian gaude, eta emaitzak benetan pozgarriak dira. Hasieran, arazo estrukturalek ezin dizkigutela ahalmena murriztu azpimarratu nien, eta negozio errentagarriak sortzeko altu egin behar dugula hegan. Bestalde, management-eko guru ospetsua den Tom Peters-i jarraituko diogu. Etorkizuneko enpresa arrakastatsuak bi ezaugarri, “L” eta “T”, dituzten pertsonek kudeatuko dituztela dio: Lana egiteko ahalmen handia, eta negozioetarako Talentua. Horretan jarraituko dugu.
.

Barne-ekintzailearen CVa

2011-05-20T07:29:00.001-07:00

MIT Sloan Management Review aldizkari bikainaren azken alean, “Why Every Project Needs a Brand. And How to Create One.” (Zergatik proiektu bakoitzak bere marka behar duen. Eta nola sortu bat) artikulu interesgarria dator, Karen A. Brown, Richard Ettenson eta Nancy Lea Hyer-ek idatzita. Barne-ekintzailearen arabera izango duela proiektuak arrakasta diote. Egiten duten galdera nagusia honakoa da: “Barne-ekintzaileek nola lortu dezakete bere proiektuentzako arreta, baliabide eta laguntza egokiak?

Ondorio hauetara heltzen dira:
- Barne-ekintzaileek beraien mezuak baliabideak banatzen dituzten arduradun jakinei bideratu behar dizkie, denboran ondo sekuentziatuta.
- Proiektuari marka ezartzeak arrakastarako lagungarria izango da, barnean behintzat.
- Markaren kudeaketaren oinarri tradizionalak erabiltzean dago gakoa, bai planifikatzeko garaian, zein garapenean, jaulkipenean eta proiektuaren ekimenean.
.

Ez zara sortzailea? Pentsatu berriz

2011-05-18T02:41:00.001-07:00

"Mind Tools Newsletter” (Adimenaren tresnen aldizkaria) bikainaren azken alean, sormenari buruzko hiru artikulu interesgarri datoz:
- Sortzailea zara? test bat,
- TRIZ tresna, arazoak sormenarekin konpontzeko, eta
- Ideia berrien sorkuntza.

Hamasei galderen testak auto-ebaluatzeko balio du, eta hemen jasoko ditugu interesgarriak iruditzen zaizkigun gogoeta batzuk:
- Lanean sortzailea izateak ez du zerikusirik talentu artistikoarekin. Arazoei irtenbide berriak eta berritzaileak aurkitzea da, eta egiten ditugun gauzetan hobekuntzak ezartzea. Beraz, edozein izan daiteke sortzaile, baldin eta mentalitatea egokia bada eta tresna baliotsuak erabiltzen ditugu.
- Lantokian, normala denez pertsona batzuk sormen gehiago dute beste batzuk baino. Hala ere, horrek ez du esan nahi denok ezin dugunik sormenagoak izaten ikasi, eta geure eguneroko bizitzan sormen tresnak erabili
- Funtsean, sormena gauza arruntak argi berri batekin ikusteko ahalmena da, eta lehen urratsa sormenagoa izateko entrenamendua da. Gure inguruko prozesu zein sistemak hobetzeko aukerak bilatzea da.
- Ondoren, informazioa laburbildu, arazoen zio nagusia aurkitzeko, eta ideiak sortu eta ebaluatzeko. Eta ez da ahaztu behar ideien ezarpen praktikoa dela, benetan sortzailea izatearen gakoa.
.

Felix Revuelta,

2011-05-13T10:03:00.001-07:00

Emprendedores aldizkari bikaineko maiatzeko alean, Felix Revueltari egiten diote elkarrizketa nagusia. Estatu mailako ekintzailerik ospetsuenetakoa da, eta Naturhouseko sortzailea. Gaur egun 8000 enplegatu ditu, zuzenak zein zeharkakoak, eta 1850 inguru denda 40 estatutan banatuta, bereziki Italian, Frantzian, Portugalen eta Polonian. Hemen, bere eskarmentuan oinarritutako iritzi batzuk jasoko ditugu:
- Arrakastaren giltzarrietako bat, bere ereduan %50 zerbitzua eta beste %50 produktua dela dio. Baina zerbitzuen ereduak kopiatu egin daitezke, eta jadanik saiatu dira horretan. Abantaila nagusia bigarren alorrean dago: produktu esklusiboak eskaintzen ditu oso prezio lehiakorrean, beraiek ekoizten dituztelako.
- Lehiatu ahal izateko, sektoreko onena eskaini behar da, ahali keta preziorik txikienean. Binomio hori kalitatea hobetu zeta kostuak jaitsiz lortzen da. Lehena zerbitzu pertsonalizatua eskainita lortzen da, eta bigarrena berriz, produktuaren eta kontsumitzaileen artean bitartekariak kenduz.
- Ezin da ekintzaile izan sektorea ezagutu barik. Aditua izatea lortu behar da, eta merkatu guztietan dauden zirrikituak aprobetxatu.
- Ideiak ez dira bulegoan bilatzen, jakina. Kalean egonda, ibiliz, behatuz, munduan egon eta begiratuz sortzen dira ideiak. Ondoren, ideia horiekin eta errealitatearekin amalgama bat egiten da, zerbait sortzeko.
- Negozio ereduak aldakorrak izatea komeni da. Eta negozioarekin batera eboluzionatu, froga-hutsegitea ereduan sinetsiz.
- Ekintzaile bat etengabe arituko da negozioa birmoldatzen; ezin da konformatu.
- Porrota lehen harria da arrakastaren bidean. Ekintzailearen bizitza ibilbide horretan eraikiko da, porrota izaten eta jaikitzen. Aurrera egiteko bide bakarra da.
- Lehen lan finkoa 24 urterekin utzi zuen, eta bigarrena 38rekin. 64 urterekin, ez du inolako beldurrik berriro hasteko. Hori da bere gaztetasunaren giltzarrietako bat.
- Enpresa-talde handi baten atzean beti pertsona-talde bat dago. Horregatik aukeratzen ditu pertsonalki filial guztietako zuzendariak
- Helburu bat izan behar da, eta helburu hori anbiziozkoa izatea hobe. Orain Europako lehena izatea nahi du, eta horretan dabil.
.

Aurkezpen eraginkorrak

2011-05-11T06:49:00.000-07:00

Joan zen hilean egin genuen Negozio Planari buruzko tailer bateko partaideak Kaliforniano Silicon Valley mitikoan izan dira, ekintzailetasun arloan mundu mailako lurralderik bisitatuena. Tailerrean behin eta berriz berrikusi genuen “Elevator pitch”, edo Igogailuaren diskurtsoaren aurkezpen tipikoak. Bereziki networking-etako bilera informaletan erabiltzen da, eta baita finantzaketa errondatan. Ekintzaileak 55 segundotan entzulearen interesa piztea lortu behar du. Horretarako, aldez aurretik negozio berriaren lauzpabost ideia giltzarri landu beharko ditu, hala nola balio erantziaren ekarpena, zertan desberdintzen den merkatuan jadanik dagoenarekin, merkatuan eskuragarri dagoen txokoaren deskribapena, eta kapitalaren premia zein itzultzeko aurreikuspena.

Ekintzailea gai ez bada entzuleari mezu garbi eta zehatza azaltzeko, eta aspertzen hasten bazaio, logikoki inbertitzaileak, edo “business angel”ak, gaia ez duela menperatzen pentsatuko du. Eta zerrendako hurrengo ekintzailearen zain geratuko da. Berdin gertatuko da bilera informaleko Zuzendari Nagusi edo CEO-arekin, eta ziurrenik ez dio Negozio Planaren paperezko bertsiorik eskatuko. Komunikazio arloan aditu bikainak badaude, Monica Perez de las Heras-en tankerakoak, liburuak idatzi eta coaching egiten dutenak aurkezpen eraginkorrak nola egin jakiteko. Gai honi merezi duen denbora eskaintzea oso praktikoa da, negozio berriaren ideia egoki aurkeztea erabakigarria izan daitekeelako. Hala eta guztiz, gaizki atera daiteke, noizean behin Steve Jobs edo Bill Gates ekintzaile ospetsuei gertatu zaien bezalatsu. Desberdintasuna zera da, beraiek ospea jadanik irabazia dutela, eta ekintzaile berriak agian ez duela bigarren aukerarik izango. Baina behintzat, kontsolatzeko balioko du.
.

Ekintzaile arrakastatsuen gomendioak

2011-05-06T06:03:00.001-07:00

Herenegun ekintzailearen eguna ospatu zen mundu osoan, eta nire gustukoenetako ekintzaile teknologikoa den Martin Varsavsky-k bere posta eskaini zion ohikoak dituen maisutasuna eta sen onarekin. Bere esperientzian oinarritutako bederatzi gomendio oparitzen dizkigu, eta bi lotura bikain eskura jartzen dizkigu: bata Reid Hoffman ekintzaile ospetsuarena, inbertitzaile pribatua edo “angel investor” dena, eta baita LinkdIn eta Fast Company-ren ko-fundatzailea. Eta bestea, 2010eko arrakastaren 10 negozio eredu , xehetasun garrantzitsuenak bikain azalduz.

