Negozio bakoitzeko ustiapen kontu bat

Egun hauetan bi ETEren - Enpresa Txiki eta Ertainak- Kontseiluetan parte hartu dut, eta bertako ustiapen kontuak aztertzerakoan, ezinezkoa zitzaidan dituzten negozio bakoitzaren marjina gordina identifikatzea. Kontabilitate mistoa daramate, erdizka orokorra eta erdizka negozioka, emaitzak negozioka larregi banatu gabe, eta ondorioz azken emaitzek ez dute uzten azterketarako aukera larregirik. Banakatze urriaren arrazoiak beti antzerakoak dira, hots, lan gehiago eskatzen duela. Eta honelako egoeratan Malaysia Airlines aire konpainia bikainarekin oroitzen naiz.

“The Mckinsey Quarterly” aldizkari ospetsuak berriki argitaratu du Idrid Jala-ri egindako elkarrizketa bat. Malaysia Airlines porrotetik atera duen CEO edo Zuzendari Nagusia da, eta mozkinetan ipini du bi urteren buruan. Munduko hamar kudeatzaile onenen artean kokatzen dute. Idrid Jalak ibilbide profesional guztia injineru bezala emana zuen Shell petrolio konpainia multinazionalean, eta Malaysiako gobernuak proposatu zuen, azken aukeratzat, estatuko “enpresa ikurra” ez ixteko. Jalak ustiapen kontuan oinarritu du bere estrategia alde batetik(The Profit and Loss Statement), eta enplegatuen %100eko ehunen konpromisoan bestetik. Jarduera bakoitza zenbakietan ipini du, bere talde autonomoarekin P&L Statement-a kudeatzeko, eta indar guztiak bertara bideraztuz. Gaur egun bakarkako P&L Statement-a dute hegazkinen ibilbide bakoitzeko, hilero, hegaldi zenbaki bakoitzeko, guztira... 160.000 P&L Statements abian izan arte! Idrid Jalaren hurrengo erronka “Malaysia Airlines” munduko aire konpainia onena izatean dago, aireko Toyota, bere ”Five-star value carrier” kontzeptuarekin.
.

Kevin Systrom, Instagram-en sortzailea

Egun hauetan New Yorkeko burtsan kotizatzen hasi da Facebok, teknologian oinarritutako enpresarik indartsuena irteerako unean. Iragan hilean, albistea bestelakoa izan zen, hots, Facebok-ek 1.000 milioi dolarretan Instagram erosi zuela, inoiz dolar bat fakturatu ez duen 12 pertsonaz osatutako enpresa. Salerosketa ikaragarri honen protagonista Kevin Systrom ekintzailea da, eta bideoan dioenez, irtenbideak aurkitzea nahiko erraza izaten da eskuarki; zaila zera da, arazoak definitzea.
.
.

.
.

Berrikuntzen eta prozesuen arteko oreka

Harvard Business School ospetsuko Working Knowledge aldizkari elektroniko bikainaren gaurko alean, honako artikulu interesgarri hau argitaratu dute: “Five Ways to Make Your Company More Innovative” (Zure enpresa berritzaileagoa bilakatzeko bost era), Garry Emmons, Julia Hanna eta Roger Thompson-ek egina. HBSko bost adituk aztertzen dute gaia, ikuspuntu desberdin eta osagarrietatik:
- Clayton Christensen: Jendeak ikas dezake berritzaileagoa izaten?
- Rosabeth Moss Kanter: Nola sortzen da berrikuntzaren kultura?
- Carliss Baldwin: Nola baliatu daiteke enpresa bezeroengandik bere ideia berritzailetarako?
- John Gourville: Nola merkaturatzen da arrakastaz produktu berritzaile bat?
- Stefan Thomke: Nola oreka ditzake enpresa batek sormena eta berrikuntza alde batetik, eta prozesuen eta egituraren beharrak bestetik?

Bost arloetako proposamenak bikainak dira. Eta hemen soilik azkena garatuko dugu, orekari dagokiona. Thomkek dio enpresa batek berritzailea izatea nahi badu, berrikuntza eta prozesuak aldi berean existitu behar direla, eta batzuetan bata bestearengandik elikatu. Horretarako adimentsuki kudeatuko dira desberdinak, eta batzuetan kontrakoak, diren funtzioak. Adibide ezagun batzuk ipintzen ditu, hala nola Apple eta IDEO, eta arazoa definitzean dagoela giltzarrietako bat dio. Behin ezagututa, Jobs-ek esaten zuen bezala “Dabiltzan soluzio ederrak eta dotoreak” aurkitu behar zaizkio. Horretarako, IDEO brainstormnig sormen tresna erabiltzen dute, ondoren prototipoak eta testak eginaz, beti ere “hiru Rren araua jarraituz: rough, rapid, and right.” (baldarra, azkarra eta zuzena).
.