Varsavsky-ren gomendioak bere blogean irakurri daitezke, eta hemen Hoffman-enak jarriko ditugu, itzulita:
1- Aldaketa sakon bat bilatu. Aldaketa handia eta desberdina da? Adibidea: Skype.
2- Handia bilatu. Etxe inguruan ibiltzeko enpresa eraikitzea bada edo mundua aldatzekoa, neke, sufrimendu eta odol berdina kostatuko zaizu.
3- Enpresa handitzeko sare bat sortu. Ekintzaileari lagundu dakion adimen banatuaren biltegi bat da zarea. Zuzendari eta inbertsori mailan da garrantzitsua bereziki.
4- Zorte onerako eta txarrerako planifikatu. Aukera zure bidean gurutzatuko da, eta itzuli egin beharko zara bertara ailegatzeko. “B” planak egitea errazagoa da.
5- Pertseberatu malgutasunez. Jakin egin behar da noi pertseberatu, noiz malgua izan, eta noiz bien arteko oreka mantendu.
6- Negozio berria agudo sortu, norbera ere harrituta geratzeko. Ziurrenik gauza askotan oker arituko zara, eta besteen iritzia jakitea komeniko zaizu. Perfekzioa mito bat da. Eta ez gutxietsi denboraren garrantzia.
7- Handinahia izan, baina norberaren auto-estimutik edan gabe. Adiskideak bilatu, umea itsusia noiz den esango diotenak.
8- Produktu berri batentzako ideia edukitzea ona da. Baina hobea oraindik produktu horren banaketarena.
9- Norberaren kulturari jaramon egin. Hasieratik arreta handia jarri behar da jendearen kontratazioan.
110- Gomendio hauek ez dira naturaren lege bat. Zuk alda ditzakezu.
.

Bikaintasunaren nahian

2011-05-04T02:44:00.001-07:00

Gaurkoan kalitatearen kudeaketa negozio plan baten sartu ala ez eztabaidatzen aritu gara. Batzuetan harrotasuna dela emango du, produkturik eta merkaturik ez direnean finkatu, kalitatearen ebaluaketan sartzea bost urtetako aurreikuspenean. Basi produktu mailan ISOak baliatuz, bai kalitate osoan edo bikaintasun mailan, EFQM eredua erabiliz. Azkenean, baietza erabaki da.

Produktu mailan, eskaintzen diren produktu eta zerbitzuen kalitatea bermatzea da gakoa. Hau da, produktuaren ezaugarriak eta propietateak bere erabilerarako egokituak dauden ala ez ziurtatzea. ISO 9.000 eta 14.000 ziurtagiriak noiz aterako diren esango dela adostu dugu. Eta sektore industrialaren arabera, nor izango den egiaztatuko duen erakundea. Orokorrean AENOR-Espainiako Normalizazio Agentzia erabiliko da, edo kasu batzuetan nazioarteko erakunderen bat, TÜV Rheinland multinazionalaren tankerakoa.

Negozioari buruz berriz, EFQM europar kalitate osoko edo bikaintasuneko eredua garatuko da azaletik. Bere mamian, erakunde batek nola asebetetzen duen bezeroen, enplegatuen, finantza erakundeen edo orokorrean gizartearen beharrak azaltzen du. Eta horretarako, honako arloak aztertzen ditu:
- Emaitzengana bideratu,
- Bezeroengana bideratu,
- Lidergoa eta helburuetan iraunkortasuna,
- Prozesuetan eta ekintzetan oinarritutako kudeaketa,
- Pertsonen garapena eta inplikazioa,
- Ikaskuntza, berrikuntza eta etengabeko hobekuntza,
- Itunen garapena, eta
- Giza erantzukizuna.
.

Langabezia: Alemaniako hirukoitza

2011-04-29T00:19:00.000-07:00

Gaurko El Pais egunkariak Espainiako eta Alemaniako langabezi tasen artikulu interesgarri bat dakar. Laguntzen dion grafikoan, garbi ikusten da 2077ko bigarren seihilekoan krisia hasi zenean, langabeziaren indizeak paretsuak zirela estatu bietan, % 8 ingurukoak. Lau urteren ondoren, Espainian % 20,33ra igo da, Alemanian % 7,1ra jaitsi den bitartean. Duela 19 urte alemaniarren bateratzea egin zenetik, ehuneko txikiena. Zenbakietan, Alemanian hiru milioi baino langabetu gutxiago daude, eta Espainian kopurua bost milioira ailegatzear dago, populazio aktiboaren tasa txikiagoa izan arren.

Alemania ondo hornituta ailegatu zen krisira, erreforma sakonak eginda lan merkatuan, osasungintzan eta pentsioetan. Baina tuneletik ateratzeko, industriak esportatzeko duen ahalmen ikaragarrian oinarritu da. Eta bere produktuentzako eskaera, azaleratzen ari diren merkatuetan aurkitu du. Sektore industrial gehienak ondo dabiltza Alemanian, baina bereziki automobilgintzarenak egiten du trakzio lana. Bestalde, etorkizuneko aurreikuspenak ere baikorrak dira. Ikasi dezakegun gaietako bat, BEG (Barne Ekoizkin Gordina) positiboa duten merkatuak bilatzearena da, lokalismoetan geratu gabe, erosoak izan arren.
.

Ekintzailea moldeatzen

2011-04-27T23:53:00.001-07:00

Bere burua mundu mailako onena dela dioen Kauffman amerikar fundazio ospetsuko azken liburuan, “Typecasting the Entrpreneur” (Ekintzailea moldeatzen) artikulu interesgarria dator. Steve Blank egilea, kontsultaria eta Berkeley, Stanford eta Columbian irakaslea da. Bere sekulako CVan, 21 urteko enpresagintzako esperientzia dago, oinarri teknologiko zortzi enpresa sortuz denbora horretan, erdieroaleen eta ordenagailuen periferikoen arloetan. “Ekintzailetasuna” modan dagoen hitza dela dio, “Globalizazioa” dagoen bezala, eta sarri, pertsona desberdinentzako bestelako esanahiak adierazten dute.

Horregatik, Blankek sailkapen interesgarri bat ezartzen du:
- Negozio txikien ekintzaileak: oso langileak izaten dira, eta moldakorrak.
- Hazkunde ahalmen handia duten startup edo negozio berriak: hazteko jaiotako pertsonak dira.
- Enpresa handietako ekintzaileak edo barne-ekintzaileak: aukerak, berritzea edo desagertzea dira.
- Non profit edo irabazi asmorik gabeko giza-ekintzaileak: gauza ezberdinak egiteko premia izaten dituzte.
.

Lidergoaren hiru ezaugarri

2011-04-22T05:00:00.001-07:00

Aste honetan zerbitzu sektoreko aktibitate berri baten Negozio Plana aztertzen aritu gara. Eta ohi bezala, negozio berri bateko bi atal nagusietan sakondu dugu:
- Ekintzaile edo eragilearen CVan, hots, ekimenaren atzean nor dagoen, nolako eskarmentu aduen, jadanik antzerako proiektuetan parte hartu duen ala ez, porrota jasan duten proiektuetan ibilitakoa den, prestakuntza eta eskarmentu nahiko dituen, inoiz talde bateko buruzagia edo liderra izandakoa den,etab.
- Ustiapen kontua, bereziki bost lerro erreferenteetan sakonduz, hau da, salmentak, kostu proportzionalak, marjina gordina, kostu finkoak, eta salmentekiko emaitzen ehunekoa.

Lehen arloan, managementeko guru ospetsua den Tom Peters-en “Gauza txiki handiak: 163 trikimailu bikaintasuna lortzeko” liburuko 83. puntua izan dugu kontuan. Berak dioenez, proiektu bat aurrera eramateko, koordinatzaileak liderraren hiru ezaugarri izan behar ditu, sarri askotan pertsona berdinean ematen ez direnak. Honakoak dira:
1- Ameslaria, proiektuan erabat sinesten duena, eta “24/7”an bera saltzen aritzen dena, merkatuaren sektoreko bazter guztietan,
2- Sarearen kudeatzailea, “ekosistema politikoa” sortu eta kontrolatzen duena, eta gauzak egin ahal izateko jendea erlazionatzen duena, eta
3- Burokrata, aurrekontuetarako bizi dena, eta baita taldearen eguneroko eraginkortasuna finkatzeko behar diren mila eta bat xehetasunetarako.
.

Aldizkari digitala

2011-04-20T23:38:00.001-07:00

Springwise negozio berrien aldizkari bikainaren azken alean, berrikuntza bat argitaratzen da: “Cross-platform digital magazine adapts to the reader's device” (Plataforma gurutzatuko aldizkari digitala irakurlearen gailura egokitzen da) Toronto Standard webean oinarritutako aldizkari berri bat da, eta zerotik izan da diseinatua plataforma digitaletara egokitzeko, automatikoki egokituz irakurlearen ikuste gailura.

“Diseinu likidoa” du, eta ondorioz edukiaren tamaina osoa alda dezake, berrantolatuz eta automatikoki ikuslearen gailuaren egitura lehenetsiz, telefono adimentsua izan, edo tableta zein pantaila handiko ordenagailua. Auto-lekualdaketa prozesua bera ere, irakurlearen hardwarera egokitzen da, eta ordenagailu batena bertikalki mugitzen diren bitartean, gailu mugikorretan horizontalki egingo dute. Irakurlearenganako auto-moldaketa honek prentsa on-lineko belaunaldi berri batera darama, eta etorkizunean imitatzaile ugari izango ditu.
.

Sormena piztu

2011-04-15T08:28:00.001-07:00

McKinsey Quarterly argitalpen bikainaren azken aleak, neurozientzian aditua den Grgory Berns psikiatraren artikulu interesgarri bat dakar: “ Sparking creativity in teams: An executive’s guide” (Taldeetan sormena piztuz. Zuzendaritzaren gida). Dioenez, sarritan sormena pribilegiatu gutxi batzuen ezaugarria dela esaten da, baina pertsona guztiak zein taldeak sormen ekarpen handiagoak egin ditzakete, garapena eta errendimendua suspertzen ahaleginduz. Hain zuzen ere, talde korporatiboekin eskarmentu handia du, bai goi mailako zuzendariekin zein bezeroei arreta zerbitzua ematen dizkietenekin. Eta enpresak teknika nahiko errazak erabili dezaketela uste du, edozein mailatako enplegatuen sormen-ekarpena gehitzeko.