Juan Perán eta meritokrazia

Hil honetako Ekintzaileak aldizkari bikainaren alean, meritu handiko bi ekintzaileren iritziak eta esperientziak jasotzen dira. Biak ere profil oso desberdinekoak, baina antzerako hainbat ezaugarri pertsonal dituztenak:
- Jenaro García, ekonomialaria eta Enpresen Kudeaketan masterra duena, oinarri teknologikoko Gowex enpresaren sortzailea. Wifia dohainik edozein tokitara du bere negozio ereduaren oinarrian.
- Juan Perán Ramos, Lorca-ko autodidakta, Pikolinos Taldeko sortzailea eta presidentea. Oinetako ekologikoena da bere negozio eredua.

Picolinos-eko sortzaileak aipatzen dituen hainbat esperientzi interesgarri jasoko ditut hemen, edozein ekintzailerentzat baliagarriak izan daitezkeelakoan:
- Oinetakoen diseinuak oso pertsonalak dira, eta merkatuko eskaintzan identifikagarriak: puntada lodiak, era naturalean landutako larrua, eta diseinuan erosotasuna bilatzen duena modaren aurretik,
- Larru naturalak, urezko tindaketaz eta disolbatzailerik gabeko kola,
- Balio katearen antolakuntza bertikala, larruen lanketa kontrolatzea ahalbidetzen duena, eta baita oinetakoen ekoizpena eta banaketa,
- Mundu osoko 60 estatuetako presentzia,
- Gizartearekin konprometitutako marka bat, Fundazio propioaren bitartez,
- Ekoizpen mistoa, bertan eta atzerrian, krisi garaietan pertsonala kaleratu barik, eta
- Nepotismorik eza: familiakoren batek balio baldin badu sartuko da, eta balio ez duenak ez du kontatzen. Eta zuzendari orokorra, beti familiatik kanpoko profesional bat izaten da.
.

Dei interaktiboak

Negozio ideia berrien Springwise aldizkari bikaineko aste honetako alean, badira ideia batzuk bitxiak benetan. Horietako bat, telefonoz hitz egiten ari den ahotsaren tonuaren arabera dar-dar egiten duen panpina bat da, eta besarkatuta eduki ezkero, hizketaldia interaktiboagoa bilakatzen omen da. Irudimen apur batekin, produktu berriari beste hainbat erabilpen ere aurkituko diote.
.
.

.
.

Aukera kostua

Egun hauetan El Pais egunkari ospetsuaren albiste nagusienetako bat, finantza sektorea eta indarberritzeko behar duen laguntza publikoarena izaten ari da. Horren adibide garbia, estatuak Bankia-ren zati handi bat erosteko 82.965 milioi euro inbertituko duela, horrela bere porrota ekidinez. Ez naiz sartuko gaiaren egokitasunaren azterketan, hainbat adituk egin dutelako jadanik. Baina hezkuntzan, I+Gean, berrikuntzan eta ekintzailetasunean murrizketa handiak egiten ari diren garai honetan, ziurrenik aukeraren kostua oso garrantzitsua da. Sortzen den galdera honakoa da: Gure lehiakortasuna non kokatuko litzateke, dirutza hori aipatutako lau arloetan inbertituko balitz, finantza sektorearen ordez?

MIT Sloan Management Review aldizkari ezagunaren azken alean Wired-en artikulu interesagarri hau argitaratzen da: “How to Identify World-Changing Innovation” (Nola identifikatu mundua aldatzen duten berrikuntzak). Etorkizunerako zein berrikuntza izango den garrantzitsua jakiteko, ideien tamainari begiratu behar zaio. Eta ondoren, mundua aldatzeko gai dena bereizi soilik interesgarria izango den ideiatik. Thomas Goetz editore exekutiboak idazten duenez, jokabide-eredu komunak aurkitu dituzte gure garaiko berrikuntza sakonenetan, eta horietan oinarrituta, zazpi arauko multzo propio bat garatu dute:
- Zeharkakotasuna bilatu: ideia onenak sektore batetik bestera transferitu daitezke,
- Esponentzialetan nabigatu, Moore-n Legearen adibidea jarraituz,
- Pertsona liberatzaileen alde egon, geldirik dagoena jariakor bihurtzen baitute,
- Asmo handiko helburu sustatu,
- Irekitasunari lagundu,
- Diseinuan zehaztasunez saiatu, eta
- Denbora librea utzi sormenerako.
.