Gakoa pertzepzioan zentratzean dago. Neuro-zientzialari ospetsuentzat, pertsonen burmuinaren sormenarekin zuzenean lotua dago. Gauzak era desberdin baten nabaritzeko, Bernsek dioenez, burmuina inoiz ezagutu ez dituen gauzekin bonbardatu behar dugu. Honelako berrikuntza bat nahitaezkoa da, burmuinak eraginkortasunera eboluzionatu duelako, ohiko eran erantzunez energia aurrezten duelako. Ohi bezala jasotzea informazioa, eta horren pertzepzioak, energia gutxi eskatzen du burmuinean. Soilik burmuinean sailkatzen desberdin bat sortzen bada informazioaren pertzepziorako, ohiko pentsaeren jokabide-ereduetatik urrunduz, burmuina sormen berrikuntzak irudikatzen hasiko da. “Iconoclast” best-sellera argitaratu zuen berriki Bernsek, eta erabakiak hartzerakoan sistema neuronalak nola aritzen diren aztertzen ditu laborategian, ordenagailuen irudi funtzionalen teknikak erabiliz. Gaiari neuro-ekonomia deitzen diote.
.

Merkatu kuota

2011-04-13T02:58:00.000-07:00

Gaur Negozio Plan bateko marketing planeko helburu kuantitatiboak aztertzen aritu gara. Ekintzaileak negozio berri baten marketing planari ekiten dionean, orokorrean nola bideratuko duen azaltzen du, eta zenbakiak amaierarako uzten ditu. Gure ustez, ziurrenik alderantziz izan beharko litzateke. Hasieran jarri helburu kuantitatiboak, lortu beharreko xedeak, eta ondoren nola lortuko diren azaldu. Errealitatearekin konpromisoa helburu neurgarriak ezartzerakoan dator, denboran erraz alderatu daitezkeen zenbakiak, gero desbideratzeak aztertzeko. Helburu kuantitatibo horien artean, xehetasunetara jaitsi gara honako arlotan:
- Salmenten helburuak,
- Merkatu kuotaren parte-hartzea,
- Marjina gordinak, eta
- Bezeroen fideltasuna.

Ildo horretan, merkatu kuotaren parte-hartzean hain zuzen, McKinsey&Company kontsultari amerikar ospetsuak “Garapenerako errepide orri berria marrazten” azterketa argitaratu du berriki. Bertan, 2007tik 2011rainoko edozein tamainako 700 enpresen garapena aztertu du. Garapenerako hainbat eragile eta beraien lan egiteko era aztertu ondoren, hiru ondorio nagusietara ailegatu da:
1 - Bide anitzetatik aritzea garapenaren bila, egokiagoa da bide bakarretik baino.
2- Merkatu berrietan saltzen dituzten enpresak, edo merkatu berrietan saltzen dituzten enpresen hornitzaileak direnak, gehiago hazten dira ekonomia egonkorretan ari direnak baino.
3- Enpresa txikienak merkatu kuota handituz hazten dira.
.

Finantziazio herrikoia

2011-04-08T00:59:00.001-07:00

Kultura arloko enpresa berrien finantziazio herrikoia, edo crowdfunding, da proiektu erakargarrienetako bat, aste honetako Springwise negozio berrien ideien aldizkari bikainaren aleak dakarrena. Finantzazio eredu hau dagoeneko erabilia izan da sektore ezberdinetan, hala nola giza-enpresetan, garagardo ekoizleetan, telekomunikazioetan, interneteko start-upetan, etab. Suedia CrowdCulturen bitartez, ideia eta proiektu kulturalak finantzatzeko plataforma bat eratu dute, bazkide bakoitzak 50 koroako inbertsioa eginaz. Proiektuak oso mami desberdinekoak dira, eta dantza, antzerkia eta txotxongiloak barnean daude, besteak beste.

Dagoeneko 500 pertsonak hartu dute parte 28 proiektuetan, eta horietatik seik behar zuten finantzazio osoa lortu dute. Arrakasta erabatekoa izan denez, Stockholm-eko udalak proposamena luzatu dio laguntzaile iraunkorra izateko. Horrek proiektu berrien garapenean lagunduko du, nahiz eta oraindik hasierako fasean egon. Sektore eta lurralde gehienetara garatu daitekeen eredua da, eskatzen inbertsio partikularra nahiko txikia delako. Jakina da, diru guztia ipiniko duen bazkide bakar bat lortzea errazagoa litzatekeela, baina aukera berri honek ere izan dezake bere garapena.
.

Semco

2011-04-06T08:08:00.000-07:00

Gaur mundu mailako enpresarik sortzaileenetako bat aztertzen aritu gara: Semco brasildarra. 1953an sortu zen, olio begetalen industriarentzako zentrifugatzaile ekoizle bezala, eta gaur egun 3.000 enplegatu dituen enpresa talde bat da. Bere goiburua berrikuntza da, baina ez ditu jarraitzen beste enpresa batzuen arauak: proiektuetan soilik egiten dute lan, askatasun handiz, hierarkia zein formalitate barik, eta elkarrenganako errespetu handiz, jende guztiak tratu berdina jasoz.

Semcon oinarrizko hamar printzipio dituzte, enplegatu guztiak jarraitu beharrekoak:
1- Enpresa fidagarria eta segurua izatea.
2– Zintzotasuna eta gardentasuna beste aldi baterako interes batzuen gainetik baloratzea
3– Epe motzeko eta luzekoen arteko onuren oreka bilatzea.
4– Produktuak zein zerbitzuak bidezko prezioetan eskaini, merkatuko onenak bezala hartuak izan daitezen bezeroengandik.
5– Zerbitzu bereiziak eman bezeroei, erantzukizuna lehenetsiz mozkinei.
6– Sormena sustatu, ausartei laguntza eskainiz.
7– Guztien parte-hartzea bultzatu, eta goitik behera inposatzen diren erabakiak zalantzan jarri.
8– Giro atsegina eta informala mantendu, jarrera profesionalaz eta aurreiritzi gabekoaz.
9– Lan baldintza seguruak mantendu, eta pertsonak zein ingurumena babesteko ekoizpen prozesuak kontrolatu.
10– Akatsak onartzeko apaltasuna eduki, eta beti hobetu daitekeela ulertu.
.

Custo Dalmau

2011-04-01T06:59:00.000-07:00

Apirileko "Ekintzaileak" aldizkari bikainean, Custo Dalmau ekintzaile miretsiari elkarrizketa bat egiten diote. 2004an Bartzelonako Ed. Gestion 2000k argitaratu zidan “Nola sortu enpresa bat” liburuan eredu bezala jartzen nituen 89 ekintzaile erreferenteen artean zegoen. 1981an Custo eta David bere anaiak lehen kamisetak diseinatzen hasi zirenean, estatuak inor kez zuen antzekorik ezer egiten. Nahiz eta krisia egon, azken bost urteetan etengabe hazi dira, iazko urtean 90 milioi euro saldu zituztela. Kazetariak bere bertute nagusiaz galdetzerakoan, zera dio “Sakrifizio ahalmena eta diziplina”.

Arrakastaren giltzarrien artean, ondorengo hirurak aipatzen ditu:
- Salmenta toki egokiak: joera sortzen duten salmenta tokietan egotea beti, hasieran Bartzelonan eta ondoren New Yorken.
- Nazioartekotasuna: merkatu guztietan saldu. 70 denda zabaldu ditu mundu osoan.
- Esentzia mantendu: jendeak jakin dezala Custo dela, etiketari begiratu gabe.
.

Frankiziak edo nodoak

2011-03-30T08:17:00.000-07:00

Aste honetan amaitu dugun sormen tailerrean, proiektuetako bat etxeko konponketak egiten dituzten profesionalen gremioak elkartzeko nodo bat egitearena izan da. Giltzarria, web orri interaktibo baten bitartez lortutako harremana izango zen, profesionalak eta bezeroak bertan aurkitzeko aukera izango zutelako. Nodo edo frankizia horretako partaide bilakatzea kalitatearen eta profesionaltasunaren adierazle izango zen. Proiektua hasierako fasean dago, ohiko arlo ezezagunekin, eta balioa emango duen benchmarking bate egiteko, errespetu handiz jarraitzen ditudan bi helbide eman dizkiot: Rusticae estatuarra eta Jim’s Goup australiarra.

Isabel Llorens eta Carlota Mateos ustekabean ezagutu ziren Londoneko aireportuan, eta beraien adiskidetasunetik sortu zen Rusticae. Hasiera zaila suertatu zitzaien, baina gaur egun 200dik gora hotel berezi dituen klub bat da, landan zein hirian, esperientzia ahaztezinak bizitzeko. Espainian, Portugalen, Marocon eta Argentinan hedatu dute sarea. Sustatzaile biak ospetsuak dira honez gero, eta oso ezagunak ekintzailetasunaren arloan. Beste alde batetik, Jim Penman egun erdiz lorezain hasi zen lanean, historiako doktoretza ordaindu ahal izateko. Negozioa gustatu egin zitzaion, eta handituz joan zen, 1989an Jim’s Group izenarekin frankiziatzen hasi zen arte. 2.900 frankizia baino gehiago ditu dagoeneko lau estatu anglosaxoietan, Australia, Zeelanda Berria, Britainia Handia eta Canada, eta urtero 200 inguru gehitzen zaizkio.
.

Proiektuen sareak/taldeak

2011-03-25T04:22:00.000-07:00

MIT Sloan Management Review aldizkari bikainaren azken alean, Jonathon Cummings eta Carol Pletcher-ek artikulu interesgarri bat argitaratu dute: “Why Project Networks Beat Project Teams” (Zergatik proiektuen sareak proiektuen taldeak gainditzen dituzten). Bere mamia, blog honetan hainbestetan aipatutako Delphi sormen tresnaren haritik doa, eta baita berrikuntza irekiaren metodoarenetik. Egileek egiten duten galdera honakoa da: Erakundeek nola lagundu ditzakete beraien taldeen emaitzetan, proiektuak konplexuak direnean? Artikulu osoaren azpian dagoen ildoa, kanpotik taldeari ideia berriak ekartzean datza, eztabaidak zein irtenbideak aberasteko.