Sormena lantokian

Teresa Amabile, Harvard Business School-eko katedraduna, enpresetako sormenaren aditu ospetsuenetako bat da. Bere azken lanaren ondorioak argitaratu berri du: “Does high stress trigger creativity at work? (Estres handiak lanean enplegatuen sormena sustatzen du?). Bertan dioenez, enplegatuei galdetzerakoan ea nola sentitzen diren proiektuen epeak betetzeko premia dagoenean, batzuk “Gorrotoa diet” erantzuten dute, eta beste batzuk “Ezin naiz horiek gabe bizi”. Noizean behin, egoera biak batera ere ematen dira. Lehen kasuan, enplegatuek kexu egoten dira lan nagusia egoki amaitu ahal izateko jasaten duten etenaldi ugariengatik. Bigarrenean, pertsona batzuk sortzaileagoak sentitzen dira amaitzeko epe jakin bat ezartzen zaienean, presioa lagungarri zaie.

Amabilek eta bere taldeak aurkitu izan dute kasu batzuk, presioaren eraginez sormena areagotu egin dena. Baina salbuespenak dira. Norberaren onena emateko, etenaldietatik eta besteen eskaerengatik babestuta egotea egokiagoa da. Horrela, arazo konplexu bat konpondu behar denean, hobe da distraziorik ez dagoen lekuren batean gorde. Adibidez, gutxi erabiltzen den bilera gelaren baten, edo kale-kantoiko kafetegian. Garrantzitsuena fokatzea da, askatu behar den gaian murgiltzea, eta ez besteen helburuek gaina hartzea gure lanari. Errealitateak erakusten du, epeak betetzeko kanpoko presioa dagoenean, lehen galtzailea normalean sormena izaten dela.
.

Mark Zuckerberg

Ziurrenik datorren astean New Yorkeko Wall Street-eko burtsan Facebook enpresa kotizatzen hasiko da, 75.000 milioi dolarreko balioarekin. Bideo honetan bere sortzailea eta CEO den Mark Zuckerberg ikusiko dugu, enpresa pertsonalki kudeatzearen garrantziaz hitz egiten, beti ere talde talentudun baten laguntzaz.
.
.

.
.

Crowdfunding

Edozein ekintzailek negozio berria finantzatzeko hainbat bide ditu:
A- Baliabide propioekin finantzatzea: norberaren kapitala, familiarena, etab., eta
B- Besteen baliabideekin finantzatzea: arrisku kapitala, inbertitzaile pribatuak (Business angels), taldeko finantzazioa (Crowdfunding), hornitzaileen kredituak epe motz eta ertainera, bankuen eta aurrezki kutxen maileguak, kreditu ofizialak, gobernu autonomikoen sustapen mailegu zein subentzioak, finantza erakundeetako maileguak, leasing, etab.

Lau urtetik hona eta interneti esker, taldeko finantzazioak edo Crowdfunding-ak gero eta indar gehiago hartzen
ari da, bereziki aisialdi eta sormen sektoreetan, hala nola zinea, musika, etab. Sistema nahiko erraza da: web orri baten proiektu berriak aurkezten dira, eta behar den kapitala aurrera eramateko. Edozeinek ipini dezake nahi duen dirua, dohaintza bezala edo itzulerarekin. Egun hauetan bi post bikain argitaratu dira gaiari buruz:
- Enrique Dans-ek Kickstarter fenomenoari buruz ari zaigu, hainbat proiekturentzat jadanik 175 milioi dolar lortu baititu, eta
- Daniel Parente, bideojokoen eta entretenimendu digitalaren industriei buruz idazten du.
Kasu bietan, Crowdfunding-a erabiltzen duten hainbat weben link interesgarriak eskaintzen dizkigute. Horrela, gaur egun zer nolako proiektuak ari diren martxan jartzen ikus daiteke.
.

Milioidun burua

T. Har. Eker ekintzailearen “Milioidun buruaren sekretuak” best sellerra irakurri berri dut. Zerotik milioidun izatera, liburuak dakarren 17 printzipioak jarraituz lortu zuen. Youtuben bere hitzaldi eta mintegien bideo ugari aurki daitezke printzipioak garbi azaltzen. Eta komunikatzeko duen dohain apartak ere agerian geratzen dira. Egia esan, nahiko printzipio orokorrak dira, eta egilearentzat dirua egiteko balio dute bereziki. Baina uste dut edozein ekintzailek kontutan hartzeko modukoak direla, bereziki lanerako kultura jakin bat ezartzerakoan.

Hamazazpi printzipioak honakoak dira:
1- Aberatsek pentsatzen dute: “Nire bizitzan sinesten dut”. Txiroek: “Bizitza gertatzen zaidan zerbait da”.
2- Aberatsek dirua irabazteko jokatzen dute. Txiroek ez galtzeko.
3- Aberatsek aberats izaten arduratzen dira. Txiroek aberats izatea nahiko lukete.
4- Aberatsek handiki pentsatzen dute. Txiroek txiki.
5- Aberatsek aukeretan jartzen dute arreta. Txiroek oztopoetan.
6- Aberatsek pertsona aberatsak eta oparoak miresten dituzte. Txiroek inbidia die.
7- Aberatsek pertsona positiboak eta oparoak nahi dituzte harremanetarako. Txiroek negatiboak eta arrakasta gabekoak.
8- Aberatsek beraien burua sustatzeko prest daude. Txiroek ez dute auto-sustapenean pentsatzen.
9- Aberatsak beraien arazoak baino handiagoak dira. Txiroak, txikiagoak.
10- Aberatsak hartzaile onak dira. Txiroak, negargarriak.
11- Aberatsek emaitzen arabera ordainduak izatea nahi dute. Txiroek, emandako denboraren arabera.
12- Aberatsek “gauza biak” pentsatzen dute. Txiroek, “gauza bat ala bestea”.
13- Aberatsek ondasun netoari erreparatzen diote. Txiroek lanarekin irabazitakoari.
14- Aberatsek ondo kudeatzen dute dirua. Txiroek gaizki.
15- Aberatsek diruak beraientzat lan asko egin dezala saiatzen dira. Txiroek lan asko egiten dute diruarentzat.
16- Aberatsek aritu egiten dira beldurra izanagatik. Txiroei beldurrak geldiarazi egiten die.
17- Aberatsek etengabe ikasten eta hazten dihardute. Txiroek badakitela uzten dute.
.

Richard Branson

Gaurkoan blogera aspalditik jarraitzen dugun ekintzaile baten bideo interesgarri bat ekarriko dugu: Richard Branson, mundu mailan 20 marka ezagunenen artean dagoen Virgin enpresa taldearen sortzailea. Hiru gairi buruz ari da:
- Enpresa bat nola kudeatu: ezin da ahaztu enpresa pertsona talde batek osatzen duela, eta bertan lidergoa izateko ekintzailea entzule trebea izan behar da, motibatu egiten duena, ondo ordaintzen dakiena, eta horrela profesional onenak mantentzea lortuko duena.
- Babes finantzarioa: sarritan arrakasta eta porrotaren artean marra fin bat soilik dago, finantzarioa izaten dena.
- Erantzukizunak delegatu: bere presentziarik gabe Virgin-ek jarraituko duen galdetzen diotenean, baietz dio, delegatzea gustatu zaiolako betidanik, pertsona lehiakorrez inguratzen jakin izan duelako.
.
.

.
.

Auzokoen zerbitzua turistei

Negozio berrien ideien Springwise aldizkari bikainaren azken alean, badira gustatu zaizkigun batzuk, eta nahiko bideragarriak gure inguruan ezartzeko. Horietako bat adibidez, Berlingo Hotel Plus Onek- asmatu duena, bere bezeroei gelako alokairua eta hoteleko ohiko zerbitzuaz gain, auzotar batekin harremanetan jartzeko aukera eskaintzen diona. Zerrenda zabal batetik, bezeroak aukeratu ahal izango zuen bere atzerako profila duen norbait, leku ederrenak zein monumentuak erakusteko, arreta pertsonalizatuaz. Zerbitzu hau gelaren prezioan sartuta egongo litzateke.

Joan zen hiletik da abian negozio eredu berri hau. Hotela alde zahar inguruan kokatuta egonik, inguruan kafe txikiak, eta bertakoak soilik joaten diren tabernak eta jatetxeak daude. Auzotarrak hiria ondo ezagutzen dutenak izango dira, eta erakusteko harro daudenak. Beraien motibazio nagusia antzerako kanpotar bati liluragarrienak diren tokiak erakustea da. Bisitariak auzotarra aukeratzen du, eta baita nolako topaketa egin nahi duen: auzoa bisitatu, museoren bat, elkarrekin afaldu, etab. Berlingo hotelaren ideiarena, edozein hiri edo lurraldera datozen turista atzerritarrei ere gehitu ahal da, atzerritarrak ezagutzeko irrikaz dauden eta hizkuntzak dakiten bertokoekin harremanetan jarriz.
.