Beraien azterketetan hiru arlo jorratu dituzte:
1- Produktuaren edo zerbitzuaren berrikuntzarako proiektuen sarea.
2- Bezeroaren zerbitzurako proiektuen sarea.
3- Hobekuntza operatiborako proiektuen sarea.

Ondorio bezala, zera ezartzen dute:
- Taldeko partaideak beraien sare pertsonalak erabiltzen badituzte, taldeak informazio eta iritzi baliagarriak jaso ditzake “funtsezkoak ez diren partaideengandik”, talde ofizialean ez daudenengandik.
- Talde bati laguntza eman zion funtsezkoak ez diren laguntzaileen kopurua, emaitzen arrakastan eragile positiboa eta aurreikuspenekoa izan zen.
- Zuzendariek esplizituki sustatu ditzakete proiektuen sareen eraketa.
.

Ekintzailearenganako jokabidea

2011-03-23T08:32:00.000-07:00

Gaur afaria izan dugu elkarte gastronomikoan, koruko partaide baten 68. urteurrena ospatzeko. Aldamenean nuen sindikalista aurre-jubilatuak gau aldarrikatzailea zuen. Eta bere mintzaldiaren oinarrian beti dago langileak pertsona onak direla, eta enpresarien ezaugarri nagusia diruzalekeria dela Nire parte-hartzeak bestelakoak izaten dira, enpresaria aberastasuna eta enpleguaren sorrerarekin lotuz, eta sindikalista enpresariak sortutakoaren banaketaz lotuz. Eta ohi bezala, puntu berean hasten eta amaitzen dugu. Atzo, gertuko bi ekintzaileren adibidea ipini nion: bata Jose Mª Ormaetxea, 84 urtekoa, Fagor, Caja Laboral eta MONDRAGON Korporazioaren ko-sortzailea. Iaz argitaratu genuen “32 claves empresariales de MONDRAGON” liburuan lagundu zigun. Eta bigarren ekintzailea Juan Zelaia da, 90 urtekoa, Cegasa-ren jabea eta Tuboplasten zein Mexicon eta Txilen beste hainbat enpresen sortzailea; iaz “Olaitturriren herri antzerkia” liburua finantzatu zigun., 2000. urtean Gipuzkoako Bazkundeak izendatutako “XX. mendeko 10 enpresari onenak”-en artean, biak dira, hain zuzen ere, bizirik jarraitzen dutenak.

Ildo beretik idazten du gaur, ekintzaile teknologikoen artean erreferente bat den Martin Varsavsky bere blogean, titulu honetako postean: “Espainian langabeziaren gaia nola konponduko den”. Aldizka idazten du gaiaz, bere sentsibilitatea adieraziz. Hainbat arlo aldatzea proposatzen du, eta horien artean bata ekintzaileengan eta enpresariengan dagoen giza portaera da: “Konpontzea zaila den beste gai bat, Espainian ekintzailearengan dagoen mespretxua da. Gehiago ikusten zaio oportunista bat bezala, enplegu et aukera sortzaile baino. Gai honek askotan pentsarazi dit USAra itzultzeko aukeraz. Hemezortzi urtez bizi izan nintzen New York-en, eta ekintzaileei eskaintzen zaien tratua erabat desberdina dela esan dezaket. Baina ez soilik USAN, sarri joaten naizen Alemanian ere enpresarioarengan interes handia dago, eta antzera gertatzen da Ingalaterran, Holandan, eta nazio eskandinabiarretan.”
.

Sormena Pixar-en

2011-03-18T09:13:00.001-07:00

Duela gutxi, management-ean guru erreferente den Henry Mintzberg-ek, Harvard Business Review aldizkari ospetsuan idatzi zuen artikulu baten, mundu mailan lau enpresa aipatzen zituen gustukoen bezala, bertan lan egiteko. Bata animaziozko Pixar enpresa amerikarra zen, sormenaren paradigma dena. Hogeita bost urtetan, erabat ezezaguna izatetik, munduko animaziozko gailurrera iritsi da. Beste sari batzuen artean, hogeita bi Oscar, sei Urrezko Globo, eta hiru Grammy irabazi ditu. Pixar-ek animaziozko pelikulen belaunaldi berri bat sortu du, eta baita bere inguruko merchandising-a eta erlazionatutako beste produktu batzuk. Horretarako, bere ahalmen teknikoak, sormenezkoak eta ekoizpenekoak erabili ditu. Pixar-en helburua teknologia eta talentu sortzailea bateratzea da, luzemetraiak garatzeko.

Bertako presidentea den Ed Carmull-en esaldi azpimarratuena “Community matters” da, (Komunitateak axola du). Batzuentzat garrantzitsuena hasieran ideia on bat edukitzea da, baina bera ez dago horrekin ados. Sormenaren ikuspegi erratua dela dio. Pelikulen eta beste mota bateko produktu konplexuen garapenean, sormenak diziplina ezberdinetako pertsona askoren elkarlana eskatzen du. Era bateratuan lanean, beti sortzen diren arazo ugariei erantzun onena emateko. Pixar-en lorpenak ez dira ustekabekoak, pertsonengan sinesten dutelako. Baina arau batzuk jarraituz, hobeto baliatzeko taldeko sormenaz:
1- Pertsona guztiak dute askatasuna edozeinekin hitz egiteko.
2- Ideiak ematea segurua da denentzat.
3- Komunitatean (Unibertsitatean zein industrian) ematen diren berrikuntzei, gertutik jarraitzen die.
4- Sormen autoritatea proiektuaren arduradunarengan delegatzen dute, ez hierarkian.
5- Abian diren lanetan parte hartzeko kultura sustatzen dute, elkarri lagunduz, maila berekotzat hartuz.
6- Enpresako funtzio ezberdinen arteko hesiak suntsitu dituzte.
.

Stanford-i benhmarking egiten

2011-03-16T08:25:00.001-07:00

Kaliforniako Silicon Valleyren izatearen arrazoietako bat, eragile teknologikoz osatutako sare trinkoaren laguntza da, hots, San Frantzisko inguruko unibertsitate eta teknologi zentroena. Eta ingurune zientifiko eta teknologiko horretan, bandera-ontzi nabarmenena Stanford University da. Bertan, ekintzailetasunaren aldeko programetako bat “Stanford Technology Ventures Program” izenekoa da, eta urtero antolatzen du nazioarteko mintzaldi bat, azken joerak aztertzeko. Aurtengoa “Future of Entrepreneurship at REE USA 2011” izenekoa da, eta datorren asterako dago aurreikusita, martxoaren 24tik 26ra.

Gaur egun estatu gehienak antolatzen dituzte antzerako mintzaldiak, sinposioak, foroak, etab, ekintzailetasunari buruz. Giltzarria zera da, benchmarking egiteko nora begiratu jakitea, onenek zein norabide hartzen duten ikusteko. REE 2011n jorratu behar dituzten gaien artean, honakoak azpimarratuko genituzke:
- Mentoring eta venture-ren (Tutoretza eta arriskua-ren) programen gaur egungo egoera.
- Ikerkuntza merkaturatzen: mentoreen betebeharra, tamaina eta kalitatea lortzeko.
- XXI. mendeko ikaskuntza eremuak. Berrikuntzaren etorkizunari itxura emanaz.
- Ideiak errealitatean bizkortuz: “start-up doituen ereduaren” ikasgai garrantzitsuenak.
- “Negozio Planik Ez”, negozio berri bat hasteko.
.

Goi sukaldaritza

2011-03-11T10:39:00.000-08:00

Aste honetan aztertu dugun proiektuetako bat, goi sukaldaritzarekin lotuta dago. Mugaritz jatetxeaz ari gara. 1998ko martxoan ireki zituen ateak Andoni Luis Aduriz-en zuzendaritzapean. 2010ean, munduko bosgarren jatetxe onena izendatu zuen Mugaritz Restaurant Magazine aldizkariak. Gault&Millau gidan 19/20 lortu zuen, Michelin gidan bi izar ditu, Repsol gidak kalifikazio goreneko hiru eguzki eman zizkion. Eta maiz agertzen da aldizkari prestigiotsuetan, adibidez: Suediako Gourmet aldizkarian, Ameriketako Estatu Batuetako 'New York Times Magazine' aldizkarian zein Saveur-en, Italiako 'Gambero Rosson eta Japoniako Cuisine Kingdom zein Specialitésen. 2009ko otsailean, 'Carnet de Route Omnivore 2009' gidak Mugaritzen 'Loreak, loreak, loreak' platera 2009. urteko lanik onena izendatu zuen.

Mugaritzeko jarduera ez da alderdi gastronomikora mugatzen. Besteak beste, kultur proiektuetan, argitalpenetan, ikerkuntzan, dibulgaziozko lanetan, trebakuntzan eta aholkularitzan dihardu. Eta gastronomia liburuz osatutako on line denda bat ere badu. Bere lanean bereziki denboraldiaren osagaiak erabiltzen ditu, eta gertuko lurraldekoak. Garatzen ari garen proiektuan, upeltegiko katalogoaren handitzearen bideragarritasuna da gakoa, Mugaritzeko maila mantenduz beti ere. Hautazko benchmarking egiteko garai interesgarrian gaude orain.
.