2 ekintzaileren 29 ikasgai

Harvard Business Review aldizkari bikainaren azken alean, erdiko txostena Apple-ren sortzaile ospetsuari eskainita dago “The Real Leadership 14 Lessons of Steve Jobs”. Bere biografia idatzi zuen Walter Isaacson-en best sellerr-ean oinarrituta, 14 ikasgai hauek garatzen ditu::
1- Ardaztu,
2- Sinplifikatu,
3 - Amaieraraino arduratu,
4- Atzetik gaudenean, salto egin,
5- Arreta produktuetan ipini, mozkinetan baino,
6- Taldeetan ardaztearen morroia bilakatu gabe,
7- Errealitatea bikoiztu,
8- Inputatu,
9- Perfekzioa bilatu,
10- “A” enplegatuak soilik jasan,
11- Aurpegiz aurpegira konprometitu,
12- Margo handia zein xehetasunak ezagutu,
13- Humanitateak zientziekin konbinatu, eta
14- Grinatsua izan, zentzugabea izan.

Aipatutako batzuk Ivan Marcos nire lagunak, Txilera egin duen bisitaren itzuleran jasotakoen atzerakoak dira. David Packard ekintzailearen liburua laburbildu du, HPn zegoen lanerako era eta lidergoari buruzko ikasgaiak trebetasun handiz jasoz. Ezberdintasun txiki batzuk tarteko, ekintzaile arrakastatsuaren oinarrizko ideietan bat datoz:
1- Mozkina,
2- Bezeroak,
3- Interes arloak,
4- Garapena,
5- Enplegatuak,
6- Antolamendua,
7- Gizartea,
8- Auto-finantziazioa,
9- Akzioen salmenta eta mozkinen banaketa enplegatuei,
10- Ikerkuntza eta garapenean inbertsio sendoa,
11- Berrikuntzarekin eta ideia berriekin atxikimendua,
12- Bezeroei entzun,
13- Konfiantza pertsonengan,
14- Unibertsitate onengatik eta aireportuetatik gertutasuna,
15- Gizartearekiko konpromisoa.
.

Zeregina eta balioak

Andy Kurtzig ekintzailea JustAnswer enpresaren sortzailea da. Erabiltzaileak adituekin harremanetan jartzen duen web orria izanik, ordaintzen duen edonork galde dezake nahi duena hainbat arlo jakin batzuetan, hala nola medikuntza, zuzenbidea, automobilgintza, albaitaritza eta teknologia. Bideoan azaltzen duenez, hasieran oker zebilen enpresaren zereginari eta balioei garrantzirik ematen ez zielako. Hemen gaiari buruz nola aldatu den adierazten digu, eta gaur egun zeregina zela erabiltzen duen talentua erakartzeko.
.
.

.
.

Roadmap - Bidai orri

Idazle, hizlari eta marketing-ean aditua den Agustin Medinak, berriki argitaratu du Ed. Piramiden honako liburu bikaina: “Hoja de ruta para emprendedores. Crear una empresa en tiempos difíciles.” (Bidai orria ekintzaileentzat. Enpresa bat sortu garai zailetan) Bertan hamaika kapitulutan ekintzailetasunari buruz duen eskarmentu zabala jasotzen d, eta azken bietan ekintzaile ospetsuen aholkuak jasotzen ditu. Liburuan aholku asko jasotzen dira, ondo idatzia dago, irakurtzeko erraza, hezigarria, edozein kapitulutatik irakur daitekeena, eta irakurleari lagundu egin ahal dio hainbeste gai jorratzerakoan. Kapituluen izenburuak honakoak dira:
1- Motibazioak.
2- Itxaropenak.
3- Arriskuak.
4- Errealitatea.
5- Independentzia.
6- Baliabideak.
7- Bazkideak.
8- Taldea.
9- Berrikuntza.
10- Arrakasta eta porrota.
11- Ekintzaile izaten ikasi.
12- Urrezko zazpi arau eta aholku on batzuk.
13- Ekintzaile handi baten azken aholkua.

“Arrakasta eta porrota”ri buruzko hamargarren kapitulua bereziki interesgarria iruditu zaigu. Bertan esaten denez, ekintzaile guztiak behin baino gehiagotan jasan dute porroten bat, baina asko berriro saiatzen dira, eta dezentek arrakasta lortzen dute. Amaieran dio enpresari arrakastatsuek ez dituztela porrotak besteekin partekatzen. Nahiz eta beraien esperientziak baliagarriak izan guztientzat. Besterik ez bada, kontzientzia kolektiboak kontutan hartzeko porrota denoi gertatzen zaigun zerbait dela, ez soilik “porrot egin dutenena”. Baina arrakasta izan duten ekintzaileek beraien porrotak azalduko dituzten jardunaldirik ez da antolatzen. Ibilbide profesionalean arrakasta izan dutenak, soilik beraien metodo arrakastatsuak partekatzea gonbidatzen gaituzte. Eta porrota izan dutenei, inork ez die deitzen hitzaldiak emateko.
.

Pertseberantzia: Nick Vujicic

Ekintzaileen ezaugarrietako bat pertseberantzia da. Azken hogei urtetan ehunka ekintzaileei galdetu izan dizkiegu, negozio berrietan arrakasta lortzeko giltzarriei buruz. Beti daude ezaugarri iraunkor batzuk: negozioaren ezagutza, lan ahalmena, ikuspegia, pertseberantzia, taldea, finantzaketa, ilusioa, baikortasuna, etab. Pertseberantzia beti dago hor. Eta adibiderik didaktikoenetako bat Nick Vujicic-ena da. Bideoa, gainditzearen irakaskuntza ederrenetakoa da.
.
.

.
.

Aldaketak kudeatzeko gaitasunak

MindTools. Essential skills for an excellent career aldizkari elektroniko bikainaren aste honetako alean, ekintzailearentzat oso interesgarria den artikulu bat argitaratzen dute: “How Good Are Your Change Management Skills?” (Zenbaiterainoko onak dira aldaketak kudeatzeko dituzun gaitasunak?). Bertan diote erakunde gehienentzat aldaketa saihestezina dela. Eta are gehiago, negozio berri gehienetan. Ekintzaileak aldaketak eraginkortasunez kudeatzen dituenean, enplegatuak eroso sentitzen dira negozio berrian, “beti bezala” doala usteko dutelako. Horren ondorioz, kolaboratzaile taldeak eta erakundeak berak disfuntzionaltasun gutxi izango ditu, eta negozio berria arrakastara bideratuta egongo da, galerak eta porrotak ekidituz.

Aldaketarako gaitasun horiek aztertzeko, galdera-sorta interesgarri eta praktiko bat proposatzen du, hamasei galderekin guztira, eta bakoitza bost erantzun posiblerekin. Norberaren puntu indartsuenak ezagutzen lagunduko du, eta ahulenak nola sendotzen ikasi. Aldaketak arrakastaz kudeatzeko lau arlo nagusienei zuzenduta daude galderak, bakoitzean beste lau itaun daudela:
1- Aldaketa ulertu,
2- Aldaketa planifikatu,
3- Aldaketarako erresistentzia kudeatu, eta
4- Aldaketa ezarri.
.

Maiordomotzaren haziak

“Ekintzaileak” aldizkari bikainaren apirileko alean, Gary Hamel management-eko guru ospetsuaren azken libruruaren laburpen bat jasotzen da “What Matters now” (Orain axola dena). Zuzendari edo ekintzaile bat nolakoa izan behar den azaltzen du, beti ere bere ikuspegitik, eta London Business School-eko ikasleei esaten ziena argitzen digu. Aholku hauek egunero gogoan edukitzea komeni dela dio.

1- Zure ama alargunak aurrezki guztiak zure enpresan inbertitu ditu. Beste akziodunik ez dago, eta hori da bere inbertsio bakarra. Horregatik ahaleginduko zara pentsio ziurra izan dezan. Ondorioz, inoiz ez duzu sakrifikatuko epe luzea, mozkin azkar batengatik.
2- Zure nagusia anaia zaharrago bat da. Errespetua zor diozu. Baina inoiz ez zara zurikeriatan arituko.
3- Zure enplegatuak gaztetako lagunak dira. Beti emango diezu zalantzaren aukera. Baina premiazkoa denean, adiskidetasuna elkarrenganako erantzukizuna ere badela garbi utziko diezu.
4- Zuen semeak dira bezero nagusiak. Horrek esan nahi du ez diezula ziria sartuko edo aprobetxatuko. Inoiz ez duzu bezero bat esplotatuko.
5- Burujabeki aberatsa zara. Nahi duzulako egiten duzu lan, eta horretxegatik ez duzu zuzentasuna baztertuko igoera bategatik. Uko egingo duzu, amore eman gabe.

Azkenik, honakoa gaineratzen du: “Suposizio hauen arabera aritzen baldin bazarete, maiordomotzaren hazia elikatzen zabiltzate zeuen bizitza profesionalean eta, adibidearen bidez, baita besteen bizitzan ere”
.