Proiektua nola saldu

2011-03-09T07:11:00.000-08:00

Delia Rodriguez-ek, El Pais egunkariko blogean, Steve Jobs ekintzaile ospetsuaren artikulu interesgarri bat argitaratu berri du: “Zer dela eta Steve Jobs-ek zoratzen gaitu agertoki baten”. Bere irakurketa eta eskaintzen dituen linkak, oso baliagarriak dira, negozio berri baten giltzarrietako bat proiektua saltzen jakitea bait da, eta bezeroak egitea. Produktu edo zerbitzu berria oso ona izango da, merkatuan jadanik daudenekin alderatuta ezberdina, prestazio berritzaileak dituena prezio lehiakorrean, berritzailea, ekologikoa, etab. Ezarri, nahi diogun, adjektibo guztiak. Baina azken finean, behar den moduan saltzen ez badakigu, bere arrakasta kolokan egongo da.

Artikuluan oso garbi, era didaktikoan, eta zehaztasun osoz azaltzen dira Jobs-en gaitasunak salmentarako, bereziki egiten dituen aurkezpenetan. Antzerki ekitaldi bezala sailkatzen ditu, hitzez hitz hartuz limurtze gaitasunaren arau aristotelikoak. Helburua? Ahalik eta publizitate gehien lortzea. Bere agerraldiak aztertu ondoren, ondorio honetara ailegatu da: “Pelikula edo nobela handi guztien baliabideak erabiltzen ditu, hots, gatazka, ebazpena, doilorrak eta heroiak”. Jobs-en metodo pertsonala agertokietan, honela laburbiltzen da:
- Sentibera da.
- Pasioa azaltzen du.
- Arazo bat proposatzen du, eta irtenbidea eskaini.
- Titularrak asmatzen daki, eta mastekatuta ematen dizkio prentsari.
- Doilorrak eta heroiak sortzen ditu.
- Sinplifikatu egiten du.
- Agertokia partekatzen du.
- Une gorenak sortzen ditu.
- Erritmoak zaintzen ditu.
- Betiko erretorika teknikak erabiltzen ditu.
- Karisma dauka, eta kontzeptu mesianiko bat.
- Baina garrantzitsuena, dena ondo pentsatua izan dela da, ondo kalkulatuz, eta asteetan zehar prestatua.
- Zuzendari mitikoak agerraldi guztiak aste batzuk lehenagotik prestatzen ditu, esfortzu eta lan gogorraren trikimailu zaharrekin.
.

Medikuntzako animazioa

2011-03-04T07:27:00.001-08:00

Aste honetan aztertzen aritu garen proiektuetako bat, sendo garatzen ari den medikuntzako animazioaren arlokoa izan da. Orokorrean, sektore sentikorretan gora doaz animazioaren teknologien aplikazioak, eta etorkizun oparoa aurreikusten zaie. Ipar Carolinako Raleigh-en dagoen Research Triangle Park-era egin genuen bisitaldi baten, bere aurrerapen handia ikusi ahal izan genuen aeronautiko/aeroespazial sektorean, prototipoak ekoiztea oso garestia bait da. Eta baita, arrisku handiko sektoreetan, hala nola, suhiltzaile eta espezialitate militar batzuetan.

Medikuntza arloan, medikuntza animazioa arlo desberdinetan ezarri daiteke: kirurgian, simulazioan, prestakuntzan, etab. Helburuetako bat, medikuntza agerikoagoa eta ulergarriagoa egitea litzateke, erabiltzaile maila anitzarekin, dibulgazio soiletik hasi eta super-espezializazioraino. Une honetan, proiektua benchmarking egiteko aldian dago. MIT ospetsuko Media Lab teknologi zentroa eta antzerakoak, bioteknologian eta medikuntzako ikerkuntzan puntakoak diren ingurunetan kokatuak, gogor ari dira lanean animazioan.
.

Pertseberantzia

2011-03-02T21:50:00.001-08:00

Gaur izan dugun Negozio Planaren tailerrean, aurkeztu diren proiektuen batez besteko maila bikaina izan da. Eta nire ekintzaile gustukoenen artean dagoen Martin Varsavskyren metodologia jarraituz, parte-hartzaileak eurak izan dira besteen proiektuen ebaluatzaileak. Arrisku-kapitalaren erakundeko batzorde bateko kideak zirela esan diet, eta talde bakoitzari milioi bat euro esleitu diot, negozio onenetan inbertitzeko. Errealitatean, irabazle geratu ziren taldeei, nire liburu batzuk oparitu nizkien, horien artean “Barne-ekintzailetasuna”. Proiektu irabazlea, itsas salbamenduko tresneriari buruzkoa izan da. Prototipoak eginak dituzte, eta nagusiki telegidatutako hegazkin txiki baten inguruan doa gaia, flotagailu bereziak eta botikinak eramango dituena. Bigarren proiektua, kotxeen arteko elkar-konektibitatea landuko duen sistema bat da, telekomunikazio sareak erabiliz.

Harridura sortu didana zera izan da, aurretik egondako beste aditu batzuk, bideragarritasun komertzial edo ekonomikorik ez zizkietela ikusten proiektu batzuei. Beti sortu dit harridura epaile paperean jartzen direnak. Eta parte-hartzaileei gogorarazi egin diet, “Ekintzaileak” aldizkari bikaineko azken alean ageri diren negozio gehienak, agian era negatibo berean izango zirela hartuak (Bidenabar, irabazle geratu den ekintzaile gazte eta dinamikoa, Asier, aldizkariko artikulu baten agertzen da). Baina ustezko epaileek ameslari batzuk zirela pentsatu, ekintzaileak ideian sinesten zuten, eta pertseberatu egin zuten aurrera atera arte. Hondako japoniarrak pertseberatu zuten bezalaxe, beraien 50 zk.ko motozikleta txikia Harley Davidson motor handiaren merkatu amerikarrean sartzeko.
.

Kirol zapatila birziklagarriak

2011-02-25T07:39:00.000-08:00

Beti pentsatu izan dugu negozio berriak sortzeko era onenetakoa atzerrira bidaiak egitea dela, eta han kontutan hartu zein produktu edo zerbitzu berri dauden, hemen falta direnak. Eta berriak ez izan arren nazioan bertan, gure lurraldean izan daitezke. Bidaien osagarri, interesgarria izaten da ideia berrien haztegien arrastoa jarraitzea, gaur hemen jasotzen dugun tankerakoak. Springwise ideia berrien aldizkariaren azken alean, proiektuetako bat kirol zapatila birziklagarriena da. Ingurugiroarekin begirunetsuak diren zapatilen aurrean gaude, erabili ondoren lurperatu egin daitezkeelako.

Ohikoa da gero eta produktu birziklagarri gehiago merkaturatzea, edo hondakin birziklatuekin egindako produktuak. Egokiera honetan, OAT Oinetakoak enpresa nederlandarrak kirol zapatila berdeak komertzializatzeari ekin dio. Kontzeptua erraza da: hondatzen direnean, lurperatu egin daitezke, erabat biodegradagarriak bait dira. Eta ondorioz, landareen ongarri bezala erabili daitezke. Interesgarria da, halaber, enpresaren Ikuspegian erreparatzea: “Modaren etorkizuna natura eta industriaren arteko adiskidetzean dago. OAT Oinetakoak etorkizun horretarako bidea zabaltzen ahalegintzen da”
.

Talentua antzeman

2011-02-22T08:42:00.001-08:00

Hil honetako Harvard Deusto Business Review aldizkari ospetsuan, “Talentuaren txackrak” artikulu bikaina dator, Jose Manuel Casado 2.C Consulting-eko presidenteak idatzia. Arrakasta profesionala lortzeko formula ez dela oso konplexua dio, oinarrizko hiru osagaiez moldatua dagoelako, bizitzako edozein botikan lortzeko modukoak: grina, talentua eta ahalegina. Ez dago beste biderik arrakastarako. Gogoa eta talentua behar dira, baina talentu hori landuz, ordu asko eskainita horretarako. Ildo beretik idazten du sarri Tom Peters managementeko guruak, erakunde bikainak bi ezaugarri, talentua eta lanerako gogoa, dituzten pertsonak enplegatzen dituztelako, bikain bilakatzeko.

Hinduismoaren eta Asiako beste kultura batzuen arabera, txackrak sei edo zazpi energia gune dira, ikusezinak eta neurtezinak, gizakiaren gorpuan kokatuak. Sormenari dagokiona Suadhisthana da, errainezurrean dagoena. Casadok talentuaren sekretuez idazten du artikuluan, talentuaren txackrez, pertsonei premiazko energia ematen dien arloez, horien bidez erakundeek emaitza onenak lortzeko. Honakoak dira, ia beti gutxietsi diren energia guneok:
1- Talentua antzeman egiten da, ikusi bezain azkar?
2- Profesionalen interesak eta itxaropenak, adinaren independenteak dira?
3- Talentua, berezko zerbait da?
4- Zuzendaria izatea, txarra da osasunarentzat?
5- Adinean aurrera joan ahala, balioa eta talentua txikiagoak dira?
6- Zuzendariek motibatu ahal dute pertsonak?
7- Errendimenduaren giltzarriak zeintzuk diren badakigu?
.

Sormenaren industriak

2011-02-18T08:17:00.000-08:00

EOI–Antolakuntza Industrialeko Eskola, ekonomia berria deitzen denaren sektore ezberdinen azterketa egiten ari da: giza ekonomia, ekonomia digitala, sormenaren industriak, ekonomia irekia, eta ekonomia berdea. Testuinguru horretan, sormenaren industriei buruzko liburu interesgarri bat argitaratu du. Pdfa bere blogaren bitartez jaitsi daiteke, eta bere irakurketak, aprobetxatu daitezkeen ideia berriak ematen ditu. Hogei enpresen kasuak aztertzen ditu, negozio eredu berriak darabiltenak, eta antolamendu berritzaileak. Kudeaketa sistematan oinarrituta, arrakastaren giltzarriak azaleratzen saiatzen da. Sektore desberdinetako enpresak dira, hala nola Real Madril kiroletan, edo Freak ikus-entzunezko agentzia.