Kideengandik ikasi

Peter Drucker edo Tom Peters bezalako management-eko guruek behin eta berriz errepikatu izan dutenez, premiazkoa da ekintzaileak bere puntu indartsuenak ezagutzea, eta bakarren baten bikaina izatea. Horretarako, besteei galdetu egin behar diegu nola ikusten gaituzten jakiteko, zer estimatzen duten gehien gugandik, zertan garen bikainak. Gaurko bideoan, Sukhinder Singh Cassidy ekintzaileak dioenez, gaztaroan irakasle batek bere ezaugarririk nagusiena enpatia zela esan zionean, ez omen zion ulertu. Berak, adimentsua edo azkarra zela entzutea espero zuen. Gaur egun, kolaboratzaileek bere enpresan pozik daudela diotenean, hain zuzen enpatiagatik dela adierazten omen dute. Bideoan Cassidyk, ikusleei “marka"-ko arlo indartsuenak identifikatzeko proposatzen diete. Berak hori kideengandik nola ikasi zuen azaltzen digu, sarritan arlo edo indar horiek ez baitira izaten norberak uste dituenak.
.
.

.
.

Negozio Plan bat ondo aurkeztu

Aste honetan negozio berrien proiektuen aurkezpenak izan ditugu. Sarri gertatzen da denbora asko ematen zaiola Negozio Plana egiteari, eta denbora gutxi gordetzen dela bere aurkezpena eta power pointa prestatzen. Egokiena bien arteko oreka bat gordetzea da, bereziki NPa taldean egina izan baldin bada. Horretagik, denbora nahikoa bideratuko zaio NPa sustatzeari, “saltzeari” aurkezpenen bidez. Ez da izango azken momentuko zerbait, presaka prestatua, eta ondo aterako delakoaren ustean. Sarritan, aurkezpen on batek, ekintzailearen jarduera sinesgarri batek, mamiak bezainbeste balio dezake. Adibide ezagun bat ipintzearren, Hollywood-eko pelikuletan, ekoizteari aurrekontuaren erdia bideratzen zaio, eta beste erdia mundu osoan sustatzeari, hori izanik beraien ezaugarrietako bat. Badira Monica Perez de las Heras bezalako aditu bikainak arlo honetan, “Komunikatzen ari al zara?” liburuaren egilea bera, eta aurkezpen eraginkorrak egiteko coatxing-a.

Gure ustez power pointarekin talde aurkezpenak egiterakoan, 15 edo 20 minutu inguruko iraupenekoak, arlo desberdin hauei erreparatzea komeni da, era orekatuan eta beti ere entzuleriaren arreta eskuratu asmoz:
1- Egitura orokorra,
2- Denboraren erabilera,
3- Power point-aren edukia,
4- Ekintzailearen jarrera aurkezpenean,
5- Power pointak aurkezpenari ematen dion balio erantsia,
6- Mamia, negozioaren ideia, eta Ikuspegia,
7- Finantza arloa,
8- Marketing arloa,
9- Ekoizpen arloa,
10- Pertsonal arloa,
11- Amaierako ustezko galderen erantzunaren prestaketa.
.

Porrot ospetsuak

Gure ingurunea eta beste nazio batzuen aldeetako bat, estigmatizatu egiten zaiola ekintzaileari, behin porrota izaten badu. Betirako geratzen zaio porrot egin duenaren ospea. Baina nazio batzuetan, USAn adibidez, negozio berri baten inbertitzeko orduan, inbertitzaileek nahiago izaten dute porroten bat izan duen ekintzailea, berria baino. Porrotetatik gehiago ikasten delakoan daude. Horregatik argitaratzen dituzte hona dakarkigun bideoa bezalakoak, ospetsu askok aurretik itzelezko porrotak izan zituztela ekintzaileei eta gazteei erakusteko. Arriskatzea eta pro-aktiboa izatea, bizitzeko era bat da.
.
.

.
.

Atzerrian kopiatu

Negozio berrien ideiak ematen dituen Springwise aldizkari bikainaren aste honetako alean, adibide batzuk badira gure inguruan ezartzeko modukoak. Giltzarria, ideia berberari erabilera berriak aurkitzea izango litzateke, edo gurean arrakasta lortzeko premiazko egokitzapenak egitea. Gehien atsegin zaigunen artean, QR kodea (quick response barcode edo erantzun azkarreko barra-kodea) daraman pegatina dago. Motorzaleen kaskoan, edo txirrindulari, eskiatzaile edo beste kirolari batenean ipini daiteke. Istripua izan ezkero, mugikor batekin irakur daiteke, kolpatuaren historia mediko osoa lortuz, Osasun Ministerioak onartutako zerbitzari seguru batetik. Kodea azkar irakurriko du larrialdietako mediku batek, eta ospitaletik bertatik eman ditzake tratamenduaren argibideak, bertaratzeko beharrik izan gabe. Kirolariez gain, beste talde batzuetara gara daiteke sistema hau.