Inoiz blog honetara ekarri izan ditugu hogeiko lagin horretako bi: Caja Laboral Basconia kiroletan, bereziki Joxean Kerejeta barne-ekintzailea goratuz. Eta baita Panda Security, eta bere sortzailea paregabea den Mikel Urizarbarrena. Panda, mundu mailako liderra da etxeko erabilerako cloud computing-eko anti-birusetan. Gaur egun enpresa ugari ari dira sortzen "Open Source" eta "Cloud Computing"-aren inguruan, Almis-en tankerakoak. Definizioak laburbilduz, Open Source-k softwaren garapenaren kostua eta arriskua optimizatzea ahalbideratzen du. Eta horrekin batera, kalitatea eta sendotasuna gehitzen dio, produktuaren testeo eta berrikustea hobea lortzen delako. Beste alde batetik, Cloud Computing-ak une oro ematen du aukera 24x7 aplikazioa erabiltzeko, edozein tokitatik eta edozein unetan, erakundearen zerbitzarietan jarri eta mantendu behar izan barik.
.

Benchmarking erreferenteei

2011-02-16T09:28:00.000-08:00

Bikaintasunaren bilaketan, Tom Peters management-eko guruari jarraituz, garrantzitsua da ondo aukeratzea benchmarking egiterakoan. Delphi sormen tresnak, gure erakundeari kanpoko profesional onenen ekarpenak gehitzea bilatzen du. Eten gabe egin behar dugu zaintza teknologikoa, zientifikoa edo management-ekoa, ingurune bikainenetan. Eta kontutan hartu zertan ari diren ikerkuntzan, garapenean eta transferentzian. Bikaintasunezko bi toki aipatuko ditugu hemen, bertatik beti ekarpenen bat lortzen delako.

Estatu mailako kudeaketa konferentzia aipagarriena, urtero antolatzen duten Expomanagement da. Aurtengoa ekainerako aurreikusi dute, Madrilen, eta hilabeteak daramate sustatzen. Parte hartzen duten guru erreferenteen artean, eta jarraitzea merezi dutenak, honakoak daude: John Elkington jasangarritasunaz hitz egiten, Daniel Goleman adimen emozionalaz, Gary Hamel estrategia eta berrikuntzaz, Susan Greenfield neurozientziaz, Charlene Li sare sozialaz, Tal Ben-Shahar pertsonaz, eta Juan Enríquez zientziaz, teknologiaz eta etorkizunaz.
Beste ekimen aipagarri bat Stanford Technology Ventures Program-ek urtero antolatzen duen konferentzia da, hain ospetsua den Silicon Valley kaliforniarraren bihotzean. Bertan jorratzen diren gaiak, mundu mailako ekintzailetasun berritzailearen etorkizuneko agenda ezartzen dute.
.

Lidergoa: Mourinho v Guardiola

2011-02-11T06:26:00.000-08:00

Aste honetan Negozio Planari buruzko Tailer dinamiko bat izan dugu, Deustoko Unibertsitateko Ingenio Programaren barnean. Parte-hartzaileak ikasketa desberdinetako azken kurtsoko ikasleak dira, ekintzaile sena dutenak. Eta ondorioz, giroa oso positiboa da, eta parte-hartzaileen maila benetan bikaina. Negozio Planaren indizeko hiru arlotan egin dugu lan: ideia, taula finantza-ekonomikoak, eta pertsona plana. Azken puntu honetan, talde laneko eta lidergo ekintzaileko ariketa batzuk egin ditugu. Eta management-eko eta coaching-eko guruen artean, hainbeste jarraitzen dugun Juan Carlos Cubeiro ere aipatua izan da, eta baita bere “Hitz egin dezagun talentuaz” bloga.

Cubeirok berriki, Leonor Garrardorekin batera, lidergoari buruzko liburu bikain bat argitaratu du: “Mourinho versus Guardiola. Bi metodo helburu berdinerako”. Jarraian irakurtzen da, futbol zalea izan ala ez, eta oso era dotorean eta didaktikoan islatzen du lidergo arrakastatsuaren bi eredu. Entrenatzaile bakoitza bere estiloarekin, Europa eta mundu mailako futbolean garai bat ezartzen ari dira. Eta trebetasun handiz erabiltzen dute zuzendaritzako eta enpresako lidergoko oinarri gehienak. Aipatu, baita, guretzat ohore bat izan dela liburuak duela urtebete idatzitako “Guardiolaren dekalogoa” post-a jasotzea.
.

N.P. lehiakorrago bat

2011-02-08T02:20:00.000-08:00

“Ekintzaileak” aldizkari bikaineko hil honetako alean, erdiko dossierra Negozio Planari zuzendua dago. Ez dute N.P. bat nola egiten den azaltzeko asmorik, beste batzuetan garatu izan dutelako, baizik eta biribildu daitezkeen alderdiak aztertzen dituzte, N.P.a lehiakorragoa egiteko. Lau arlo garrantzitsuenetan sakontzen dute: merkatu ikerketa, finantza alderdiak, komunikazioa inbertitzaileentzat, eta talde kudeatzailea. Gainera, kasu praktikoak ematen dituzte, eta hainbat aholku interesgarri.

Aholkuen artean, honakoak azpimarratuko genituzke:
- Guillermo Vilaroig, Overalia-koak, “Malgua izan behar da, eta 'B' plan bat gertu eduki”, adierazten du.
- Joan Arús, Kippo-koak dioenez “N.P.arekin geure ahuldadeak antzeman genituen”.
- Jesús Lasso, Citiservi-koak, “Espainian ezin zara inbertitzaile potentzial batengana ideiarekin soilik joan, baldin eta izena ez baduzu, edo aldez aurretik proiektu arrakastatsu batzuk lortuak ez badituzu”.
- Ignacio Colorado, Undermaskin-ekoak dioenez “Gomendagarria da oso, negozio ildo paraleloak edo/eta ordezkoak badituzula azaltzea, produktu izarraren emaitzak atzeratzen direnerako”.
- Daniel Suárez, AsociadosContigo-koak, “N.P.aren aldaketak, behatu eta berrikusi egiten ditugu” azaltzen du.
.

Taldeak: sormen giroa

2011-02-04T06:36:00.000-08:00

Sormen taldeetan, nagusiki pertsona positiboak ala ezkorrak egon behar dira?

“Muy interesante” aldizkari bikaineko 355 alean, sormenaren alde ilunari buruz idazten zen. The University of New South Wales-eko Joe Fargas irakasleak, urte asko gaia ikertzen eman ondoren, konbentzituta dago egoera ezkorrean egoteak ekartzen dituen onuraz. Eta gehitzen duenez, pertsona ezkorrak xehetasun txikietan arreta handiagoa jartzen dute positiboak baino. Ildo beretik, Columbiako Negozio Eskolako Modupe Akinola irakasleak dioenez, goibel sentitzeak sormen handiagoko pertsonak bilakatzen gaitu.

Bestalde, Dave eta Wendy Ulrich-en azken “The Why of Work” (Lanaren zergatia) liburuan, zazpi galdera proposatzen dizkiete zuzendari guztiei bere buruei egiteko, enplegatuen artean sormen giroa sustatzeko.
1- Zergatik naiz ezaguna?
Norberaren indarguneak garatzen dituzten jardueretan parte hartzeko gomendatzen dute, nabarmentzeko, horrk sormena sustatzen duelako.
2- Nora noa?
Giza erantzukizunak eta ingurugiro kontzientziak, eguneroko motibazioari zentzu indartsua ematen diote.
3- Norekin bidaiatzen dut?
Taldeko partaideak gaitasun profesionala behar dute izan, baina baita konfiantza maila nahikoa, sormena, esperimentazioa eta elkarren arteko errespetua ahalbideratzeko.
4- Nola sor dezaket lan giro positiboa?
Sormenaren kultura sustatzeko, “truke zintzoa” erraztu behar da.
5- Zeintzuk dira interesatzen zizkidan erronkak?
Talentuaren ebaluazioa ez da hainbeste enplegatuen egokitasunera lotzen, baizik eta lana egiteko konpromisoarekin eta gogoarekin.
6- Nola erantzun aldaketei?
Ikaskuntza eta harikortasuna piztuz.
7- Zer dut atsegin?
Zuzendariek entzutea eta jakin-mina bultzatuko dituen mentalitateari eutsi behar diote.
.

Ekintzailetasunaren ekosistema

2011-02-02T05:43:00.001-08:00

Sistematikoki benchmarking egiten diogun lurralde bat, MIT-Harvard binomio ospetsuarena da. Bertako ekintzailetasun zentroak, mundu mailako erreferente bihurtu dira bakoitza bere eremuan. Eta bi unibertsitateok milia pare bat eskasetara egon arren, lehiatu eta elkar-lanean aritzen dira oso era berezi eta eredugarrian, imitatua izatea merezi duena. Txina eta India bezalako estatuen garapen ekonomiko itzelaren jakitun, elkar-lanean aritzen dira mundu mailako ikerlari talentudunak erakartzeko. Horretarako, azken belaunaldiko laborategi zientifiko eta teknologikoak eskaintzen dizkie. Eta elkarrekin lan egiteko era honek, bientzat sinergiak suposatzen duenean, batera ahalegintzen dira, “aberria eraiki” mentalitateaz.

2011 honen berrikuntzetako bat “Entrepreneurship Ecosystem at MIT” (MITen Ekintzailetasunaren ekosistema) programa da, non MIT-Massachusetts Institute of Technology-ko sei zentro espezializatuk hartzen dute parte:
- Entrepreneurship Center: prestakuntza programaz gain, inkubazioa, network-ak, ikerkuntza eta lehiaketak eskaintzen ditu,
- Deshpande Center: ezaguera unibertsitateko laborategietatik merkatura transferitzen aritzen da,
- Legatum Center: hirugarren munduko estatuetan ekintzailetasun berritzailea sustatzen du,
- Lemelson-MIT: asmakizunak eta asmatzaileak sustatzen ditu,
- MIT Technology Licensing Office: sormendunen jabetza intelektuala babesten du, eta
- Venture Mentoring Service: eskarmentudun aholkularien laguntza eskaintzen die ekintzaileei.
.

Mac team: 100 pertsona

2011-01-28T06:51:00.000-08:00

Management-eko MIT Sloan Management Review aldizkari bikaineko azken alean, artikulu bikain bat dator: “Steve Jobs' amazing ability to ‘discover’ products” (Steve Jobsen sineztezinezko trebetasuna produktuak “aurkitzeko”). Bertan, azken aldian gaixotasunagatik negozioak bazterrean utzi dituen, Steve Jobs ekintzaile miretsiaren produktuak aurkitzeko, eta ez asmatzeko, era aztertzen du. Beti izan da kritikatua merkatuan dauden teknologiak erabiltzen dituela eta, elkar batuz, horiekin produktu berriak jaulkitzen dituelako. Baina inork ez dio ukatu trebezia handia duela horretarako, erabiltzaile gehienei asko gustatzen zaizkien diseinu eta prestazio egokiak, eraginkortasunez uztartzen jakin primeran dakielako.

John Sculleyri egindako artikulu bikain eta luze baten, Apple-ko lehen CEO-Zuzendari Nagusiaren iritziak jasotzen dira. Jobs-ek Pepsi-Colako Zuzendari Nagusia zenean fitxatu zuen, honako galdera eginda: “Zure bizitza osoa azukredun ura saltzen igarotzea nahi duzu, ala mundua aldatzeko aukera aprobetxatuz?" Sculleyren esanetan, Steve Jobs sortzaile paregabe eta arrakastatsuaren metodologiaren ezaugarri batzuk, hauek dira:
- Ikuspegi handiko pertsona da. Baina era berean, urrats bakoitzeko xehetasunetan erreparatzen du. Gauza guztiekin metodikoa eta kontu handikoa da. Perfekzionista bat.
- Jobs-en metodologia beste edozeinenarekin alderatuz desberdina egiten duena, erabaki garrantzitsuenak ez direla zer egin behar den asmatzean datza, baizik eta zer egin behar ez den. Minimalista da.
- “Mundua aldatzeko” egiten du lan maila baten. Kontzeptu handia. Baina beste alde baten, xehetasunetan sartzen da produktu bat ekoizterakoan, eta softwarea diseinatzerakoan, hardwarea, sistemak, eta baita aplikazioak eta periferikoak ere.
- Kasu guztietan, arlo bakoitzeko profesional onenak aukeratzen ditu. Eta pertsonalki hautatzen ditu talderako. Inoiz ez du eginkizun hori delegatzen.
- Erakunde zein enpresa handiak, burokratikoak eta eraginkorrik gabekoak iruditzen zaizkio. Eraikin bakarrean lan egitea du gustuko, eta taldea, 100 pertsonatik beherakoa izatea. “Ezin naiz gogoratu ehun pertsona baino gehiagoren izenaz. Eta pozik lan egiteko, denak ezagutu behar ditut”.
.

Zenbakiak korrelazioan jarri

2011-01-26T11:59:00.001-08:00

Kauffman Fundazioak, ekintzailetasunaren eremuan lehena dena dioena, hezkuntzaren sektorean garapen handiko enpresak sortzeko programa berri bat atera du. Mundu osoko 800 eskaera jaso ondoren, 25 hautagai aukeratu ditu. Ameriketako zentroetan ohikoa den bezala, bere programako hasierako puntuetan Negozioaren Ereduaren Garapena edo Business Plana jarri du.

Gaurkoan, birziklatzeko ekipamenduko arloko enpresa baten Negozio Plana aztertzen aritu gara, arreta zenbakietan jarriz bereziki. Hau da, oinarrizko lau koadro ekonomi-finantzarioetan: salmenta koadroa, ustiapen kontua, altxortegi koadroa, eta egoera balantzea. Bankuetako inbertsio-azterlariak eta business-angelsak, normalean dokumentua osorik irakurri aurretik, lehenengo ustiapen kontuari begiratzen diote. Eta ondoren, sustatzailearen CVari, edo barne-ekintzailetasun kasua bada, enpresaren kaudimenari. Eta ehunka zenbakietan sakontzen hasi baino lehen, koadro ezberdinen arteko zenbaki nagusien korrelazioei erreparatuko diete, desdoitzen bila. Ohikoak izaten direnak, bestalde.
.

Abiadura handiko erakundeak

2011-01-21T23:38:00.001-08:00

Enpresa eta erakunde batzuk, beraien lehiakideak arlo askotan gainditzen dituzte une berean: kostuak, abiadura, berrikuntza eta zerbitzua. Nola? Giltzarria berrikuntza sistematizatzean datza. Noizean behin ahalegin itzelak egin ordez aurrerapen apartak lortu asmoz, hobe da enplegatu guztien parte-hartzea. Hila joan eta hila etorri saiatuz, lehiakideak atzean uzteko. Hau da, “abiadura handiko erakundeak” sortuz, Steve Spear manufacturing eta six sigma metodoen guru ospetsua denaren terminologia erabiliz. Hala dio bere “Chasing the Rabbit: How Market Leaders Outdistance the Competition” (Untxia ehizatuz. Nola urruntzen dituzten lehiakideak merkatuko liderrak) best-sellerrean.

%80tik gora esportatzen duten lurraldeko enpresa metal-mekaniko gehienentzat, bereziki automobilgintza eta erreminta makina sektoreetakoak, 2010. urtean ahikoa edo on aizan da. Eta ekonomia indartsu hazten ari den estatuetara esportatzen dutenentzat, urte bikain aizan da. Gainera, badirudi 2001. urtea hobea izan daitekeela, paper-zorroan konfirmatuta dituzten eskarietan erreparatuz. Bezero bezala iaz ekoizpen errekor guztiak hautsi dituen Volkswagen bezalako multinazionalak edukitzea, edo BEG-Barne Ekoizkin Gordina % 3tik gora hazi den Alemania bezalako estatu bateko enpresak, berme paregabea da abiadura handiko erakundearen dinamika mantentzeko.
.

10.000 ordu

2011-01-19T06:50:00.000-08:00

Gaur egun modan dagoen “Bereziak. Zergatik pertsona batzuk arrakasta lortzen duten eta beste batzuk ez” liburuan, management-eko gurua den Malcolm Gladwell-ek beraien arloan arrakastatsuak izan diren pertsonen kasuak aztertzen ditu. Beste liburu hauek ere idatzi dituenak, “Arrakastaren giltzarriak”, “The tipping point” eta “Adimen intuitiboa”, bikaintasunaren eta arrakastaren atzean oso prestakuntza handia egoten dela adierazten du, 10.00 ordu inguruko dedikazioarekin, ahal bada gaztaroan. Adibide ezagunenen artean, Beatles musika taldearena eta Bill Gates ekintzailearenak ageri dira.

Liverpooleko taldeak eskarmentua atzerriko tauletan hartu zuen, Hamburgon. Egunero zortzi orduz jo behar zutenez, nahitaez hobetu zuten beraien jotzeko era. Lehen arrakasta lortu zutenerako 1964an, zuzenean jadanik 1.200 aldiz jota zeuden. Zenbaki horren aparteko balioaz jabetzeko, gaur egungo talde ezagunenak bizitza profesional osoan hainbestetan ez dutela jotzen esan beharko litzateke. Hamburgoko esperientziak egiten die bereziak Beatles-i.
Antzerako kasua da Bill Gates Microsoft-en ko-fundatzailearena. DBH-Derrigorrezko Bigarren Hezkuntzan ari zenean hasi zen programatzen. 1968. urtea zen, eta ordutik, Seatleko familia dirudunen artean eratu zuten elkarte informatiko bateko ordenagailu gelan ematen zituen Gatesek orduak, ikasle irudikorra bertako partaide zen eta. Orain hainbeste dohaintza egiten dion Washingtoneko unibertsitateak ere programatzen utzi zion. Horrela, Gatesek Harvardeko unibertsitatea utzi zuenerako, bere bigarren ikasturtean, zazpi urte jarraian zeramatzan programatzen.
.

Crowdsourcing

2011-01-14T23:38:00.001-08:00

Aste honetako Springwise negozio ideia berrien aldizkarian, bat azpimarratzekotan “Crowdsourcing” diseinuan izando zen. Hitzaren itzulpena honakoa litzateke:
- Crowd = taldea, jendetza.
- Source = iturria, jatorria.
Beraz, jendetzarengandik datorren produktu edo zerbitzu bat lortzea da. Dagoeneko erabat ezarrita dauden KIT’ak ahalbideratu dute lana egiteko era hau, pertsonaren kokapen fisikoak balioa galdu baitu.

Amsterdanen kokatuta dagoen Veeel enpresa holandarraren adibidea jartzen dute. Independenteak diren 1.000 diseinatzaileekin egiten dute lan, hainbat marka eta enpresei produktuen garapeneko zerbitzuak eskainiz. Diseinatzaileak lau multzotan sailkatzen dira, txikienetik espezialistaraino. Eta bezeroei taldea aprobetxatzeko plataforma eskaintzeaz gain, enpresak berak zeregin giltzarri bat betetzen du prozesuan, nodo bezala: “ Bezeroekin batera elkarrekin lan egiten dugu prozesuaren fase guztietan. Aurrerapen bakoitzaren egoera prozesu guztian aurkezten da, eta barneko ekoizpen eta komertzial departamenduetako know-how gehitzen da, berrikuntza guztien ekarpena izan dadin. Veeel-ek aditu eta espezialista onenak aukeratzen ditu proiektuaren mesederako, eta horrela sormen prozesuaren eraginkortasuna bermatzen du, azken emaitza hobetuz.” Bezeroen arten lehen mailako enpresa ezagunak ere badaude, hala nola Philips, Unilever eta PWC.
.