Epe ertainera gure artean egongo diren beste negozio batzuk, honakoak lirateke:
- Argazkilaritza estudio errazak erabili, katalogoak iPadekin osatzeko,
- Motozikleta elektrikoak partekatu, premien arabera alokatuz,
- Kotxeen aurrealdean ezarritako kanpoko airbagak, oinezkoekin talka egindakoan erabiltzeko, edo
- Barne-jantzi elektrikoa ezinduentzako, deskarga elektriko leunak emanaz 10 minutuz behin, ultzeren sorrera ekiditzeko.
.

Zerbait estrainekoz egin

Seth Godin best seller-ak egiten nazioarteko aditua denak, otsailean bere azken liburua argitaratu du, titulu erakargarri honekin “EGIZU! Noiz izan zen azken aldia zerbait estrainekoz egin zenuena?" Bere liburuak 35 hizkuntzatara itzuliak izan dira, eta marketing-a eta lana bera ulertzeko era aldatzeko balio izan dute jende askorentzat. Ezagunenak honakoak dira: “Behi purpura. Desberdindu zaitez negozioa eraldatzeko” eta “Ideiabirusak askatzen”, inoiz argitaratu den ebook-ik ospetsuena. Idazlea, hizlaria eta bloggerra izan aurretik, Godin Yahoo-ko marketing zuzeneko lehendakari ordea izan zen. Liburu hau auto-laguntzarako da, eta irakurleari iniziatiba izaten eta porrotari beldurrik ez edukitzera bultzatzen dio. Ekintzaileentzako hainbat aipu inteersgarri dakar, eta horien artean “Egin dezakezun gauzarik okerrena ezer ez egitea da”, “Porrota ezin baduzu izan, orduan ez du merezi”, “Ausartzen ez bazara eta arriskuak hartu, hutsala izango zara. Garrantzitsuena pentsatzera animatzea da, ikertzera eta saiatzera, horrela ikasten eta sortzen dugulako”.

Ekintzailearentzat 6 kapital mota daudela dio:
- Kapital finantzarioa: inbertsio bat egiteko behar den dirua,
- Sareen kapitala: ezagutzen duzun jendea, kontaktuak, txikizkariak, eta kontutan hartu daitezkeen sistemak,
- Adimen kapitala: burua, eta gaian adituak direnengana heltzea,
- Kapital fisikoa: eraikina, makineria eta tresnak,
- Izenaren kapitala: ospea, eta
- Kapital zirikatzailea: aurrera egiteko gogoa, ahalmena. Eta “baietz” esateko adorea. Azken hau da, hain zuzen, gehien estimatzen duena, eta garrantzitsuena ekonomia berrian.
.

Ekintzailearen ADNa

Aste honetan nazioartekoaren emakumearen eguna izan da. Isabel Llorens, Rusticae hotelen katearen sortzaileak emakumeei ekintzaile izateko animatzen die. Norberaren enpresa izatea, amets bat abian jartzea da . Jende guztia da ona zerbaiten, eta bizitzaren hautu bat da ekintzaile izatea.
.

.

Ekintzaile erabiltzaileak

Ewing Marion KAUFFMAN amerikar fundazio ospetsuak, ekintzailetasun arloko mundu mailako onenetakoak, azterketa baten emaitzak argitaratu berri ditu “Nearly Half of Innovative U.S. Startups Are Founded by 'User Entrepreneurs'” (USAko oinarri teknologiko enpresa berrien artean, ia erdiak ekintzaile erabiltzaileek sortu dituzte). Lan berri hau izan da lehena ekintzaile erabiltzaileen, beraientzako sortzen dituzte produktuak eta ondoren komertzializatzen hasten dira, ezaugarriak aztertzen dituena. Oinarri teknologikoko enpresen %46a sortu dituzte, sortutako enpresa guztien artean %10,7 izan arren. Hain zuzen, berrikuntza teknologikoak sektore askotan bultzatu dituzte, osasungintzako tresneriatik hasi eta kirol jantzietaraino.

Hainbat patroi interesgarri ezberdin daitezke:
- Ekintzaile erabiltzailea oso ohikoa da negozio berritzaileetan, eta gehienek finantzazioa lortzen dute arrisku-kapitaleko enpresetatik lehen sei urtetarako.
- Ekintzaile erabiltzaileek gaitasun handiagoa dute beraien inguruan giza kapital handiagoa eta aberatsagoa lortzeko. Halaber, enpresa horiek agudoago egiten dute aurrea diru sarrerak lortzen.
- Era honetako ekintzailetasuna oso egokia izan daiteke hainbat emakumeentzat eta gutxiengoen taldeentzat.
- Ekintzaile erabiltzaileak desberdinak dira beste ekintzaileekin alderatuz. Negozio berriak arrakastatsu garatzeko, ideia, berrikuntza eta bezero ukigaiagoak izaten dituzte.
.