Ko-sormen banatua

2011-01-12T07:33:00.000-08:00

Urtarril guztietan aurreko urteko zerrendak agertzen dira, liburu onenak, artikulu onenak, etab. zeintzuk diren azalduz. Ildo horretan, McKinsey Quarterly management-eko aldizkari ospetsuak 2010ean argitaratutako 10 artikulu onenak aipatzen ditu azken alean. Arlo hauetakoak dira: 3 Antolakuntzakoak, 2 Estrategiakoak, 2 Marketingekoak, eta bana Negozioen Teknologia, Zuzendaritza eta Finantza Korporatiboetakoak. Horietako batzuk barne-ekintzailetasun edo ekintzailetasun korporatiboarekin partzialki erlazionatuta daude, hala nola Antolakuntzakoak eta Negozioen Teknologiakoak. Eta duen interesagatik, azken hau azalduko dugu laburki.

Artikulua honakoa da: “Clouds, big data and smart assets: Ten tech-enabled business trends to watch”(Lainoak, datu andana, eta aktibo adimentsuak: negozioetako teknologien hamar joera jarraitzeko). Bertan, teknologien aurrerapenak eta beraien garapen azkarra negozioetan, ereduak aldatzera daramala azaltzen da. Aditu garrantzitsuenek 10 joeren bilakaerak aztertzen dituzte:
- Ko-sormen banatua joera nagusia izatera igarotzen da,
- Antolamendua sarean jartzea,
- Lankidetza eskalara,
- “Gauzen internet” aren handitzea,
- Esperimentazioa eta datu andana,
- Mundu jasangarri baterako lotura,
- Edozein gauza zerbitzu bat bezala irudikatu,
- Multi-arloko negozioen ereduaren garaia,
- Berrikuntza, piramidearen oinarritik garatzen,
- Ondasun publikoen ekoizpena sarean.
.

Berrikuntzaren 5 mitoak

2011-01-06T23:47:00.000-08:00

Argitaratu berria da MIT Sloan Management Review aldizkari bikainaren neguko edizioa, eta bertan bi artikulu interesgarri ageri dira, berrikuntza dela eta:
- “The 5 Myths of Innovation” (Berrikuntzako 5 mitoak), Julian Birkinshaw, Cyril Bouquet eta J.-L. Barsoux-ek idatzia, eta
-“Bringing Open Innovation to Services” (Berrikuntza irekia zerbitzuetara eramanez), Henry Chesbrough ospetsuak sinatua.

Artikulu biak benetan interesgarriak dira, baina lehenengoan jarriko dugu gure arreta, berrikuntzaren 5 mitoak izenburukoan. Autoreek berrikuntzaren teoriatik abiatzen dira, hots, etengabe egin ahal dela, enpresako edozein enplegaturen bidez, eta bertako edozein alderdi hobetu daitekeela. Halaber, IKT’k, web 2.0 etab, praktikara eramateko tresnak direla. Baina teoria hori egia denik zalantzan jartzen dute. Eta 5 mito aztertu eta berriro kontutan hartu behar direla diote:
1- Eureka momentua,
2- Egituratu, eta ailegatuko da,
3- Etorkizuna berrikuntza irekian dago,
4- Soluzioa ordaintzean dago, eta
5- Behetik gorako berrikuntza hobeagoa da.
.

163 bide bikaintasunerako

2010-12-29T11:20:00.000-08:00

Amaitzen ari den 2010 honetako liburu onenetako bat, oso estiman dugun managementeko gurua den Tom Peters-en "The Little BIG Things. 163 Ways to Pursue EXCELLENCE" (Gauza txiki handiak. 163 bide bikaintasuna bilatzeko) liburu berria da. Peters-en azken liburuen ildoa jarraitzen du, eta edozein lekutan hasita irakur daiteke, bideak bata bestearen independenteak dira eta. Baina multzoka bilduta daude, eta tituluak bere filosofia adierazten dute: txikia, bikaintasuna, krisia, aukera, erresistentzia, norbera, besteak, lotura, jarrera, emaitzak, lana, ekimena, lidergoa, hitzak, networking, janaria, bai, ez, bezeroak, ekintza, aldaketa, grina, presentzia, talentua, jendea, generoa, berrikuntza, entzutea, jakin-mina, ikasi, denbora, diseinua, xehetasunak, enpresa, ber-imajinatu, oh!, orain, talka, arrakasta, eta handia.

1982an “In Search of Excellence" (Bikaintasunaren bila) best-sellera idatzi zuenetik, bere diskurtsoa iritzi horren inguruan berresten da: zerbaitetan onena izan. Dioenez, bikaina ez izatekotan, zer orduan? Bikaina orain ez izatekotan, noiz orduan?... Liburu inspiratzailea, irakurtzeko erraza, eta adibidez betea, enpresa arlotik at ere erabilgarriak direnak.
.

Desioak

2010-12-24T10:37:00.001-08:00

Gabonetako aurtengo zorionak Calcutako Ama Teresaren erantzun sorta da, Celine Dion-en “The power of love” musika ederrarekin. Zorionak guztioi:

Egunik ederrena? - Gaur
Gauzarik errazena? - Oker egotea
Oztoporik handiena? - Beldurra
Gaitz guztien jatorria? - Egoismoa
Akatsik handiena? - Gerra
Entretenimendurik ederrena? - Lana
Porrotik txarrena? - Etsipena
Irakasle onenak? - Umeak
Lehen premia? - Komunikatzea
Sentimendurik txarrena? - Gorrotoa
Pertsonarik arriskutsuena? - Gezurtia
Biderik azkarrena? - Ibilbide jakina
Satisfakziorik handiena? - Ongi bukatutako lana
Erremediorik onena? - Baikortasuna
Gauza guztien artean ederrena? - Amodioa
Pertsonarik beharrezkoenak? - Gurasoak
Gauzarik premiazkoena? - Etxea
Oparirik onena? - Barkamena
Gehien blokeatzen duen sentimendua? - Goibeltasuna
Zoriontsuen egiten zaituena? - Besteentzat baliagarria izatea
Munduko indarrik bortitzena? - Fedea
Misteriorik handiena? - Heriotza
Sentsaziorik atseginena? - Barneko bakea

“Behin soilik igaroko naiz bizitzatik.
Ondorioz, egin dezakedan edozein gauza on, edo pertsonaren bati egin ahal diodan maitagarritasunen bat, orain egin behar dut, hemendik berriro ez naizelako igaroko”.
Calcutako Teresa
.

Juan Carlos Cubeiro

2010-12-22T02:33:00.000-08:00

Poztasun handia izan da Espainiako coach esanguratsuena den Juan Carlos Cubeiroren blogean, “MONDRAGOEko 32 enpresa giltzarriak” gure liburuaren aipamen luze eta positiboa irakurtzea. Cubeirok estatuko enpresa onenen zuzendari onenekin egiten du lan, horien artean IBEX 35eko ia denekin, eta ziurrenik gaur egungo enpresen egoera erreala ondoen ezagutzen dutenen artean dago. Bere postak ikasteko iturri paregabeak dira, eta ematen dituen erreferentzia ugariak, etengabeko hobekuntzarako eredu berriak.

Cubeiroren betiko jarrera positiboaren, hain premiazkoa ekintzaileengan eta enpresetako proiektuak aurrera eramaten dituztenen artean, kontraste bezala abenduko “Muy interesante” aldizkariko aleak dakarren “Sormenaren alde iluna” artikulua da. Bertan aipatuak dira, alde batetik USAko Columbiako Negozio Eskolako psikologa soziala den Modupe Akinola, triste egoteak sormen gehiagoko pertsona bihurtzen gaituela dioena. Eta bestetik, ildo beretik idazten duen Joseph P. Forgas, Australiako University of New South Waleseko psikologoa. Urte askotako ikerkuntzen ondoren, konbentzituta dago egoera pesimistan egoteak dakarren onura harrigarriak. Pertsona negatibo bat xehetasun txikietan baikorra baino hobeto biltzen dela azpimarratzen du… Sormen taldeak osatzerakoan kontutan hartu beharreko azterketak dira.
.

Sormenari buruzko artikuluak

2010-12-17T23:13:00.001-08:00

Agian kudeaketaren inguruko bi aldizkari ospetsuenen azken aleetan, sormenari buruzko hiru artikulu argitaratzea kointzidentzia izango da. Nahiz eta gaiaren gaurkotasunagatik izango dela sumatu, ekonomia globalizatu honetan lehiakorrak izateko ezinbesteko tresna delako. Horrela, MIT Sloan Management Review aldizkari ospetsuak argitara eman du “How to Make Your Brain More Creative” (Burmuina nola egin sormenago). Sinatzailea Shelley Carson da, eta beste alderdi batzuen artean, sormena denok hobetu dezakegula dio, entrenamendua eta praktikaren bidez.

Harvard Deusto Business Review aldizkari bikainaren zazpi artikuluetatik, bi sormenari buruzkoak dira. Lehenean, Jörg Reckhenrich, Martin Kupp eta Jamie Anderson-ek “Sormena ulertzen: zuzendaria artista bezala” artikulu interesgarria idazten dute. Kontzeptu berri bat sartzen dute: “try-storming”. Eta honakoa adierazten du: brainstorming-eko ideiak praktikara azkar eta merke eramateko garrantzia, beti ere epe motzean. Boeing-etik hartutako kontzeptua da. Beste artikulua, hezigarria baita, Guido Stein eta Miguel Lopez-Remirorena da, eta gaia: “Sormena nola sustatu? Ikasgaiak artearen eremutik". Sormenean ikusten dituzten zazpi giltzarriak garatzen saiatzen dira: helburuaren zentzua, sentsibilitatea, tentsioa, ironia, jokoa, zortea eta itxaropena.
.